ޕެރިސް، ފްރާންސް (ޑިސެމްބަރު 30) - އޮމިކްރޯން ވޭރިއެންޓާއެކު އުފެދިފައިވާ ކޮވިޑް ކޭސްތަކުގެ ސުނާމީގެ ސަބަބުން ގައުމުތަކުގެ ސިއްހީ ނިޒާމު ހުއްޓުމަކަށް އައުމުގެ އިންޒާރު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)އިން ދީފި އެވެ.
ހަލުވިކަމާއެކު ފެތުރޭ އޮމިކްރޯން ވޭރިއެންޓާ ހެދި އެމެރިކާ، ފްރާންސް އަދި ޑެންމާކްގައި ބުދަ ދުވަހު ރިކޯޑް އަދަދަށް ކޭސްތައް ރިޕޯޓުކުރި އެވެ. އޭއެފްޕީ އިން ބުނި ގޮތުގައި އެއް ހަތުފާ ތެރޭ 6.55 މިލިއަން ކޭސް ރިޕޯޓުކޮށް، މުޅިން އާ ރިކޯޑެއް ގާއިމްވެފައިވާ ކަމަށެވެ.
މިއީ މާޗް 2020 ވަނަ އަހަރު ބަލިމަޑުކަމެއް ފެށިފައިވާ ކަމަށް ޑަބްލިއުއެޗްއޯއިން އިއުލާނު ކުރި ފަހުން އެއް ހަފުތާގައި އެންމެ ގިނަ ކޭސް ރިޕޯޓު ކުރި ފަހަރެވެ. ކްރިސްމަސް އާއި އާ އަހަރުގެ ޗުއްޓީއާ ދިމާކޮށް، ހަލުވިކަމާއެކު ފެތުރޭ ވޭރިއެންޓުގެ ސަބަބުން ކޭސްތައް އަދިވެސް މަތިވާނެ ކަމަށް ބެލެވެ އެވެ.
"ޑެލްޓާ ވެސް ފެތުރެމުންދާ މި ދަނޑިވަޅުގައި އެއަށްވުރެ ހަލުވިކޮށް ފެތުރޭ އޮމިކްރޯންއާ ހެދި ކޭސްތަކުގެ ސުނާމީއެއް އުފެދެމުންދާތީ އަޅުގަނޑު ވަރަށް ކަންބޮޑުވޭ،" ޑަބްލިއުއެޗްއޯގެ ޗީފް ޓެޑްރޯސް އަދަނޮމް ވިދާޅުވި އެވެ.
"މީގެ ސަބަބުން އެންމެ ޕްރެޝަރު ބޮޑު ވާނީ މިހާރު ވެސް ވަރުބަލިވެފައި ތިބި ސިއްހީ މަސައްކަތްތެރިންނާއި ހުއްޓެން ކައިރިވެފައިވާ ސިއްހީ ނިޒާމުތަކަށް."
މި ވަގުތު ކޮވިޑްގެ ހާލަތު އެންމެ ގޯސްކޮށް އޮތީ ޔޫރަޕްގަ އެވެ. އިނގިރޭސިވިލާތުގައި މިދިޔަ މާޗް މަހަށް ފަހު އަނެއްކާވެސް އެއް ފަހަރާ 10،000 ކޮވިޑް ބަލި މީހުންނަށް ދަނީ ހޮސްޕިޓަލްތަކުގައި ފަރުވާދެމުންނެވެ.
އެމެރިކާގެ ހޮސްޕިޓަލްތަކަށް ވެސް ބާރުބޮޑުވެފައި ވާއިރު، ޖޯން ހޮޕްކިންސް ޔުނިވާސިޓީން ބުނީ ދުވާލެއްގެ މައްޗަށް ރިކޯޑް އަދަދަށް ކޭސްތައް ފެންނަމުންދާ ކަމަށެވެ.
ފްރާންސްގައި ވެސް އެއް ދުވަސް ތެރޭ ރިކޯޑް އަދަދަކަށް 200،000 އަށް ވުރެ ގިނަ ކޭސް ވަނީ ފެނިފަ އެވެ. މިއީ ކްރިސްމަސް ދުވަހާ އަޅާ ބަލާއިރު ދެ ގުނަ އިތުރެވެ.
މި ވަގުތު އާބާދީގެ ނިސްބަތުން ބަލި އެންމެ ހަލުވިކޮށް ފެތުރެނީ ޑެންމާކްގަ އެވެ. އެ ގައުމުން ދަނީ ދުވާލަކު 23،000 އަށް ވުރެ ގިނަ ކޭސް ފެންނަމުންނެވެ.
ޕޯޗުގަލްގައި ވެސް 24 ގަޑިއިރު ތެރޭ ރިކޯޑް އަދަދަކަށް 27،000 އަށް ވުރެ ގިނަ ކޭސް ފެނިފައި ވެ އެވެ. ދިރާސާތަކުން ދައްކާ ގޮތުގައި ބައެއް ގައުމުތަކުގައި މިހާރު އެންމެ ފުޅާކޮށް ފެތުރިފައި ވަނީ އޮމިކްރޯން ވޭރިއެންޓެވެ.
މިހާތަނަށް ކޮވިޑް ޖެހިގެން 5.4 މިލިއަން މީހުން މުޅި ދުނިޔެއިން މަރުވެފައި ވާއިރު، މިދިޔަ ހަފުތާގައި އެވްރެޖުކޮށް ދުވާލަކު މަރުވީ 6،450 މީހުންނެވެ. މިއީ 2020 ވަނަ އަހަރުގެ އޮކްޓޯބަރު މަހުގެ ފަހުން އަދަދުތައް މިހާ ދަށްވި ފުރަތަމަ ފަހަރެވެ.
