އެ ބިހަކީ 66 މިލިއަން އަހަރުވެފައިވާ ބިހެއްކަން ފަހުގެ ޓެސްޓްތަކުން ވަނީ ހާމަވެފަ އެވެ. މީގެ ކުރިން ވެސް ޑައިނަސޯ ބިސް ސައެންސުވެރިން ވަނީ ހޯދާފަ އެވެ. އެކަމަކު އެބިސްތަކާއި މިބިހާ ހުރި ތަފާތަކީ، މި ބިހުގެ އެތެރޭގައި ދޫންޏެއް ހެން އޮތް ބޭބީ ޑައިނަސޯގެ ކަށިތައް ރީތިކޮށް ފެންނަން ހުރުމެވެ.
މި ބިހުގެ އެތެރޭގައި އޮތް ކުޑަ ޑައިނަސޯ އޮތީ ހެދިބޮޑުވުމުގެ އެންމެ ފަހު މަރުހަލާގަ އެވެ. ބިސް ފާޅާލުމަށްފަހު ބޭރަށް ނިކުންނަން ތައްޔާށެވެ. މިކުޑަ ޑައިނަސޯ އަކީ ”އޮވިރެޕްޓޮރަސޯ" ނަމަކަށް ކިޔާ ޑައިނަސޯގެ ބާވަތަކަށް ނިސްބަތްވާ ޑައިނަސޯއެކެވެ.
ސައެންސުވެރިން މިހާރުވަނީ މިކުޑަ ޑައިނަސޯއަށް ނަމެއްވެސް ދީފައެވެ. އެމީހުން މި ޑައިނަސޯއަށް ކިޔާފައިވަނީ "ބޭބީ ޔިންގްލިއަންގް" އެވެ. މި ނަން ދީފައި ވަނީ އެ ބިސް ރައްކާކޮށްފައި އޮތް ދާރުލްއާސާރަށް ނިސްބަތްކޮށެވެ.
މި ބިސް ފެނިފައިވަނީ ޗައިނާގެ ގާންޒޯއިން 2000 ވަނަ އަހަރު އެވެ. ވޭތުވެ ދިޔަ 21 އަހަރު މިބިސް ސައެންސްވެރިން ރައްކާކޮށްފައި އޮތީ ޔިންގްލިއަންގް ސްޓޯން ނޭޗާ ހިސްޓޮރީ މިއުޒިއަމްގެ ގުދަނެއްގަ އެވެ. މިހާ ގިނަ ދުވަސް ވަންދެން މި ބިސް ރައްކާކޮށްފައި ބޭއްވުމަށްފަހު އަލުން އެ ބިސް އެމީހުން ނަގާފައިވަނީ ދާދި ފަހުން މިއުޒިއަމް މަރާމާތު ކުރުމުގެ މަސައްކަތެއްގެ ތެރެއިންނެވެ.
އެހިސާބުން މިބިހުގެ އިތުރު ތަހުލީލްތައް ފެށުނެވެ. އެމަސައްކަތުގެ ތެރެއިން ސައިންސްވެރީންނަށް ބިހުގެ ތެރޭގައި ކުޑަ ޑައިނަސޯއެއް އޮތްކަން ފާހަގަ ކުރެވުނެވެ.
ބިހުގެ ތެރޭގައި އޮތް ކުޑަ ޑައިނަސޯގެ ދިގުމިނުގައި ހުރީ 10.6 އިންޗި އެވެ. ބިހުގައި 6.7 އިންޗިި ހުއްޓެވެ.
އެތައް މިލިއަން އަހަރެއް ވުމުގެ ސަބަބުން މިބިސް ވަނީ އެއްކޮށް ގާވެ ހިލަވެފަ އެވެ.
ބިހުގެ އެތެރޭގައި އޮތް ކުޑަ ޑައިނަސޯގެ ކަށިގަނޑު އޮތްގޮތަށް ސަލާމަތުން ފެންނަން އޮތީ އެހެންވެއެވެ. ޗައިނާގެ ރިސާޗަރެއް ކަމުގައިވާ ޑރ. ފިއޯން ވައިސަންމާ ބުނެފައިވާ ގޮތުގައި އެއީ އަދި މިހާތަނަށް ފެނުނު ޑައިނަސޯ ބިސްތަކުގެ ތެރެއިން އެންމެ ރީތިކޮށް ކުޑަ ޑައިނަސޯ ފެންނަން އޮތް ބިހެވެ.
އެ ބިސް ދިރާސާ ކުރުމުން ޑައިނަސޯތަކާއި ބެހޭ މުޅިން އާ މައުލޫމާތު ލިބިގެން ދާނެ ކަމަށް ސައެންސްވެރިން ލަފާކުރެއެވެ.
ބޭބީ ޔިންގްލިއަންގްގެ ތަސްވީރެއް: ސައެންސުވެރިން ކުރަހާފައި- ފޮޓޯ: ބީބީސީ
މި ޑައިނަސޯގެ ތަސްވީރެއް ސައެންސުވެރިން ވަނީ އެޑްވާންސްޑް ސްކޭނިންގް ޓެކްނިކްސްތައް ބޭނުންކޮށްގެން އުފައްދާފައެވެ.
