ލަންޑަން، އިނގިރޭސިވިލާތް (ޑިސެމްބަރު 25) - އަފްގާނިސްތާނުގައި ސެކިއުރިޓީ ކޮންސަލްޓެންޓެއްގެ ގޮތުގައި އުޅެމުން ދިޔަ އިނގިރޭސި ރައްޔިތަކު ހައްޔަރުކޮށްފި އެވެ.
ގްރާންޓް ބެއިލީ ހައްޔަރު ކުރި ކަމަށް އެންމެ ފުރަތަމަ ރިޕޯޓު ކުރީ މިދިޔަ ބުރާސްފަތި ދުވަހު ޑެއިލީ މިރާ އިންނެވެ. އިނގިރޭސި ފޮރިން މިނިސްޓްރީން ހުކުރު ދުވަހު ބުނީ އެއީ ސައްހަ ވާހަކައެއް ކަމަށެވެ.
ޑެއިލީ މިރާ އިން ރިޕޯޓު ކުރި ގޮތުގައި އުމުރުން 50 ގެ އަހަރުތައް ގުނަމުންދާ ބެއިލީ އަކީ އަފްގާނިސްތާނުގައި އަމިއްލަ ޖަމިއްޔާއެއްގެ މުވައްޒަފެކެވެ. އޭނާ ހައްޔަރު ކުރީ ތާލިބާން ފުލުހުން ކާބުލްގައި ހިންގި އޮޕަރޭޝަނެއްގަ އެވެ.
"އަފްގާނިސްތާނުގައި އިނގިރޭސި ރައްޔިތަކު ހައްޔަރު ކުރި ކަމުގެ މައުލޫމާތު އަޅުގަނޑުމެންނަށް ލިބުނު. އަޅުގަނޑުމެން މި ދަނީ އޭނާ އަށް އެހީވުމަށް އާއިލާއާ ގުޅައިގެން މަސައްކަތް ކުރަމުން،" އިނގިރޭސި ފޮރިން އޮފީހުން އޭއެފްޕީ އަށް ބުންޏެވެ.
ތާލިބާނުން ބުނީ އޭނާ ހައްޔަރު ކުރުމާ ގުޅޭ ގޮތުން ވަކި އެއްޗެއް ބުނަން ބޭނުން ނުވާ ކަމަށެވެ. ނަމަވެސް ޑެއިލީ މިރާ އިން ބުނީ އޭނާގެ ހަބަރެއް އެންމެ ފަހުން ވީ މިދިޔަ ހޮނިހިރު ދުވަހު ކަމަށާއި ހައްޔަރު ކުރީ ބަޑި ޖައްސައި ބިރު ދައްކައިގެން ކަމަށެވެ. ބެލެވޭ ގޮތުގައި އޭނާ ބަންދުކޮށްފައި ހުރީ ކާބުލްގެ ޖަލެއްގަ އެވެ.
ބެއިލީ އަކީ ގިނަ އަހަރުތަކެއް އަފްގާނިސްތާނުގައި ހޭދަކޮށްފައިވާ މީހެކެވެ. އޭނާ އަލުން އަފްގާނިސްތާނުގެ ވަޒީފާއަކަށް ދިޔައީ މިދިޔަ އޯގަސްޓް މަހު ތާލިބާނުން ވެރިކަމަށް އައި ފަހުންނެވެ. ސްކައި ނިއުސް އިން ބުނީ އޭނާ އަފްގާނިސްތާނަށް ދިޔައީ ސެޕްޓެމްބަރުގައި ކަމަށެވެ.
