ކޮވިޑް ވެކްސިން ޖަހަން ބޭނުންވާ ސިރިންޖުގެ ދަތިކަން 2022 ވަނަ އަހަރު ވަރަށް ބޮޑަށް ކުރިމަތިވެދާނެ ކަމަށް ލަފާކޮށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަންބޮޑުވުން ފާޅުކޮށްފި އެވެ.
ޑަބްލިއުއެޗްއޯގެ އޮފިޝަލް ލީސާ ހެޑްމޭން ވިދާޅުވީ ކޮވިޑް ބަލިމަޑުކަމުގެ ކުރީކޮޅު ފެނުނު ފަދަ މަންޒަރެއް ސިރިންޖުގެ ދަތިކަމާ ހެދި ފެނިދާނެ ކަމަށް ބަލައި، ގައުމުތަކުން ފިޔަވަޅު އަޅަން ޖެހޭ ކަމަށެވެ.
އެގޮތުން އެއް ފަހަރާ ގިނައިން ސިރިންޖު ގަނެފައި ބެހެއްޓުމާއި "ޕެނިކް ބަޔިންގް" ފަދަ ކަންކަން ކުރިމަތިވެދާނެ ކަމުގެ އިންޒާރު އޭނާ ދެއްވި އެވެ.
"ވެކްސިން ޖަހަން ބޭނުންވާ ސިރިންޖު ނުލިބުމުގެ މައްސަލަ މުޅި ދުނިޔެ އަށް ދިމާވެ، ސިއްހީ ރައްކާތެރިކަމާ ގުޅޭ ކަންބޮޑުވުންތަކާއި ވެކްސިން ޕްރޮގްރާމްތަކަށް ހުރަސް އެޅުން ފަދަ ކަންކަމުގެ ނުރައްކާ އެބަ އޮތް،" އޭނާ ވިދާޅުވި އެވެ.
ހެޑްމޭން ވިދާޅުވީ ސިރިންޖުގެ ދަތިކަން މާ ބޮޑަށް ކުރިމަތިވާ ނަމަ ކުޑަކުދިންނަށް ގަވާއިދުން ދޭން ޖެހޭ ވެކްސިންތަކަށް ވެސް ހުރަސްއެޅިދާނެ ކަމަށާއި ފަގީރު ގައުމުތަކާއި ބައެއް ކަހަލަ މީހުންގެ މެދުގައި ތަކުރާރުކޮށް އެއް ސިރިންޖު ބޭނުން ކުރުމުގެ ނުރައްކާ އޮންނާނެ ކަމަށެވެ.
މިހާތަނަށް ކޮވިޑް ވެކްސިންގެ 6.8 ބިލިއަން ޑޯޒް ދީފައި ވާއިރު، ހެޑްމޭން ވިދާޅުވީ ކުންފުނިތަކަށް ލިބިފައި ވަނީ އަހަރަކު 6 ބިލިއަން ސިރިންޖު އުފެއްދުމުގެ ގާބިލްކަން ކަމަށެވެ. ކޮވިޑް ވެކްސިންގެ އިތުރުން ގަވާއިދުން ކުޑަކުދިންނާއި އެހެން މީހުންނަށް ދޭން ޖެހޭ ވެކްސިންތަކަށް ވެސް ސިރިންޖު ބޭނުންވެ އެވެ.
ހެޑްމޭން ވިދާޅުވީ ސިރިންޖު އުފެއްދުމުގެ ކެޕޭސިޓީ އަށް ބަލާއިރު 2022 ވަނަ އަހަރުގެ ތެރޭގައި ދެ ބިލިއަން ސިރިންޖުގެ ދަތިކަމާ ދިމާވާނެ ކަމަށް ލަފާކުރެވޭ ކަމަށެވެ. އެކަން ހައްލު ވާނީ ސިރިންޖު އުފެއްދުމުގެ ކެޕޭސިޓީ އިތުރުކޮށްގެންކަން އޭނާ ފާހަގަކުރެއްވި އެވެ.
ރާއްޖޭގައި މިހާރު ވެސް ވަނީ ސިރިންޖުގެ ދަތިކަމާ ކުރިމަތިވެފަ އެވެ. އެގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ކޮވިޑުން ދިފާއުވުމަށް ޖަހާ ވެކްސިންގެ ތިން ވަނަ ޑޯޒު ޖެހަން ފަށާނެ ތާރީހެއް މިހާތަނަށް ކަނޑައަޅާފައި ނުވަނީ ފައިޒާ ވެކްސިން ޖެހުމަށް ބޭނުންވާ ސިރިންޖުގެ ޝޯޓޭޖެއް އުޅޭތީ ކަމަށެވެ.
