ދާކާ، ބަންގްލަދޭޝް (ޑިސެމްބަރު 27) - ބަންގްލަދޭޝްގައި ތޮއްޖެހިފައި އޮތް ފެރީއެއްގައި ހިނގި އަލިފާނުގެ ހާދިސާއެއްގައި 39 މީހުން މަރުވުމާ އެކު ފެރީގެ ވެރިޔާ ހައްޔަރުކޮށްފި އެވެ.
ފެރީގައި އަލިފާން ރޯވީ ހުކުރު ދުވަހުގެ ދަންވަރު 700 ޕަސެންޖަރުން ނިދާފައި ތިއްބަ އެވެ. އޭރު ފެރީ އޮތީ ދެކުނު ބަރްގުނާ ޑިސްޓްރިކްޓް ކައިރީގަ އެވެ.
ސަލާމަތްވި ގިނަ ބަޔަކު ވަނީ ވަނީ ފެރީގެ ތިން ވަނަ ފަންގިފިލާއިން ސުގަންދަ ކޯރަށް ފުންމާލި ގޮތުގެ ވާހަކަތައް ކިޔައިދީފަ އެވެ. ފެރީ އަކީ 420 ޕަސެންޖަރުންގެ ކެޕޭސިޓީ އޮތް ފެރީ އެކެވެ.
ގިނަ ބަޔަކު މަރުވީ އަލިފާންގަނޑުގައި ތާށިވެ ފިހިގެންނެވެ. ނަމަވެސް ފެރީ އިން ފުންމާލައި ސަލާމަތް ވާން އުޅުމުގެ ތެރޭގައި ގެނބިގެން ވެސް ވަރަށް ގިނަ މީހުން މަރުވި އެވެ.
ފުލުހުންގެ ތަރުޖަމާނު ހޯމަ ދުވަހު ވިދާޅުވީ ފެރީގެ ވެރިޔާ ހުމް ޖަލާލް ޝެއިހް ހައްޔަރުކޮށްފައިވާ ކަމަށެވެ. ކޯޓުން ވަނީ ފެރީގެ ކެޕްޓަނާއި "އޮބިޖާން-10" ބޯޓުގެ ކްރޫ ހިމެނޭ ގޮތަށް އަށް މީހުން ހައްޔަރު ކުރަން އަމުރެއް ނެރިފަ އެވެ.
މެރިން ފުލުހުންގެ އޮފިސަރު މަހްބޫބުއްރަހްމާން ވިދާޅުވީ ފެރީގައި އަލިފާން ނިއްވާ ފުޅި ނެތް ކަމަށާއި އެކްސިޑެންޓަކަށް ތައްޔާރު ވާން ބޭނުންވާ އެއްވެސް އެއްޗެއް ނެތް ކަމަށެވެ.
"ސަލާމަތްވި މީހުންނާ އަޅުގަނޑުމެން ވާހަކަދެއްކިން. އެނގުނު ގޮތުގައި ފެރީގެ އިންޖީން ކޮޓަރީގައި ރޯވިތާ ގަޑިއިރެއްވީ އިރު ވެސް ކެޕްޓަން ގެންދިޔައީ ހަމަ ބޯޓު ދުއްވަމުން،" އޭނާ އޭއެފްޕީ އަށް ވިދާޅުވި އެވެ.
"އެ މީހުން ވަގުތުން ފެރީ ދުއްވުން ހުއްޓާލި ނަމަ، ގިނަ ބަޔެއްގެ އަގުހުރި ފުރާނަ ސަލާމަތް ކުރެވުނީސް."
ބަންގްލަދޭޝްގައި ކަނޑާއި ކޯރުގައި ގިނަ ހާދިސާތައް ހިނގަ އެވެ. އެއީ ބޯޓުތައް ރަނގަޅަށް މެއިންޓެއިން ނުކުރުމާއި، ސަލާމަތީ ފިޔަވަޅުތަކަށް އަމަލު ނުކުރުމާއި، މާ ގިނަ މީހުން އަރުވައިގެން ދަތުރު ކުރުން ފަދަ ސަބަބުތަކާ ހެދި އެވެ.
މިދިޔަ އޯގަސްޓު މަހު ފުރިފައިވާ ބޯޓަކާއި މުދާ އުފުލާ މަނަވަރެއް ޖެހި ހިނގި އެކްސިޑެންޓެއްގައި 21 މީހުން މަރުވި އެވެ.
