ކޮލޮމްބޯ، ސްރީލަންކާ (ޖެނުއަރީ 4) - ސްރީލަންކާގައި ކާބޯތަކެތީގެ އަގުތައް އުފުލެމުން ދާތީ އާއްމުންނަށް އެހީވުމުގެ ގޮތުން 1.1 ބިލިއަން ޑޮލަރުގެ ރިލީފް ޕެކޭޖެއް އިއުލާނުކޮށްފި އެވެ.
ކޮވިޑް ބަލިމަޑުކަމުގެ ސަބަބުން ލަންކާގެ ފަތުރުވެރިކަމަށް އަސަރުކޮށް އިގްތިސާދަށް ވަރަށް ބޮޑަށް އަސަރެއް ވަނީ ކޮށްފަ އެވެ. ޒަރޫރީ ތަކެތީގެ އަގުތައް އުފުލި އާއްމުންނަށް ވަނީ ގޮންޖެހުންތަކާ ކުރިމަތިވެފަ އެވެ.
ސުޕާމާކެޓުތަކުން ހިކި ކިރާއި، ހަކުރު، މުގު އަދި އެހެން ކާބޯތަކެތި ވިއްކަމުން ދަނީ ރޭޝަންކޮށްގެންނެވެ. މިދިޔަ މަހު ކާބޯތަކެތީގެ އަގު ރިކޯޑް މިންވަރަށް 22 ޕަސެންޓަށް އުފުލުނެވެ.
ދިރިއުޅުމުގެ ހަރަދު އިތުރުވަމުން ދާތީ މި އަހަރު ދެ މިލިއަނަށް ވުރެ ގިނަ ދައުލަތުގެ މުވައްޒަފުންނާއި ޕެންޝަނަރުންނަށް ލިވިން އެލަވަންސްގެ ގޮތުގައި 60،000 ރުޕީޒް ނުވަތަ 300 ޑޮލަރު ދޭނެ އެވެ.
އޭގެ އިތުރުން ގެތަކުގައި ހައްދާ "ހޯމް ގާޑަން" އަށް އިސްކަން ދިނުމަށް ހާއްސަ ސަބްސިޑީތަކެއް ދެއްވާނެ ކަމަށް ފިނޭންސް މިނިސްޓަރު ބެސިލް ރާޖަޕަކްސަ ވިދާޅުވި އެވެ.
"އަޅުގަނޑުމެން ބޭނުން ވަނީ މި އަހަރު ގެތަކުގައި ދަނޑު ހައްދައިގެން ކުރި ހޯދަން. ބޭނުމަކީ ކޮންމެ ގެޔަކަށް ވެސް ބޭނުންވާ ކާތަކެތި އެ ގެޔެއްގައި ހެއްދުން."
ރިލީފް ޕެކޭޖުގެ ގޮތުގައި އިއުލާނު ކުރި 1.14 ބިލިއަން ޑޮލަރު ހޯދާނެ ގޮތް ހާމަކޮށްފައެއް ނުވެ އެވެ.
މިދިޔަ އަހަރު އެގްރޯކެމިކަލް އުފެއްދުންތައް އެތެރެ ކުރުން މަނާ ކުރުމުން ދަނޑުތައް ހަލާކުވެ ކާބޯތަކެތީގެ އަގުތައް އިތުރަށް އުފުލުމަށް ވަނީ މަގުފަހިވެފަ އެވެ.
އެ ސިޔާސަތު އުވާލައި، ދަނޑުތަކަށް ބޭނުންވާ ކެމިކަލް އެތެރެ ކުރަން ހުއްދަ ދިނީ ދަނޑުވެރިން މުޒާހަރާ ކުރުމުންނެވެ. އެ ސިޔާސަތާ ހެދި ވެރިކަން ކުރާ ކޯލިޝަން ތެރޭގައި ވަނީ ދެބަސްވުން އުފެދިފަ އެވެ.
އެގޮތުން އެ ސިޔާސަތަށް ފާޑުވިދާޅުވި މިނިސްޓަރަކު މަގާމުން ވަކިކުރަން ރައީސް ގޮަތަބަޔަ ރާޖަޕަކްސަ އަންގާރަ ދުވަހު އަމުރު ކުރެއްވި އެވެ. އޭގެ އިތުރުން ދަނޑުވެރިކަމާ ބެހޭ މިނިސްޓަރު މަގާމުން ވަކިކުރުމަށް ވެސް ވަނީ ގޮވާލައްވާފަ އެވެ.
ލަންކާ އަށް ކާބޯތަކެތީގެ ދަތިކަމެއް ކުރިމަތިވެދާނެ ކަމަށާއި ސަރުކާރުން ތަކެތި ރޭޝަން ކުރަން ޖެހޭނެ ކަމަށް މިދިޔަ މަހު އިންޒާރު ދިން ދަނޑުވެރިކަމާ ބެހޭ އިސް އޮފިޝަލަކު ވަނީ އެހެން ވިދާޅުވިތާ ކުޑައިރުކޮޅެއްގެ ތެރޭގައި މަގާމުން ވަކިކޮށްފަ އެވެ.
