ނިއު ދިއްލީ، އިންޑިއާ (ޖެނުއަރީ 6) - އިންޑިއާގައި ކޮވިޑް ކޭސްތައް އިތުރުވަމުން ދާތީ ކެމްޕެއިން އެއްވުންތައް ކެންސަލްކޮށްފި އެވެ.
ހަލުވިކަމާ އެކު ފެތުރޭ އޮމިކްރޯން ވޭރިއެންޓް އިންޑިއާ އަށް ފޯރައި، ދެ ދުވަސް ތެރޭގައި ކޭސްތަކުގެ އަދަދު ވަނީ ތިން ގުނަ އިތުރުވެފަ އެވެ.
އަންނަ މަހު އޮންނަ އުއްތަރް ޕްރަދޭޝް ސްޓޭޓް އިންތިހާބަށް ބޮޑެތި އެއްވުންތައް ބާއްވަމުން ދިޔަ ނަމަވެސް، ކުރިއަށް ހުރި އެއްވުންތައް ވަނީ ކެންސަލްކޮށްފަ އެވެ.
އިންޑިއާގެ އެންމެ އާބާދީ ބޮޑު އުއްތަރް ޕްރަދޭޝް ސްޓޭޓުގައި 200 މިލިއަން މީހުން އުޅެ އެވެ. އެ ތަނަކީ ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) އަށް ތާއީދު ބޮޑު ތަނެކެވެ.
އިންތިހާބުގެ ކެމްޕެއިނާ ދިމާކޮށް ބޮޑު ވަޒީރު ނަރެންދްރަ މޯދީ ވަނީ މުހިއްމު ސިޓީތަކަށް ވަޑައިގެން، އެކި މަޝްރޫއުތައް ރަސްމީކޮށް ފައްޓަވައިދެއްވާފަ އެވެ.
ނަމަވެސް ގިނަ ސިޓީތަކުން ކާފިއު ހިންގަން ފަށައި، ކޭސްތައް ކުއްލިއަކަށް މަތިވާނެ ކަމުގެ އިންޒާރު ސިއްހީ ތަޖުރިބާކާރުން ދޭން ފެށުމުން ޕާޓީތަކުން ނިންމީ ކުރިއަށް ހުރި އެއްވުންތައް ކެންސަލް ކުރުމަށެވެ.
"ކޮވިޑް ކޭސްތައް އިތުރުވަމުން ދާތީ ހުރި ކަންބޮޑުވުންތަކާ ގުޅިގެން ޕާޓީގެ ކުރިއަށް ހުރި އެއްވުންތައް ވަނީ ކެންސަލްކޮށްފައި،" އިދިކޮޅު ކޮންގްރެސް ޕާޓީގެ ތަރުޖަމާނު އާޝޮކް ސިންގް ވިދާޅުވި އެވެ.
ބީޖޭޕީ އިން ވަނީ ނޮއިޑާގައި ބުރާސްފަތި ދުވަހު ބާއްވަން ރޭވި ބޮޑު އެއްވުން ކެންސަލްކޮށްފަ އެވެ. އިތުރު ޕާޓީއަކުން ބުނީ ދެން ކެމްޕެއިން ކުރާނީ ވާޗުއަލްކޮށް ކަމަށެވެ.
ނޮއިޑާގެ އެއްވުން ކެންސަލް ކުރި ނަމަވެސް ބީޖޭޕީގެ ތަރުޖަމާނު މަނިޝް ޝުކްލާ ވިދާޅުވީ އެއީ ކޮވިޑާ ގުޅިގެން ނޫން ކަމަށެވެ. އޭނާ ވިދާޅުވި ގޮތުގައި އެއްވުން ކެންސަލް ކުރީ ޓެކްނިކަލް ސަބަބަކާ ހެދި އެވެ.
މިދިޔަ އަހަރު ޑެލްޓާ ވޭރިއެންޓު ފެތުރި އިންޑިއާގެ ހާލަތު އެންމެ ގޯސްވި އިރު، 200،000 އަށް ވުރެ ގިނަ މީހުން ކޮވިޑް ބަލީގައި މަރުވި އެވެ.
މިހާރު ގިނަ ގައުމުތަކެއްގައި ހަލުވިކަމާ އެކު ފެތުރެމުންދާ އޮމިކްރޯން ވޭރިއެންޓް އިންޑިއާ އިން ފެނުނީ މީގެ ފަސް ހަފުތާ ކުރިންނެވެ.
ސިއްހީ ތަޖުރިބާކާރުން ބުނީ މީހުން ގިނައިން ދިރިއުޅޭ ބޮޑެތި ސިޓީތަކުގައި އެ ވޭރިއެންޓާ ގުޅިގެން ކޭސްތައް ދަނީ ވަރަށް ބޮޑަށް އިތުރުވަމުން ކަމަށެވެ.
ބުރާސްފަތި ދުވަހު އިންޑިއާ އިން 90،000 އަށް ވުރެ ގިނަ ކޭސް ރިޕޯޓު ކުރި އެވެ. އެގޮތުން މުމްބާއީ އިން ވަނީ ރިކޯޑް އަދަދެއްގެ ކޭސް ރިޕޯޓުކޮށްފަ އެވެ.
ވެރިރަށް ނިއު ދިއްލީގައި މި ހަފުތާ ބަންދުގައި ލޮކްޑައުން ތަންފީޒު ކުރަން ނިންމާފައި ވާއިރު، ހުކުރު ދުވަހުގެ ރެއިން ފެށިގެން ހޯމަ ދުވަހުގެ ހެނދުނާ ހަމައަށް ގެތަކުން ނުކުތުން މަނާވާނެ އެވެ.
