އަހްމަދުއާބާދް، އިންޑިއާ (ޖެނުއަރީ 9) - އިންޑިއާގައި ކޮވިޑް އުސޫލާ ހިލާފަށް ކުއްތާއެއްގެ އުފަންދުވަހުގެ ޕާޓީ ބޭއްވި ބަޔަކު ހައްޔަރުކޮށްފި އެވެ.
ފުލުހުން ބުނީ އެބީ ނަމަކަށް ކިޔާ ކުއްތާގެ ދެ ވަނަ އުފަންދުވަހުގެ ޕާޓީ އަށް 700،000 ރުޕީޒް ނުވަތަ ގާތްގަނޑަކަށް 10،000 ޑޮލަރު ހަރަދު ކުރި ކަމަށެވެ.
ސޯޝަލް މީޑިއާގައި އާއްމުވި ވީޑިއޯ އާއި ފޮޓޯ އިން ފެންނަނީ ހުކުރު ދުވަހު ބޭއްވި ޕާޓީގައި ސްޓޭޖެއް ކުރިމަތީގައި ގިނަ ބަޔަކު ޖަމާވެ ނަށާ މަންޒަރެވެ.
ޕާޓީ ބޭއްވި އަހްމަދުއާބާދް ސިޓީގައި ކޮވިޑާ ގުޅިގެން އަޅާފައިވާ ފިޔަވަޅުތަކުގެ ދަށުން ގައިދުރުކަން ބެހެއްޓުން މަޖުބޫރެވެ. ޕާޓީގެ މަންޒަރުތައް އާއްމުވުމުން ފިޔަވަޅު އެޅީ އެހެންވެ އެވެ.
"ބޮޑު ޕާޓީއެއް ކުރިއަށްދާ ކަމުގެ މައުލޫމާތު އަޅުގަނޑުމެންނަށް ލިބުނު. އެހެންވެ، އަޅުގަނޑުމެން ގޮސް ޕާޓީ ކުރިއަށް ދިޔަ ތަން ބަލައި ފާސްކުރީ،" ފުލުހުންގެ އިންސްޕެކްޓަރު ވީޑީ ޒާލާ އޭއެފްޕީ އަށް ވިދާޅުވި އެވެ.
"ކޮވިޑް އުސޫލުގެ ދަށުން ޕާޓީއެއް ބޭއްވުމުގެ ކުރިން އެކަމަށް ރަސްމީކޮށް ހުއްދަ ހޯދަން ޖެހޭ. ޕާޓީއަށް ދާ މީހުން ގައިދުރުކަން ކަށަވަރު ކުރުމަކީ ޕާޓީ ބާއްވާ ފަރާތުގެ ޒިންމާއެއް."
އުސޫލާ ހިލާފަށް ޕާޓީ ބޭއްވި މައްސަލައިގައި ތިން ފިރިހެނުން ހައްޔަރު ކުރި އެވެ. އެ އެންމެން ވެސް ވަނީ ކަފާލާތުގެ ދަށުން ދޫކޮށްލާފަ އެވެ.
އާދީއްތަ ދުވަހު އިންޑިއާ އިން 160،000 ކޮވިޑް ކޭސް ފެނުނެވެ. އެއީ އޭގެ ހަފުތާއެއް ކުރިއާ އަޅާ ބަލާއިރު ގާތްގަނޑަކަށް ހަ ގުނަ އިތުރު އަދަދެކެވެ.
