ކޮލޮމްބޯ، ސްރީލަންކާ (ޑިސެމްބަރު 27) - ސްރީލަންކާ މީހަކާ ކައިވެނި ކުރަން ބޭނުންވާ އެހެން ގައުމުތަކުގެ ރައްޔިތުން ޖެނުއަރީ އެއް ވަނަ ދުވަހުން ފެށިގެން ޑިފެންސް މިނިސްޓްރީން ސެކިއުރިޓީ ކްލިއަރެންސް ހޯދަން ޖެހޭ ގޮތަށް ހަދައިފި އެވެ.
އަލަށް ހެދި ގަވާއިދުގެ ދަށުން ކައިވެނީގެ ކުރިން ބޭރު ރައްޔިތުން ސެކިއުރިޓީ އަދި ސިއްހީ ކްލިއަރެންސް ހޯދަން ޖެހެ އެވެ. ރެޖިސްޓްރާ ޖެނެރަލް ޑަބްލިއުއެމް ވީރަސެކަރަ ވިދާޅުވީ އެއީ "ގައުމީ ސަލާމަތާ" ގުޅިފައިވާ ކަންބޮޑުވުންތަކާ ހެދި އުފެއްދި ގަވާއިދެއް ކަމަށެވެ.
"އަޅުގަނޑުމެންނަށް ފެނިފައި އެބަ ހުރި ނުބައި ނިޔަތްތަކުގައި ސްރީލަންކާ ރައްޔިތުންނާ ބޭރު މީހުން ކައިވެނި ކުރާ މަންޒަރު، މަސްތުވާތަކެތި ޓްރެފިކް ކުރުމާއި މަނީ ލޯންޑާ ކުރުން ފަދަ ކަންކަން ކުރުމުގެ ބޭނުމުގައި،" ވީރަސެކަރަ ސަންޑޭ ޓައިމްސް ނޫހަށް ވިދާޅުވި އެވެ.
އިދިކޮޅު މެމްބަރުން އެ ގަވާއިދަށް ފާޑުކިޔަމުން ބުނެފައި ވަނީ ވެރިކަން ކުރާ އާއިލާގެ ގިނަ މެމްބަރުންނަކީ ޑުއަލް ރައްޔިތުކަން ނުވަތަ ދެ ގައުމެއްގެ ޕާސްޕޯޓް އޮންނަ މީހުން ކަމަށެވެ.
"ކެބިނެޓްގެ މަގާމަކަށް އަންނަން ބޭނުން ނަމަ، ބޭރުގެ ރައްޔިތުން ސެކިއުރިޓީ ކްލިއަރެންސް ހޯދުން ކިހިނެއް ވާނެ ތޯ؟،" ޕާލިމެންޓް މެމްބަރު ޝަނަކިޔަން ރަސަމަނިކަމް ޓްވީޓް ކުރެއްވި އެވެ.
ދާދި ފަހަކާ ޖެހެންދެން ރައީސް ގޮތަބަޔަ ރާޖަޕަކްސަގެ އަތްޕުޅުގައި ވެސް އެމެރިކާ ޕާސްޕޯޓު އޮންނެވި އެވެ. ވެރިކަމަށް ވަޑައިގެންނެވުމަށް ފަހު އެމަނިކުފާނު ވަނީ ދެ ޕާސްޕޯޓް އޮންނަ މީހުންނަށް އިންތިހާބުގައި ވާދަނުކުރެވޭނެ ކަމަށް އޮތް އޮތުން ބާތިލް ކުރައްވާފަ އެވެ.
ގޮތަބަޔަގެ ކޮއްކޯފުޅު އަދި ފިނޭންސް މިނިސްޓަރު ބެސިލް ރާޖަޕަކްސަ އަކީ ވެސް ސްރީލަންކާ އާއި އެމެރިކާގެ ރައްޔިތެކެވެ.
