އެމްޓީސީސީން މިދިޔަ އަހަރުގެ ސެޕްޓެމްބަރު މަހު މ. މުލަކުގައި ފެށި ގޮނޑުދޮށް ހިމާޔަތް ކުރުމުގެ ޕްރޮޖެކްޓް ހަތަރު މަސް ދުވަހުގެ ތެރޭގައި ނިންމާފައިވާ ކަމަށް އެ ކުންފުނިން އިއުލާނުކޮށްފި އެވެ.
މިދިޔަ އަހަރުގެ ސެޕްޓެމްބަރު 17، ގައި ފެށި އެ ޕްރޮޖެކްޓު އެމްޓީސީސީގެ ފަރާތުން ނިންމީ މިދިޔަ ޑިސެމްބަރު 23، ގަ އެވެ. މުލަކު ގޮނޑުދޮށް ހިމާޔަތް ކުރުމުގެ ޕްރޮޖެކްޓަށް ޖުމްލަ 17.6 މިލިއަން ރުފިޔާ ހަރަދު ކުރި ކަމަށް އެމްޓީސީސީން ބުންޏެވެ.
އެ ޕްރެޖެކްޓުގެ ދަށުން މުލަކުގެ ގޮނޑުދޮށް ސަރަހައްދުގެ ވަށައިގެން 411 މީޓަރުގެ ހިސާބެއްގައި ވެލި އަޅާފައިވާ ޖިއޯބޭގް ބަހައްޓާފައިވާ ކަމަށް އެ ރަށު ކައުންސިލްގެ ރައީސް އަހްމަދު ޖަމާލް ވިދާޅުވި އެވެ.
"މިކަމުގެ ސަބަބުން އުދަ އަރާ ދުވަސްވަރު މީހުން ދިރިއުޅޭ ގެތަކަށް ލޮނުވަދެ ގެއްލުން ލިބުން ފަދަ ކަންކަމުން ސަލާމަތްވާނެ," ޖަމާލް ވިދާޅުވި އެވެ.
ވިއްސާރަވާ ދުވަސްވަރު އުދަ އެރުން ފަދަ ކަންކަމުގެ ސަބަބުން ގޮނޑުދޮށް ކައިރީގައި ހުންނަ ގެތަކަށް ލޮނު ވިއްސައި، އެ ގެތަކުގެ ރައްޔިތުން ހިފާ ގެންގުޅޭ ތަކެތި ހަލާކުވުން ފަދަ ކަންކަން މީގެ ކުރިން ކުރިމަތިވެފައިވާކަން ޖަމާލް ފާހަގަ ކުރެއްވި އެވެ. އަދި އެމްޓީސީސީން ކުރިއަށްގެންދިޔަ ޕްރޮޖެކްޓުގެ ސަބަބުން އެ މައްސަލައަށޤ ހައްލެއް ލިބޭނެ ކަމަށް ވެސް ކައުންސިލުން ފާހަގަކުރެ އެވެ.
ވޭތުވެދިޔަ އަހަރު ތަކުގެ ތެރޭގައި ކުންފުނީގެ މަސައްކަތުގެ ދުވެލި ވަރަށް ބޮޑަށް ރަނގަޅުކޮށްފައިވާ ކަމަށް އެމްޓީސީސީގެ ސީއީއޯ އާދަމް އާޒިމް މިދިޔަ ޑިސެމްބަރު މަހު ފާހަގަކުރި އެ ކުންފުނީގެ 41 ވަނަ އަހަރީދުވަހުގެ ޖަލްސާގައި ވާހަކަ ދައްކަވަމުން ވިދާޅުވެފައިވެ އެވެ.
"2018 ގެ ކުރިން، މި ކުންފުންޏަށް ހިންގިފައި އޮތީ، އެއްފަހަރާ އެންމެ 25 މަޝްރޫއު. ނަމަވެސް މިއަދު އަޅުގަނޑުމެން، އެއްފަހަރާ 94 މަޝްރޫއެއްގައި އެބަ ހަރަކާތްތެރިވަން. އަދި އެއްފަހަރާ 64 މަޝްރޫއެއް އެއް ވަގުތެއްގާ މިދަނީ ހިންގަމުން،" އާޒިމް ވިދާޅުވެފައިވެ އެވެ.
