ސޯލް، ދެކުނު ކޮރެއާ (ޖެނުއަރީ 6) - އުތުރު ކޮރެއާއިން އަޑަށް ވުރެ ބާރަށް ދަތުރު ކުރާ ހައިޕާސޮނިކް މިސައިލެއް އަނެއްކާ ވެސް ޓެސްޓުކޮށްފި އެވެ.
މިއީ އެ ގައުމުން މި އަހަރު ޓެސްޓު ކުރި ފުރަތަމަ ހަތިޔާރެވެ. އުތުރު ކޮރެއާ އިން ފުރަތަމަ ފަހަރަށް ހައިޕާސޮނިކް މިސައިލެއް ޓެސްޓު ކުރީ މިދިޔަ ސެޕްޓެމްބަރު މަހު އެވެ.
ހައިޕާސޮނިކް މިސައިލަކީ އާދައިގެ މިސައިލަށް ވުރެ ހަލުވިކަމާ އެކު ދަތުރު ކުރާ އެއްޗެކެވެ. އެހެންކަމުން މިސައިލް ޑިފެންސް ސިސްޓަމަށް ހައިޕާސޮނިކް މިސައިލް ހުއްޓުވަން އުނދަގޫވެ އެވެ.
ބުދަ ދުވަހު ޓެސްޓު ކުރި ހައިޕާސޮނިކް މިސައިލް ކާމިޔާބުކަމާ އެކު 700 ކިލޯމީޓަރު ދުރުގައިވާ ޓާގެޓަށް ވާސިލްވި ކަމަށް ކޮރެއާ ސެންޓްރަލް ނިއުސް އެޖެންސީ (ކޭސީއެންއޭ) އިން ބުންޏެވެ.
ދެ ކޮރެއާގެ ކަނޑުގެ ސަރަހައްދަށް އުތުރު ކޮރެއާ އިން ފޮނުވި މިސައިލެއް ވެއްޓުނު ކަމަށް ބުދަ ދުވަހު ދެކުނު ކޮރެއާ އާއި ޖަޕާނުން ވެސް ބުންޏެވެ.
އުތުރު ކޮރެއާ އިން އާ މިސައިލެއް ޓެސްޓު ކުރުން ކުށްވެރިކޮށް، އެމެރިކާ އިން ވަނީ މަޝްވަރާ އަށް އިށީނުމަށް އެ ގައުމަށް ގޮވާލާފަ އެވެ.
އެމެރިކާ އިން ބުނީ މިސައިލް ޓެސްޓު ކުރުމަކީ އދ. ގެ ގަރާރުތަކާ ހިލާފު އަދި އުތުރު ކޮރެއާގެ އަވައްޓެރި ގައުމުތައް ނުރައްކަލަށް ހުށަހެޅޭ އަމަލެއް ކަމަށެވެ.
އެމެރިކާ އާއި އުތުރު ކޮރެއާއާ ދެމެދު އެންމެ ފަހުން މަޝްވަރާ ކުރީ 2019 ވަނަ އަހަރު އެވެ. އޭރު ލީޑަރު ކިމް ޖޮންގް އުން އާއި އެމެރިކާގެ ރައީސް ޑޮނަލްޑް ޓްރަމްޕް ބައްދަލުކުރެއްވި އެވެ.
