ކާބުލް، އަފްގާނިސްތާން (ޖެނުއަރީ 10) - ތާލިބާން ސަރުކާރަށް ވަރަށް ގިނައިން ފާޑުކިޔަމުން ދިޔަ އަފްގާނިސްތާނުގެ ޔުނިވާސިޓީ ޕްރޮފެސަރެއް ހައްޔަރުކޮށްފި އެވެ.
ޕްރޮފެސަރު ފައިޒުﷲ ޖަލާލް ހައްޔަރު ކުރީ ހޮނިހިރު ދުވަހު އެވެ. އޭގެ ކުރިން އޭނާ ވަނީ ޓީވީ މެދުވެރިކޮށް ތަކުރާރުކޮށް ތާލިބާން ސަރުކާރަށް ފާޑުކިޔާފަ އެވެ.
މިދިޔަ އޯގަސްޓު މަހު ވެރިކަމަށް އައި ތާލިބާނުން އަންނަނީ ފާޑުކިޔާ ފަރާތްތަކާ މެދު ހަރުކަށިކޮށް އަމަލު ކުރަމުންނެވެ. އެގޮތުން މުޒާހަރާ ކުރުން ވެސް އޮންނަނީ މަނާކޮށްފަ އެވެ.
ތާލިބާން ސަރުކާރުގެ ތަރުޖަމާނު ޒަބީހުﷲ މުޖާހިދު ކުރި ޓްވީޓެއްގައި ބުނީ ޖަލާލްގެ ވާހަކަތަކުގެ މަގްސަދަކީ "ނިޒާމާ ދެކޮޅަށް ރައްޔިތުން ނެރުން" ކަމަށެވެ.
"އޭނާ ހައްޔަރު ކުރީ އެހެން މީހުން ވެސް ކުރިއަށް އޮތް ތަނުގައި އެފަދަ ހަމަނުޖެހޭ ވާހަކަ ނުދައްކާނެކަން ކަށަވަރު ކުރަން."
އަފްގާނިސްތާނުގެ ރައްޔިތުންނަކީ ހިމާރުންތަކެއްގެ ގޮތުގައި ތާލިބާނުން ދެކޭ ކަމަށް ބުނާ ޕޯސްޓުތަކެއް ޖަލާލްގެ ނަމުގައި ސޯޝަލް މީޑިއާގައި ވެސް ދައުރުކޮށްފައި ވެ އެވެ.
ނަމަވެސް އޭނާގެ ދަރިފުޅު ހަސީނާ ޖަލާލް ބުނީ އެއީ ފޭކު އެކައުންޓަކުން ދައުރު ކުރި ޕޯސްޓުތަކެއް ކަމަށެވެ. ތާލިބާނުން އެ ޕޯސްޓުތައް ބަހަނާއެއްގެ ގޮތުގައި ދައްކަނީ އަނިޔާވެރިކަމާ ދެކޮޅަށް އުފުލާ އަޑެއް ކަނޑުވާލަން ކަމަށް އޭނާ ތުހުމަތު ކުރި އެވެ.
ޖަލާލް ހައްޔަރުކޮށްފައި ހުރި ތަނެއް އަންގާފައި ނުވާ އިރު، އާއިލާ އަށް އޭނާގެ ހާލަތާ ބެހޭ އެއްވެސް މައުލޫމާތެއް ތާލިބާނުން ފޯރުކޮށްދީފައެއް ނުވެ އެވެ.
ކާބުލް ޔުނިވާސިޓީގައި ގާނޫނާއި ޕޮލިޓިކަލް ސައިންސް ކިޔަވައިދޭ އެތައް އަހަރެއް ވެފައިވާ ޖަލާލް ވަނީ ގައުމު ދޫކޮށް ހިޖުރަ ކުރަން ދެކޮޅު ހަދާފަ އެވެ.
މީގެ ކުރިން 1990 ގެ އަހަރުތަކުގައި ތާލިބާނުން ވެރިކަން ކުރިއިރު ވެސް އޭނާ އަފްގާނިސްތާން ދޫކޮށް ގޮސްފައެއް ނުވެ އެވެ. އޭރު ވެސް އެތައް ފަހަރެއްގެ މަތިން އޭނާ ޖަލުގައި ބަންދުކުރި އެވެ.
