ކުރިއަށް އޮތް މަސްތަކުގައި ކާބޯތަކެތީގެ ދަތިކަމެއް ކުރިމަތިވެދާނެ ކަމަށް ބަލައި ސްރީލަންކާގެ ސަރުކާރުން ތައްޔާރީތައްވާން ފަށައިފި އެވެ.
އެގޮތުން ސަރުކާރުން ރާވާފައި ވަނީ ކޮންމެ މަހަކު ވެސް ކާބޯތަކެތީގެ ޒަރޫރީ ބާވަތްތައް ކަމުގައިވާ ހަނޑޫ، ހަކުރު، މިރުސް، މުގު އަދި ފުށް އިމްޕޯޓް ކުރަން މަރުކަޒީ ބޭންކުން 100-150 މިލިއަން ޑޮލަރު ރައްކާކޮށްފައި ބެހެއްޓުމަށެވެ.
ސްރީލަންކާގެ ދަނޑުތަކަށް ބޭނުންވާ ފާޓިލައިޒާ ލިބުން ދަތިވެ، ކާބޯތަކެތީގެ ދަތިކަމާ ކުރިމަތިވެދާނެ ކަމަށް މީގެ ކުރިން ތަޖުރިބާކާރުން ލަފާދީފައި ވެ އެވެ. ހަނޑުލާއި ތަރުކާރީ ފަދަ ކާބޯތަކެތީގެ އަގު މިހާރު ދަނީ ހިފެހެއްޓުމެއް ނެތި އުފުލެމުންނެވެ.
ޓްރޭޑް މިނިސްޓަރު ބަންޑުލަ ގުނަވަރްދަނެ ޑެއިލީ މިރާ ނޫހަށް ވިދާޅުވީ މިހާރު ވެސް މިޔަންމާ އިން ހަނޑޫ ސްޓޮކެއް ގެންނަން އޯޑަރު ދީފައިވާ ކަމަށާއި ލަންކާ އާއި މިޔަންމާ ސަރުކާރުން ވިޔަފާރީގެ އެއްބަސްވުމަކަށް އައިސްފައިވާ ކަމަށެވެ.
އެހެނިހެން ބައެއް ކާބޯތަކެތި އިމްޕޯޓު ކުރާނީ ޕްރައިވެޓް ސެކްޓާގެ ފަރާތްތައް މެދުވެރިކޮށް އިންޑިއާއިން ކަމަށް އޭނާ ވިދާޅުވި އެވެ.
އަންނަ މަހު ޓްރޭޑް މިނިސްޓަރު އިސްވެ ހުންނަވާ، ލަންކާގެ ވިޔަފާރި ވަފުދެއް ޕާކިސްތާނަށް ޒިޔާރަތް ކުރާނެ އެވެ. ދަތުރުގެ މަގުސަދަކީ ލަންކާ އާއި ޕާކިސްތާނާ ދެމެދުގައިވާ ފްރީ ޓްރޭޑް އެއްބަސްވުމުގެ ދަށުން ހާއްސަ ގޮތްތަކެއް ހަމަޖައްސައި، ވިޔަފާރި ކުރުމެވެ.
"އެފްޓީއޭގެ ދަށުން ޕާކިސްތާނުން ބާސްމަތީ ހަނޑޫ އިމްޕޯޓް ކުރުމާ ގުޅޭ މަޝްވަރާތައް އަޅުގަނޑު ކުރާނަން. ގައުމަށް ކުރިމަތިވެދާނެ ކާބޯތަކެތީގެ ދަތިކަން ހައްލު ކުރުމުގެ މަސައްކަތުގައި އިސްކޮށް އުޅުމަށް ރައީސް ވަނީ އަޅުގަނޑަށް އަމުރު ކުރައްވާފައި،" ޓްރޭޑް މިނިސްޓަރު ވިދާޅުވި އެވެ.
އޭނާ ވިދާޅުވީ ކުރު މުއްދަތެއްގެ ތެރޭގައި އަވަހަށް ތަރުކާރީގެ ބާވާތްތައް ހޯދަން "ބެކްޔާޑް ކަލްޓިވޭޝަން" ނުވަތަ ވަކިވަކި ގެތަކުގައި ތަކެތި އިންދުމުގެ މަސައްކަތް ކުރަން ސަރުކާރަށް ހުށަހަޅާފައި ވާނެ ކަމަށެވެ.
ކާބޯތަކެތީގެ ދަތިކަން ކުރިމަތިވެދާނެ ކަމަށް ބަލައި ސަރުކާރުން ފިޔަވަޅު އަޅަން ފަށާފައި ވާއިރު، އެސެންޝަލް ފުޑް ކޮމޯޑިޓީޒް އިމްޕޯޓާޒް އެންޑް ޓްރޭޑާޒް އެސޯސިއޭޝަނުން ބުނީ މައްސަލަ ދިމާވަނީ ޑޮލަރު ނުލިބޭތީ ކަމަށެވެ.
އެގޮތުން މިހާރު ވެސް ޒަރޫރީ ކާބޯތަކެތި ހުރި 1000 އަށް ވުރެ ގިނަ ކޮންޓެއިނަރު ބަނދަރުގައި ތާށިވެފައިވާ ކަމަށާއި އެ ތަކެއްޗަށް ދައްކަން ޖެހޭ ޑޮލަރު ނުލިބޭ ކަމަށް އެ ޖަމިއްޔާގެ ރައީސް ޖީ ރަޖެންދްރަން ވިދާޅުވި އެވެ.
"މި މައްސަލަ ވަރަށް ބޮޑު. ލައިސެންސް އޮތް ބޭންކުތަކުން އަޅުގަނޑުމެން ބޭނުންވާ މިންވަރަށް ޑޮލަރު ދުލެއް ނުކުރޭ."
ބަލިމަޑުކަމުގެ ސަބަބުން ފަތުރުވެރިކަން ހުއްޓު ސްރީލަންކާގެ އިގްތިސާދަށް ބޮޑެތި ލޮޅުންތައް އެރި އެވެ. ބޭރު ފައިސާގެ ރިޒާވް މަދުވަމުން ދާތީ 2020 ވަނަ އަހަރުގެ މާޗް މަހުން ފެށިގެން މުދާ އިމްޕޯޓް ކުރުމުގައި ވެސް ވަނީ ހަރުކަށި ފިޔަވަޅުތަކެއް އަޅާފަ އެވެ.
އޭގެ ސަބަބުން ތެލާއި، ހަކުރު ފަދަ ބައެއް ޒަރޫރީ ތަކެތި ލިބުން ދަތިވެ، ރޭޝަން ކުރަން ޖެހުނެވެ. ނޮވެމްބަރު މަސް ނިމުނު އިރު ބޭރު ފައިސާގެ ރިޒާވްގައި ހުރި ދެ ބިލިއަން ޑޮލަރަކީ އެންމެ މަހެއްގެ އިމްޕޯޓަށް ބޭނުންވާ މިންވަރުގެ ފައިސާ އެވެ.
ޑޮލަރުގެ ދަތިކަމާ ހެދި ނޮވެމްބަރު މަހުގެ މެދު ތެރޭގައި ސްރީލަންކާގެ ހަމައެކަނި ތެޔޮ ކާރުހާނާ ވެސް ބަންދުކުރި އެވެ.
މުދާ އެކްސްޕޯޓް ކުރާ މީހުންގެ އާމްދަނީ ރުޕީޒް އަށް ބަދަލުކުރަން މަޖުބޫރު ކުރަމުން ދާއިރު، ބޭރު މަސައްކަތްތެރިންނަށް ވެސް އަންގަމުން ދަނީ ސެންޓްރަލް ބޭންކުގެ ނިޒާމުގެ ތެރެއިން ފައިސާ ފޮނުވުމަށެވެ. ރަސްމީކޮށް ޑޮލަރަކަށް ޖެހޭ އަގަކީ 200 ރުޕީޒް ކަމަށް ވަނީ ކަނޑައަޅާފަ އެވެ.
