ޕެރިސް، ފްރާންސް (ޑިސެމްބަރު 27) - މި އަހަރު ކުރިމަތިވި އެންމެ ބޮޑެތި މޫސުމީ ކާރިސާތަކުގައި ލިބުނު ގެއްލުމުގެ އަދަދު 2020 ވަނަ އަހަރަށް ވުރެ 20 ބިލިއަން ޑޮލަރު އިތުރުވެއްޖެ އެވެ.
އިނގިރޭސިވިލާތުގެ އެހީދޭ ޖަމިއްޔާ ކްރިސްޓިއަން އެއިޑުން ބުނީ މި އަހަރު ކުރިމަތިވި އެންމެ ބޮޑު 10 މޫސުމީ ކާރިސާ އިން ޖުމްލަ 170 ބިލިއަން ޑޮލަރުގެ ގެއްލުން ލިބުނު ކަމަށެވެ.
އެ ޖަމިއްޔާއަކީ ކޮންމެ އަހަރަކު ވެސް މޫސުމީ ކާރިސާތަކުން ލިބޭ ގެއްލުމުގެ އަދަދު ހިސާބު ކުރާ ބަޔެކެވެ. އެގޮތުން ފެންބޮޑުވުމާއި، އަލިފާން ރޯވުމާއި، އާދަޔާ ހިލާފަށް ހޫނުގަދަވުން ފަދަ ކަންކަމުން ލިބޭ ގެއްލުން ހިސާބު ކުރަނީ އިންޝުއަރެންސް ކްލެއިމްތަކަށް ބަލައިގެންނެވެ.
ދެހާސް ވިހި ވަނަ އަހަރު ކުރިމަތިވި އެންމެ ބޮޑު 10 މޫސުމީ ކާރިސާ އިން ލިބުނީ 150 ބިލިއަން ޑޮލަރުގެ ގެއްލުމެކެވެ. އެހެންކަމުން، މި އަހަރު ލިބުނު ގެއްލުން ވަނީ 13 ޕަސެންޓު އުފުލިފަ އެވެ.
ކްރިސްޓިއަން އެއިޑުން ބުނީ މޫސުމީ ކާރިސާތަކުން ލިބޭ ގެއްލުމުގެ އަގު މަތިވާން ފަށާފައި ވަނީ އިންސާނުންގެ އަމަލުގެ ސަބަބުން އައިސްފައިވާ މޫސުމީ ބަދަލުގެ އަސަރުތަކާ ހެދި ކަމަށެވެ.
މި އަހަރު ކުރިމަތިވި އެންމެ ބޮޑު 10 މޫސުމީ ކާރިސާގައި 1075 މީހުން މަރުވެ، 1.3 މިލިއަން މީހުންގެ ގެދޮރު ގެއްލުނެވެ. މި އަހަރު އެންމެ ބޮޑު ގެއްލުމެއް ލިބުނީ ތޫފާން އައިޑާ އިންނެވެ.
އެމެރިކާގެ އިރުމަތީ އައްސޭރިފަށަށް އެރި އެ ތޫފާނުން 65 ބިލިއަން ޑޮލަރުގެ ގެއްލުން ލިބުނެވެ. އޯގަސްޓު މަހުގެ ފަހުކޮޅު ލުއިޒިއާނާ އަށް އެރުމަށް ފަހު އުތުރަށް ދަތުރުކޮށް، ނިއު ޔޯކުގައި ވަރަށް ބޮޑަށް ފެންބޮޑުވެ، ގިނަ ގެއްލުންތަކެއް ލިބުނެވެ.
ދެ ވަނަ އަށް އެންމެ ބޮޑެތި ގެއްލުން ލިބުނީ ޖަރުމަނާއި ބެލްޖިއަމްގައި އާދަޔާ ހިލާފަށް ފެންބޮޑުވުމުންނެވެ. އޭގެ ސަބަބުން 43 ބިލިއަން ޑޮލަރުގެ ގެއްލުން ވި އެވެ.
ޢެމެރިކާގެ ޓެކްސަސް ސްޓޭޓަށް އާދަޔާ ހިލާފަށް ފިނިގަދަވެ ކުރިމަތިވި ފިނީގެ ތޫފާނުގައި އެ ސްޓޭޓުގެ ކަރަންޓު ވިޔުގަ ހުއްޓި، 23 ބިލިއަން ޑޮލަރުގެ ގެއްލުން ލިބުނެވެ.
ޗައިނާގެ ހެނާން ޕްރޮވިންސްގައި ޖުލައި މަހު ފެންބޮޑުވުމުގެ ސަބަބުން 17.6 ބިލިއަން ޑޮލަރުގެ ގެއްލުން ވި އެވެ. އޭގެ އިތުރުން ވެސް ކެނެޑާގައި ފެންބޮޑުވުމާއި، ފްރާންސްގައި އާދަޔާ ހިލާފަށް ފިނިގަދަވުމާއި، އިންޑިއާ އާއި ބަންގްލަދޭޝަށް މިދިޔަ މޭ މަހު އެރި ތޫފާނުގައި ވެސް އެތައް ބިލިއަން ޑޮލަރުގެ ގެއްލުން ލިބުނެވެ.
ނަމަވެސް ކްރިސްޓިއަން އެއިޑުން ބުނީ އެ ޖަމިއްޔާގެ އިވެލުއޭޝަން ގިނައިން ހިމެނެނީ މުއްސަނދި ގައުމުތަކުގައި ހިނގާ މޫސުމީ ކާރިސާތައް ކަމަށޭވެ. އެއީ ފަގީރު ގައުމުތަކުގައި އިންޝުއަރެންސްއާ ގުޅޭ ކަންކަން ރަނގަޅަށް ނުހިނގާތީ އެވެ.
އެ ޖަމިއްޔާ އިން ބުނީ 2021 ވަނަ އަހަރު އެންމެ ބޮޑެތި މޫސުމީ ކާރިސާތައް ހަގީގަތުގައި ކުރިމަތިވީ ފަގީރު ގައުމުތަކަށް ނަމަވެސް، އިންޝުއަރެންސް އަށް ބަލައިގެން އެ ގައުމުތަކަށް ވީ ގެއްލުން ހިސާބު ނުކުރެވޭ ކަމަށެވެ.
އެގޮތުން ދެކުނު ސޫދާނުގައި ފެންބޮޑުވެ 800،000 މީހުން ހާލުގައި ޖެހުނު ހާދިސާ ފާހަގަކުރި އެވެ.
