ފަންޑު ހުސްވާން ކައިރިވެފައި ވާތީ ޔަމަނަށް ފޯރުކޮށްދޭ ކާބޯތަކެތީގެ އެހީ މެދުކަނޑާލަން މަޖުބޫރުވެފައިވާ ކަމަށް ވޯލްޑް ފުޑް ޕްރޮގްރާމް (ޑަބްލިއުއެފްޕީ) އިން ބުނެފި އެވެ.
"ޖެނުއަރީ މަހުން ފެށިގެން އަށް މިލިއަން މީހުންގެ ކާބޯތަކެތީގެ ރޭޝަން މިހާރަށް ވުރެ ވެސް ކުޑަ ވާނެ. ނަމަވެސް ކުއްލި ބަނޑުހައި ހޫނުކަމެއްގައި އުޅެން ޖެހިދާނެ ކަމަށް ބެލެވޭ ފަސް މިލިއަން މީހުންނަށް މިހާރު ވެސް ލިބޭ ރޭޝަން ފޯރުކޮށްދެމުންދާނެ،" އދ. ގެ އެޖެންސީން ބުންޏެވެ.
ޔަމަނުގެ ގާނޫނީ ސަރުކާރާއި ހޫތީ ހަނގުރާމަވެރިންނާ ދެމެދު 2014 ވަނަ އަހަރުން ފެށިގެން ކުރާ ހަނގުރާމައިގައި ގައުމު ވަނީ ސުންނާފަތިވެފަ އެވެ. ހަނގުރާމައިގައި ހޫތީންނަށް އިރާނުން އެހީވާ ކަމަށް ތުހުމަތު ކުރެވޭ އިރު، ސަރުކާރުގެ ފައުޖަށް އެހީވަނީ ސައުދީ އަރަބިއްޔާގެ އަސްކަރީ ކޯލިޝަނުންނެވެ.
ހަނގުރާމައިގައި އެތައް ހާސް ބަޔަކު މަރުވެ، މިލިއަނަކަށް ވުރެ ގިނަ މީހުންގެ ގެދޮރު ގެއްލިފައި ވެ އެވެ. އެތައް މިލިއަން ބަޔަކަށް ބަނޑުހައި ހޫނުކަމުގެ ބިރާ ކުރިމަތިވެފައި ވާއިރު، ޔަމަނުގެ 80 ޕަސެންޓު މީހުންގެ ދިރިއުޅުން މިހާރު ބަރޯސާ ވަނީ ބޭރުގެ އެހީ އަށެވެ.
ޑަބްލިއުއެފްޕީ އިން ބުނީ 2022 ވަނަ އަހަރުގެ މޭ މަހާ ހަމައަށް ޔަމަނުގެ ރައްޔިތުންނަށް ކާބޯތަކެތި ފޯރުކޮށްދެވޭނީ އިތުރު 813 މިލިއަން ޑޮލަރު ލިބިގެން ކަމަށެވެ. މުޅި 2022 ވަނަ އަހަރު މެދުނުކެނޑި ކާބޯތަކެތީގެ އެހީ ފޯރުކޮށްދެވޭނީ 1.97 ބިލިއަން ޑޮލަރު ލިބިގެންނެވެ.
މިދިޔަ މާޗް މަހު ޔަމަނުގެ ރައްޔިތުންނަށް އެހީ ހޯދަން ބޭއްވި ޑޯނަރުންގެ ކޮންފެރެންސްގައި ލިބުނީ އެދުނު މިންވަރުގެ ދެބައިކޮށްފައި އެއް ބަޔަށް ވުރެ ވެސް މަދުންނެވެ. އޭރު އދ. އިން 3.85 ބިލިއަން ޑޮލަރު އެހީ އަށް އެދުނު ނަމަވެސް ލިބުނީ 1.7 ބިލިއަން ޑޮލަރެވެ.
އިންސާނީ އެހީގެ ފަންޑުތަކަށް ޑޯނަރުން ދޭ ފައިސާ މަދުވަމުން ދާތީ، 2020 ވަނަ އަހަރު އދ. އިން ހިންގާ ގިނަ ޕްރޮގްރާމްތަކެއް ހުއްޓާލަން ޖެހުނެވެ.
