ކޮލޮމްބޯ، ސްރީލަންކާ (ޑިސެމްބަރު 28) - ސްރީލަންކާގެ ބޭރު ފައިސާގެ ރިޒާވް މާ ބޮޑަށް ދަށްވެފައިވާ މައްސަލައިގައި ތިން ގައުމެއްގައި ހުންނަ އެ ގައުމުގެ ޑިޕްލޮމެޓިކް މިޝަންތައް ބަންދު ކުރަން ނިންމައިފި އެވެ.
ފޮރިން މިނިސްޓްރީން ބުނީ ނައިޖީރިއާގެ އަބޫޖާގައި ހުންނަ ހައި ކޮމިޝަނާއި، ޖަރުމަނުގެ ފްރެންކްފާޓްގައި ހުންނަ ކޮންސިއުލޭޓް ޖެނެރަލާއި، ސައިޕްރަސްގެ ނިކޯސިއާގައި ހުންނަ ކޮންސިއުލޭޓް ޖެނެރަލް ޑިސެމްބަރު 31 ވަނަ ދުވަހުން ފެށިގެން ބަންދު ވާނެ ކަމަށެވެ.
"މި ބަދަލު ގެނެސްފައި ވަނީ ބޭރު ފައިސާގެ ރިޒާވް ރައްކާތެރި ކުރުމަށާއި ބޭރު ގައުމުތަކުގައި ހުންނަ ލަންކާގެ މިޝަންތަކަށް ކުރާ ހޭދަ މަދުކުރުމުގެ ބޭނުމުގައި،" ފޮރިން މިނިސްޓްރީގެ ބަޔާނެއްގައި ބުންޏެވެ.
ބަލިމަޑުކަމުގެ ސަބަބުން ފަތުރުވެރިކަން ހުއްޓު ސްރީލަންކާގެ އިގްތިސާދަށް ބޮޑެތި ލޮޅުންތައް އެރި އެވެ. ބޭރު ފައިސާގެ ރިޒާވް މަދުވަމުން ދާތީ 2020 ވަނަ އަހަރުގެ މާޗް މަހުން ފެށިގެން މުދާ އިމްޕޯޓް ކުރުމުގައި ވެސް ވަނީ ހަރުކަށި ފިޔަވަޅުތަކެއް އަޅާފަ އެވެ.
އޭގެ ސަބަބުން ތެލާއި، ހަކުރު ފަދަ ބައެއް ޒަރޫރީ ތަކެތި ލިބުން ދަތިވެ، ރޭޝަން ކުރަން ޖެހުނެވެ. ނޮވެމްބަރު މަސް ނިމުނު އިރު ބޭރު ފައިސާގެ ރިޒާވްގައި ހުރި ދެ ބިލިއަން ޑޮލަރަކީ އެންމެ މަހެއްގެ އިމްޕޯޓަށް ބޭނުންވާ މިންވަރުގެ ފައިސާ އެވެ.
ޑޮލަރުގެ ދަތިކަމާ ހެދި ނޮވެމްބަރު މަހުގެ މެދު ތެރޭގައި ސްރީލަންކާގެ ހަމައެކަނި ތެޔޮ ކާރުހާނާ ވެސް ބަންދުކުރި އެވެ.
މުދާ އެކްސްޕޯޓް ކުރާ މީހުންގެ އާމްދަނީ ރުޕީޒް އަށް ބަދަލުކުރަން މަޖުބޫރު ކުރަމުން ދާއިރު، ބޭރު މަސައްކަތްތެރިންނަށް ވެސް އަންގަމުން ދަނީ ސެންޓްރަލް ބޭންކުގެ ނިޒާމުގެ ތެރެއިން ފައިސާ ފޮނުވުމަށެވެ. ރަސްމީކޮށް ޑޮލަރަކަށް ޖެހޭ އަގަކީ 200 ރުޕީޒް ކަމަށް ވަނީ ކަނޑައަޅާފަ އެވެ.
