ކޮވިޑް ވެކްސިންގެ ތިން ޑޯޒް ނުޖަހާ ނަމަ ޔުނައިޓެޑް އަރަބް އެމިރޭޓްސް (ޔޫއޭއީ) ގެ ރައްޔިތުންނަށް ގައުމުން ނުފުރޭނެ ކަމަށް އަންގައިފި އެވެ.
އެ ނިންމުމަށް އަމަލު ކުރަން ފަށާނީ ޖެނުއަރީ 10 ވަނަ ދުވަހުން ފެށިގެންނެވެ. ކޮވިޑް ވެކްސިންގެ ތިން ޑޯޒް ޖެހުން މަޖުބޫރު ވަނީ ހަމައެކަނި ސިއްހީ ގޮތުން ޝަރުތު ހަމަވާ މީހުންނެވެ.
ކޮވިޑް ކޭސްތައް އިތުރު ވާން ފެށުމާ އެކު ޔޫއޭއީގެ އިތުރުން އެހެން ގައުމުތަކުން ވެސް ވަނީ ފިޔަވަޅުތަކެއް އަޅާފަ އެވެ. ގިނަ ގައުމުތަކުން ވެކްސިން ނުޖަހާ މީހުންނާ މެދު އަމަލު ކުރާ ގޮތް ވަނީ ހަރުކަށިކޮށްފަ އެވެ.
ޔޫއޭއީގެ އާބާދީގެ 90 ޕަސެންޓަށް ވުރެ ގިނަ މީހުން ވަނީ ކޮވިޑް ވެކްސިން ފުރިހަމަކޮށްފަ އެވެ. ވެކްސިންގެ ތިން ވަނަ ޑޯޒް ނުވަތަ ބޫސްޓާ ޝޮޓު ޖަހާފައި ވަނީ 34 ޕަސެންޓު މީހުންނެވެ.
ދިރާސާތަކުން ދައްކާ ގޮތުގައި ބޫސްޓާ ޝޮޓެއް ޖެހުމުން ބައްޔާ ދެކޮޅަށް ލިބޭ ރައްކާތެރިކަން ބޮޑުވެ އެވެ. އެގޮތުން މިހާރު އެންމެ ހަލުވިކޮށް ފެތުރޭ އޮމިކްރޯން ވޭރިއެންޓުން ރައްކާތެރިވެވެނީ ތިން ވަނަ ޑޯޒެއް ޖަހައިގެންނެވެ.
އެމިރޭޓްސް ނިއުސް އެޖެންސީން ބުނީ އުސޫލު ހަރުކަށިކޮށްފައި ވަނީ "އާއްމު ސިއްހަތާއި ރައްކާތެރިކަމަށް އިސްކަށް ދިނުމުގެ" ބޭނުމުގައި ކަމަށެވެ.
ޔޫއޭއީގެ އާބާދީގެ ބޮޑު ބަޔަކީ ބޭރު މަސައްކަތްތެރިންނެވެ. ނަމަވެސް އަލަށް ހެދި އުސޫލު ހިނގާނީ ހަމައެކަނި ޔޫއޭއީގެ ރައްޔިތުންނަށެވެ.
ކޮވިޑް ބަލިމަޑުކަމުގައި ޔޫއޭއީ އިން މިހާތަނަށް 750،000 އަށް ވުރެ ގިނަ ކޭސް ރިޕޯޓުކޮށްފައި ވާއިރު، 2،000 އަށް ވުރެ ގިނަ މީހުން މަރުވެފައި ވެ އެވެ.
