ރޭގެ ވަގުތެއްގައި ވ. ފުއްސަރު ކައިރިން ގެއްލުނު "އަލަމާ 5" ދޯނިން އޮޔާދިޔަ ތަކެއް ކަމަށް ބެލެވޭ ބައެއް ތަކެތި އެމްއެންޑީއެފްއިން ހޯދައިފި އެވެ.
"އަލަމާ 5" ގެއްލުނު ކަމަށް އެމްއެންޑީއެފްއަށް މައުލޫމާތު ލިބިފައިވަނީ ރޭގެ 23:22 ގައެވެ. އޭރުއްސުރެ އެމްއެންޑީއެފްއިން ދަނީ އެ ދޯންޏާއި އެ ދޯނީގައި ދަތުރުކުރަމުންދިޔަ ތިން ފަޅުވެރިން ހޯދުމުގެ މަސައްކަތް ކުރަމުންނެވެ.
ނަމަވެސް, މިހާތަނަށް އެމީހުން އަދި ދޯނި ވެސް ފެނިފައިނުވެ އެވެ.
ގެއްލުނު ދޯނިން އޮޔާދިޔަ ކަމަށް ބެލެވޭ ބައެއް ތަކެތި ފެނިފައިވަނީ މިއަދު މެންދުރުގެ ވަގުތެއްގައި ފ. އަތޮޅުގެ އުތުރުން އެއް ނޯޓިކަލް ކިލޯމީޓަރު ބޭރުން ކަމަށް އެމްއެންޑީއެފްއިން މައުލޫމާތު ދިނެވެ.
އަލަމާ 5 ކުއްޔަށް ނަގައިގެން އުޅޭ ހަސަން ފައުޒީ މި ނޫހަށް މައުލޫމާތު ދެމުން ބުނެފައިވާ ގޮތުގައި މި ދޯނީގައި 500 ރަތް އަދި ނޫފޮށި ހުންނާނެ އެވެ. މި ފޮށިތަކަކީ އެމީހުން ފާނަ އެޅުމަށް ބޭނުންކުރި ފޮށިތަކެއް ކަމަށް އޭނާ މައުލޫމާތުދިނެވެ. އެހެންކަމުން އެމްއެންޑީއެފްއަށް ފެނިފައިވާ ފޮށިތަކަކީ މި ދޯނިން އޮޔާދިޔަ ފޮށިތަކެއް ކަމަށް ވުން އެކަށީގެންވާކަމަށް އޭނާ ބުންޏެވެ.
މި ދޯންޏަކީ ފ. ފީއަލީ ކައިރިން ފާނަ މަސްވެރިކަމުގައި އުޅޭ ދޯނިފަހަރުން ފާނަ ގަނެގެން މާލެގެނައުމުގެ މަސައްކަތް ކުރުމަށް ބޭނުންކުރަމުންދިޔަ ދޯންޏެކެވެ.
އެ ދޯނި އަޑިއަށް ދިޔައީ ކަނޑުގަދަވުމުގެ ސަބަބުން ކަމެއް ނޫނީ އެހެން މައްސަލައެއް ދިމާވެގެން ކަމެއްވެސް އަދި ހޯދިފައިނުވާކަމަށް ހަސަން ފައުޖީ މައުލޫމާތުދިނެވެ.
ގެއްލިގެން ހޯދަމުންދާ ދ. މީދޫއަށް ނިސްބަތްވާ 65 ފޫޓުގެ އަލަމާ-5 ދޯނި ގެއްލުނު އިރު އޭގައި ތިބީ ދިވެހި ކައްޕިއަކާއި ބަންގްލަދޭޝްގެ ދެ ފަޅުވެރިއެކެވެ.
