އިންޑިއާގެ ހިންދޫ ފައްޅިއެއްގައި ފިތިބާރުވެގެން 12 މީހުން މަރުވެ، ގިނަ ބަޔަކަށް އަނިޔާވެއްޖެ އެވެ.
ފުލުހުން ބުނީ އެ ހާދިސާ ހިނގީ އިންޑިއާ އިން ކޮންޓްރޯލް ކުރާ ކަޝްމީރުގައި މާތާ ވައިޝްނޯ ދޭވީ ފައްޅި އަށް ޖަމާވި މީހުންގެ މެދުގައި އުފެދުނު ހިޔާލު ތަފާތުވުމެއްގެ ތެރެއިން ކަމަށެވެ.
ބޮޑު ވަޒީރު ނަރެންދްރަ މޯދީ ވިދާޅުވީ ބަޔެއްގެ ފުރާނަ ގެއްލުމުން "ހިތާމަކުރާ" ކަމަށެވެ.
އެ ހާދިސާ ހިނގި ފައްޅިއަށް ކޮންމެ ދުވަހަކު ވެސް އެތައް ހާސް ބަޔަކު ޒިޔާރަތް ކުރެ އެވެ. ނަމަވެސް އާ އަހަރުގެ ޗުއްޓީއާ ދިމާވުމުން ކުރިއަށް ވުރެ ގިނަ ބަޔަކު ދިޔަ ކަމަށް ވެ އެވެ.
ބަލިމަޑުކަމާ ހެދި އެ ފައްޅިއަށް ދުވާލަކު ޒިޔާރަތް ކުރެވޭނީ 25،000 މީހުން ކަމަށް ކަނޑައަޅާފައި ވެ އެވެ. ނަމަވެސް އާ އަހަރާ ދިމާކޮށް އޭގެ ދެ ގުނަ މީހުން އެ ތަނަށް ޖަމާވި އެވެ.
ހޮނިހިރު ދުވަހުގެ ހެނދުނު ފިތިބާރުވެގެން 12 މީހުން މަރުވި އިރު، 16 މީހަކަށް އަނިޔާވި އެވެ. އެ ހާދިސާ ހިނގި ގޮތުގެ ތަހުގީގެއް މިހާރު ވަނީ ފަށާފަ އެވެ.
އިންޑިއާގެ ދީނީ އެއްވުންތަކުގައި ވަރަށް ގިނައިން ފިތިބާރުވުމުގެ ހާދިސާތައް ހިނގަ އެވެ. އެފަދަ އެއްވުންތަކުގެ އެކަށީގެންވާ ރައްކާތެރިކަމުގެ ފިޔަވަޅުތައް އާއްމު ގޮތެއްގައި ނާޅަ އެވެ.
