ނިއު ދިއްލީ، އިންޑިއާ (ޑިސެމްބަރު 24) - އިންޑިއާގެ ހިންދޫންތަކެއް ބޭއްވި އެއްވުމެއްގައި މުސްލިމުން މަރަން ގޮވި މައްސަލައިގެ ތަހުގީގު ފުލުހުން ފަށައިފި އެވެ.
މި މަހުގެ ކުރީކޮޅު ހިންދޫންގެ އިވެންޓުގައި ވާހަކަދެއްކި މީހަކު ބުނެފައި ވަނީ މުސްލިމުން މަރައިގެން ޖަލަށް ދާން ޖެހިދާނެކަމަށް ކަންބޮޑުވުމުގެ ބޭނުމެއް ނެތް ކަމަށެވެ.
އެ ވާހަކަ ދެއްކި މަންޒަރު ފެންނަ ވީޑިއޯ އާއްމުވެފައިވާ އިރު، އެ ވީޑިއޯގެ ސައްހަކަން އޭއެފްޕީ އިން ވަނީ ކަށަވަރުކޮށްފަ އެވެ.
"އަހަރުމެންގެ ތެރެއިން އެންމެ 100 އެއްހާ މީހުން ހަތިޔާރު ހިފައިގެން ނުކުމެއްޖެ ނަމަ، އެ މީހުން ދެ މިލިއަނަށް ވުރެ ގިނަ މީހުން މަރާލެވޭނެ، އަހަރުމެންނަށް ކާމިޔާބު ލިބޭނެ... މި ވިސްނުމުގައި ތެދުވެގެން ނޫނީ ހިންދޫ ދީން ރައްކާތެރި ނުކުރެވޭނެ،" އިވެންޓުގައި ވާހަކަދެއްކި އަންހެން މީހާ ބުންޏެވެ.
އުތުރު ހަރިދްވާރް ސިޓީގައި އޮތް އެ އިވެންޓަށް ބޮޑު ވަޒީރު ނަރެންދްރަ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) ގެ މެމްބަރުން ވެސް ދިޔަ ކަމަށް ވެ އެވެ.
ދެހާސް ސާދަ ވަނަ އަހަރު ވެރިކަމަށް އައި ބީޖޭޕީ އިން މުސްލިމުންނާއި އެހެން މައިނޯރިޓީންނާ ދެކޮޅަށް އަމަލުތައް ހިންގާ ކަމަށް ތުހުމަތު ކުރެވެ އެވެ. ނަމަވެސް އެ ޕާޓީން ތުހުމަތުތައް ދޮގުކުރެ އެވެ.
ޕާލިމެންޓް މެމްބަރު އަސާދުއްދީން އޮވައިސީ ކުރި ޓްވީޓެއްގައި ވިދާޅުވީ ވީޑިއޯގައި ދައްކާފައިވާ ވާހަކަ އަކީ "ބޮޑު ގަތުލުއާއްމަކަށް ސީދާ ހިތްވަރު ދިނުމުގެ" އަމަލެއް ކަމަށެވެ.
ހިންދޫންގެ އެ އިވެންޓާ ގުޅޭ ގޮތުން މޯދީގެ ސަރުކާރުން އަދި ވަކި އެއްޗެއް ނުބުނެ އެވެ.
ބީޖޭޕީގެ އިސް މެމްބަރުންނާ އެކު އާއްމުކޮށް ފެންނަ ހިންދޫ ގްރޫޕެއްގެ ވެރިޔެއް ކަމަށްވާ ޕްރަބޯދްއާނަންދް ގިރީ ވެސް އެ އިވެންޓުގައި ބައިވެރިވެ، "ސާފު ކުރުމަށާއި މަރުވާން ނުވަތަ މަރަން ތައްޔާރަށް ތިބުމަށް" ގޮވާލި އެވެ.
"މިޔަންމާ ފަދައިން، އިންޑިއާގެ ފުލުހުންނާއި، ސިޔާސީ ފަރާތްތަކާއި، ސިފައިންނާއި، ހިންދޫ ދީނުގެ ހުރިހާ އެންމެން ހަތިޔާރި ހިފައިގެން ތެދުވެ ސާފު ކުރަން ޖެހޭ. އިތުރު އެހެން ގޮތެއް ނެތް،" އޭނާ ބުނި ކަމަށް ވެ އެވެ.
މިޔަންމާގެ ސިފައިން ރޮހިންޔާ ދަރިކޮޅުގެ މުސްލިމުންނާ ދެކޮޅަށް ހިންގި ބޮޑު ގަތުލުއާއްމުގައި އެތައް ހާސް ބަޔަކު މަރުވެ، އެތައް މިލިއަން މީހުން ވަނީ ރެފިއުޖީންނަށް ބަދަލުވެފަ އެވެ.
އެ އިވެންޓުގައި ވާހަކަދެއްކި އިތުރު މީހަކު ބުނެފައި ވަނީ ކުރީގެ ބޮޑު ވަޒީރު، ކޮންގްރެސް ޕާޓީގެ މަންމޯހަން ސިންގް އަވަހާރަކޮށްލެވުނު ނަމަ ރަނގަޅުވީސް ކަމަށެވެ. މަންމޯހަން ސިންގް އަކީ ސިކް ދީނުގެ ފުރަތަމަ ބޮޑު ވަޒީރެވެ.
އިތުރު މީހަކު ބުނީ އޭނާ ނިސްބަތްވާ ސްޓޭޓުގެ ހޮޓެލްތަކުގައި ކްރިސްމަސް ފާހަގަކުރަން ފުރުސަތު ދިނުން މަނާކުރަން އެދިފައިވާނެ ކަމަށެވެ. އެހެން ބުނުމާއެކު، އިވެންޓުގައި ތިބި ގިނަ ބަޔަކު އެ ވާހަކަ އަށް ތައުރީފު ކުރި އެވެ.
ބީޖޭޕީ އިން ބޭނުން ވަނީ އިންޑިއާ އަކީ "ސެކިއުލާ" ގައުމެއްގެ ބަދަލުގައި ހިންދޫ ދައުލަތަކަށް ހަދަން ކަމަށް ދެކެވޭ ވާހަކަ އެ ޕާޓީން ދޮގުކުރެ އެވެ.
ނަމަވެސް ބީޖޭޕީ ވެރިކަމަށް އައުމަށް ފަހު މުސްލިމުންނާއި ނަސާރާއިންނާއި އެހެން ދީންތަކުގެ މީހުންނަށް ވެސް ވަނީ ފުރައްސާރަ އާއި ބިރުވެރިކަމާ ކުރިމަތިވެފަ އެވެ.
