ޗުއްޓީއަށް ރަށުން ބޭރަށް ދިޔަ ޓީޗަރުންނާއި ދަރިވަރުން ވީ އެންމެ އަވަހަކަށް ރަށަށް ދިއުމަށް އެޑިއުކޭޝަން މިނިސްޓްރީން އެޖިއްޖެ އެވެ.
ރާއްޖޭގެ ކޮވިޑްގެ ކޭސްތައް އިތުރުވަމުންދާއިރު މިއީ ސްކޫލްގެ ބަންދު ދުވަސްވަރަށްވުމުން ގިނަ ބަޔަކު ވަނީ އެކި ބޭނުންތަކުގައި މާލެއަށް އައިސްފަ އެވެ. އެއް ބަޔަކު ތިބީ އަނބުރާ ރަށަށް ދިއުމަށް ޓިކެޓު ނަގައި ތައްޔާރުވެގެންނެވެ.
މި ދަނޑިވަޅުގައި ދަރިވަރުންގެ ކިޔެވުމުގެ ކަންތައް ކުރިއަށްގެންދާނެ ގޮތަކާ މެދު ބެލެނިވެރިން ވަނީ ސުވާލު އުފައްދާފަ އެވެ.
އެޑިއުކޭޝަން މިނިސްޓްރީން މިއަދު ނެރުނު ބަޔާނުގައި ބުނީ ސްކޫލްތަކުގެ ކިޔެވުން މެދުނުކެނޑި ކުރިއަށް ގެންދިއުމަކީ މިނިސްޓްރީން އަބަދުވެސް އިސްކަންދޭ ކަންތައް ކަމަށެވެ. އެގޮތުން ދެވަނަ ޓާމް ކިޔެވުން ފެށޭއިރު ހުރިހާ ދަރިވަރުންނާއި މުދައްރިސުން ސުކޫލަށް ހާޒިރުވުމަކީ ވަރަށް ބޮޑު އެދުމެއް ކަމަށް މިނިސްޓްރީން ބުންޏެވެ.
ކޮވިޑް ކޭސްތައް އިތުރުވެ މިހާރު އަޅާފައިވާ ފިޔަވަޅުތައްވެސް ވަނީ ހަރުކަށި ކޮށްފަ އެވެ. އެގޮތުން މާލެ ސަރަހައްދުގައި ހަލުވިކަމާއެކު ކޮވިޑް ފެތުރެމުންދާތީ މާލެއިން ބޭރަށް ފުރާ ކޮންމެ މީހަކު ވެސް ޕީސީއާރް ޓެސްޓު ހަދަން އެޗްޕީއޭއިން މަޖުބޫރު ވަނީ ކޮށްފަ އެވެ.
މިހާރު މާލެ ސަރަހައްދުގައި އިވެންޓްތަކާއި ހަފްލާ ފަދަ ކަންކަން 50 މީހުންނަށް ވުރެ މީހުން ހިމަނައިގެން ކުރިއަށް ނުގެންދިއުމަށް އެޗްޕީއޭއިން ވަނީ އަންގާފަ އެވެ.
މީގެއިތުރުން ކޮވިޑު ވެކްސިންގެ ޑޯޒްތައް ފުރިހަމަވެ 14 ދުވަސް ހަމަވެފައިވާ ފަރާތެއް ނަމަ ދަތުރުކުރުމުގެ 72 ގަޑިއިރު ނުވާ ޕީސީއާރު ނެގެޓިވް ނަތީޖާއެއް އޮންނަންޖެހޭނެ ކަމަށް އެޗްޕީއޭއިން ބުންޏެވެ.
އަދި ވެކްސިންގެ ޑޯޒްތައް ފުރިހަމަނުވާ ފަރާތެއްނަމަ، 14 ދުވަހުގެ ކަރަންޓީނު ފުރިހަމަކުރަންޖެހޭއިރު، ކަރަންޓީނުން ދޫކުރެވޭނީ 14 ދުވަހުގެ ކަރަންޓީނު ފުރިހަމަކުރުމަށްފަހު ޕީސީއާރު ޓެސްޓް ހަދައި ނަތީޖާ ނެގެޓިވް ވުމުންނެވެ.
