އދ.، އެމެރިކާ (ޑިސެމްބަރު 23) - އަފްގާނިސްތާނުގެ އާއްމު ރައްޔިތުންނަށް ބޭނުންވާ އިންސާނީ އެހީ ފޯރުކޮށްދޭނެ ގޮތް ކަނޑައަޅައި ހާއްސަ ގަރާރެއް އދ. ގެ ސަލާމަތީ މަޖިލީހުން ފާސްކޮށްފި އެވެ.
އެމެރިކާ އިން ހުށަހަޅައިގެން ފާސްކުރި ގަރާރަށް ތާލިބާނުން މަރުހަބާ ކިޔުމަށް ފަހު ބުނީ އެއީ "ރަނގަޅު ފިޔަވަޅެއް" ކަމަށެވެ. ތާލިބާނުން ވެރިކަމާ ހަވާލުވުމުން ބޭރުގެ އެހީތައް ވަނީ ހިފަހައްޓާފަ އެވެ. އެހެންވެ، އަފްގާނިސްތާނަށް ވަނީ އިގްތިސާދީ އަދި އިންސާނީ ކާރިސާއެއް ދިމާވެފަ އެވެ.
އޭގެ އިތުރުން އަފްގާނިސްތާނުގެ މަރުކަޒީ ބޭންކުގެ ބިލިއަނަކަށް ވުރެ ގިނަ ޑޮލަރު އެމެރިކާ އިން ވަނީ ހިފަހައްޓާފަ އެވެ. އެއާ އެކު މުދާ އިމްޕޯޓް ކުރާނެ ފައިސާ ނެތި، ފިނި މޫސުމުގެ ތެރޭގައި އެތައް މިލިއަން ބަޔަކު އުޅެން ޖެހިފައި ވަނީ ބަނޑުހައި ހޫނުކަމުގަ އެވެ.
ސަލާމަތީ މަޖިލީހުން ފާސްކުރި ގަރާރުގެ ދަށުން ބައިނަލްއަގްވާމީ ފިޔަވަޅުތަކާ ހިލާފު ނުވެ އެއް އަހަރު ވަންދެން އަފްގާނިސްތާނަށް އިންސާނީ އެހީ ފޯރުކޮށްދެވޭނެ އެވެ. ފިޔަވަޅުތައް އަޅާފައި ވަނީ ތާލިބާން ސަރުކާރަށް ފައިސާ ނުލިބޭނެކަން ކަށަވަރު ކުރުމަށެވެ. އެއްވެސް ގައުމަކުން މިހާތަނަށް ރަސްމީކޮށް ތާލިބާން ސަރުކާރު ބަލައިގެންފައެއް ނުވެ އެވެ.
"އެއީ އަފްގާނިސްތާނުގެ އިގްތިސާދީ ހާލަތު ރަނގަޅު ކުރަން އެހީވާނެ ނިންމުމަކަށް ވާތީ އެކަން ބަލައިގަންނަން،" ތާލިބާނުންގެ ތަރުޖަމާނު ޒަބީހުﷲ މުޖާހިދު ބުންޏެވެ.
އޭގެ އިތުރުން ތާލިބާން ސަރުކާރާ ދެކޮޅަށް އަޅާފައިވާ ފިޔަވަޅުތައް ވެސް ވަރަށް އަވަހަށް އުވާލާނެކަމަށް އުއްމީދު ކުރާ ކަމަށް އޭނާ ބުންޏެވެ.
"މި އެހީ ދޭން ނިންމި ނަމަވެސް ވަކި ޖަމާއަތަކުން ބައިނަލްއަގްވާމީ ޒިންމާ އަދާނުކޮށް އުޅެވޭނެ ކަމަށް ހީކޮށްގެން ނުވާނެ،" އެމެރިކާ އިން އދ. އަށް ކަނޑައަޅާފައި ހުންނަ ޑެޕިއުޓީ ސަފީރު ޖެފްރީ ޑެލޯރެންޓިސް ތާލިބާނާ ގުޅޭ ގޮތުން ވިދާޅުވި އެވެ.
ގަރާރު ފާސްކުމުގެ އިތުރުން ވެސް އެމެރިކާ އިން އަޅާފައިވާ ބައެއް ދަތި ކުރުމުގެ ފިޔަވަޅުތަކަށް ބުދަ ދުވަހު ވަނީ ލުއި ދީފަ އެވެ. އެގޮތުން ފިޔަވަޅުތައް ޓާގެޓް ކުރާ ފަރާތްތަކަށް ފައިދާއެއް ނުވާ ނަމަ، ފައިސާ އާއި މުދާ އެކްސްޕޯޓް ކުރެވޭނެ ކަމަށް ނިންމި އެވެ.
