މި ފެށުނު އާ އަހަރު އުތުރު ކޮރެއާ އިން އެންމެ ބޮޑު އިސްކަމެއް ދޭނީ އިގްތިސާދަށް ކަމަށާއި ގައުމަށް ދިމާވެފައި ވަނީ "މަަރާއި ދިރިހުރުމާ ގުޅިފައިވާ ގޮންޖެހުމެއް" ކަމަށް ލީޑަރު ކިމް ޖޮންގް އުން ވިދާޅުވެއްޖެ އެވެ.
ވެރިކަން ކުރާ ކޮމިއުނިސްޓް ޕާޓީގެ މުހިއްމު ބައްދަލުވުމެއްގައި ވާހަކަދައްކަވަމުން ކިމް އެހެން ވިދާޅުވި އިރު، އެމަނިކުފާނު ވެރިކަން ކުރައްވާތާ މިހާރު ވަނީ 10 އަހަރު ފުރިފަ އެވެ.
ކޮވިޑާ ގުޅިގެން އުތުރު ކޮރެއާ އިން ބޯޑަރުތައް ބަންދުކޮށް، ކުރިއަށް ވުރެ ވެސް ބޮޑަށް ދުނިޔެއާ އެކަހެރިވެފައި ވާތީ އެ ގައުމަށް ވަނީ ކާބޯތަކެތީގެ ދަތިކަމާ ކުރިމަތިވެފަ އެވެ.
ކޮމިއުނިސްޓް ޕާޓީ ބައްދަލުވުމުގައި ކިމް ދެއްކެވި ވާހަކަފުޅުގައި އެމެރިކާ އާއި ދެކުނު ކޮރެއާއާ ގުޅޭ ގޮތުން ސީދާ އެއްވެސް އެއްޗެއް ވިދާޅެއް ނުވެ އެވެ.
ކިމް ވިދާޅުވީ 2022 ވަނަ އަހަރުގެ މައިގަނޑު މަސައްކަތަކީ ތަރައްގީ އިތުރުކޮށް، ރައްޔިތުންގެ ދިރިއުޅުމުގެ ފެންވަރު މަތި ކުރުން ކަމަށެވެ.
އެގޮތުން 2021 ވަނަ އަހަރު ކުރިމަތިވީ "އުނދަގޫ ހާލަތެއް" ކަމަށާއި "ކާބޯތަކެއްވާއި، އަންނައުނު އަދި ބޯހިޔާވަހިކަމާ ގުޅިފައިވާ މައްސަލަ" ހައްލު ކުރަން އިންގިލާބީ ބަދަލު ގެންނަން ޖެހޭ ކަމަށް ވިދާޅުވި އެވެ.
އޭގެ އިތުރުން ބަލިމަޑުކަމާ ދެކޮޅަށް ހަނގުރާމަ ކުރުމަކީ ބޮޑު ލަނޑުދަނޑިއެއް ކަމަށާއި އެއާ އެކު ގައުމުގެ ދިފާއީ ބާރު ވެސް ވަރުގަދަ ކުރަމުން ދާނެ ކަމަށް ކިމް ވިދާޅުވި އެވެ.
މީގެ ކުރިން ކިމް ދެއްވާފައިވާ އާ އަހަރުގެ ހިތާބުތަކުގައި ދެކުނު ކޮރެއާ އާއި އެމެރިކާގެ ވާހަކަ ފާހަގަކުރައްވަ އެވެ. ނަމަވެސް މި ފަހަރު އެ ދެ ގައުމާ ގުޅޭ ވާހަކައެއް ވިދާޅުވެފައެއް ނުވެ އެވެ.
މިދިޔަ އަހަރުގެ ފަހުކޮޅު ދެ ކޮރެއާ އާއި އެމެރިކާ އަދި ޗައިނާ އިން ވަނީ ކޮރެއާ ހަނގުރާމަ ރަސްމީކޮށް ނިމިފައިވާކަން އިއުލާނު ކުރަން އެއްބަސްވެފަ އެވެ.
ނަމަވެސް އެކަން އިއުލާނު ކުރުމާ ގުޅޭ މަޝްވަރާތައް އަދިވެސް ނުފެށެ އެވެ. ދެކުނު ކޮރެއާ އިން ބުނީ މަޝްވަރާ ލަސްވަނީ އުތުރު ކޮރެއާގެ ޑިމާންޑުތަކާ ހެދި ކަމަށެވެ.
