އާސަންދަ ކުންފުނި މެދުވެރިކޮށް ފާއިތުވި 10 އަހަރުގެ ތެރޭގައި ދައުލަތުގެ ބަޖެޓުން 16 ބިލިއަން ރުފިޔާ ހަރަދުކޮށްފައިވާ ކަމަށް އެ ކުންފުނީގެ މެނޭޖިންޑިރެކްޓަރު މަރިޔަމް ޝަފީގް ރޭ ވިދާޅުވެއްޖެ އެވެ.
އާސަންދައިގެ ހިދުމަތަށް 10 އަހަރު ފުރުން ފާހަގަ ކުރުމަށް ރޭ ބޭއްވި ޖަލްސާގައި މަރިޔަމް ވިދާޅުވީ އާސަންދަ ސްކީމްގެ ދަށުން އަހަރަކު އެވަރެޖްކޮށް ތިން ލައްކަ މީހުން ބޭސް ފަރުވާ ކުރާ ކަމަށެވެ.
އެ ހަރަދުގެ 64 ޕަސެންޓު ހޭދަވަނީ ބަލިވުމުން ބޭސް ކޮށްދިނުމަށް ކަމަށާއި ހަރަދުގެ 31 ޕަސެންޓު ހޭދަވަނީ ބޭސް ގަތުމަށް ކަމަށާއި ފަސް ޕަސެންޓަކީ ރާއްޖެއިން ބޭރަށް ދަތުރުފަތުރު ކުރުމަށް ދާ ހަރަދު ކަމަށް މަރްޔަމް ޝަފީގް ވިދާޅުވި އެވެ.
އާސަންދާ ސްކީމް ތައާރަފްކުރި ފަހުން އެތައް ބަދަލުތަކެއް ހިދުމަތަށް ގެނެވިފައިވާކަން ފާހަގަކުރައްވާ ވޭތުވެދިޔަ ތިން އަހަރު ތެރޭގައި އެންމެ ބޮޑު އިސްކަމެއް ދެއްވީ އާސަންދައިގެ އިސްރާފު ކުޑަކުރުމަށާއި ހިދުމަތް ހަމަނުޖެހިގެން ފަރުވާ ލަސްވުމުގެ ސަބަބުން ބަލި މީހުންގެ ފުރާނައަށް ނުރައްކާ ވަމުންދިޔަ ދިޔުން ހުއްޓުވުމަށް ކަމަށް މަރިޔަމް ވިދާޅުވި އެވެ.
"ހަމައެކަނި އާސަންދައިން މަސައްކަތްކުރި ނަމަވެސް މިކަމެއް ހައްލެއް ނުކުރެވޭނެ. ބަލިވުމުގެ ކުރިން އެކަމަށް ރައްކާތެރިވާން އެބަޖެހޭ. ދުޅަހެޔޮކޮށް ތިބުމަށް ދިރިއުޅުމުގެ ވައްޓަފާޅިއަށް ބަދަލުތައް ގެންނަން އެބަޖެހޭ. ބޭސްފަރުވާކުރުމުގައި ހިދުމަތްދޭ ފަރާތާއި ލިބިގަންނަ ފަރާތް ޒިންމާވާން ވެސް އެބަޖެހޭ. އަތޮޅުތެރޭގެ ސިއްހީ ނިޒާމު ވެސް ހަރުދަނާ ވާންޖެހޭ. އަދި ޕަބްލިކް ހެލްތުގެ ނިޒާމު ވެސް ވަރުގަދަކުރަން އެބަޖެހޭ،" މަރިޔަމް ވިދާޅުވި އެވެ.
އާސަންދާގެ ހިދުމަތަށް މިހާރު 10 އަހަރުވިއިރު ލިބުނު ކާމިޔާބީތައް ފާހަގަ ކުރައްވައި މަރިޔަމް ޝަފީގް ވިދާޅުވީ ވެއެތުވެދިޔަ ތިން އަހަރުގެ ތެރޭގައި އާސަންދާއަށް ހުށަހެޅޭ މައްސަލަތައް ދުވަހުން ދުވަހަށް ނިންމައި، އެމަޖެންސީ ކޭސްތަކަށް 10 މިނެޓުތެރޭގައި ހިދުމަތްދެވޭނެ ގޮތަށް އުސޫލުތައް ބައްޓަންކޮށްފައިވާ ކަމަށެވެ. އަދި ކުންފުނީގައި ދެފުށް ފެންނަ ނިޒާމެއް ގާއިމްކޮށް އަހަރީ ހިސާބުތައް ބަލަހައްޓައި، އޮޑިޓް ކުރުމުގެ މަސައްކަތް ވެސް އެކަށީގެންވާ ގޮތެއްގައި ކުރިއަށްގެންގޮސްފައިވާނެ ކަމަށް އޭނާ ވިދާޅުވި އެވެ.
އާސަންދަ އެންމެ ފުރަތަމަ ތައާރަފްކޮށްފައި ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އޭގެ ފަހުން ކޮންމެ ސަރުކާރެއްގައި ވެސް ވަނީ އެ ހިދުމަތަށް ބޮޑެތި ބަދަލުތަކެއް ގެނެސްފަ އެވެ.
