ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) ގައި މެރިޓައިމް ކޯސްތައް ހިންގުމަށް ހާއްސަކޮށްގެން، މެރިޓައިމް ސަވައިވަލް ސެންޓަރެއް ގާއިމްކުރުމުގެ މަސައްކަތް ފަށައިފި އެވެ.
ގާތްގަނޑަކަށް 4.5 މިލިއަން ރުފިޔާ ހަރަދު ކުރާ އެ މަޝްރޫއުގެ މަސައްކަތް ހަވާލުކުރީ 41 އަހަރުގެ ތަޖުރިބާކާރު އެމްޓީސީސީ ކުންފުންޏާ އެވެ. މި މަސައްކަތް ނިންމުމަށް ހަމަޖެހިފައި ވަނީ 210 ދުވަސް ތެރޭގަ އެވެ.
އެމްޓީސީސީން ބުނީ މި ޕްރޮޖެކްޓްގެ ދަށުން ޝީޓް ޕައިލްކޮށްފައިވާ 1،200 ކިއުބިކް މީޓަރުގެ ލޭންޑް ފިލްކުރުމާއި 35 މީޓަރުގެ އެއްގަމު ތޮށި ޝީޓް ޕައިލް ކުރުމާއި 27.25 މީޓަރުގެ އެއްގަމު ހުރަސް ތޮށީގައި ކޮންކްރީޓް ގާ ޖެއްސުމާއި 2.4 މީޓަރު ދިގުމިނުގެ 6.4 މީޓަރު ފުޅާ މިނުގެ ރޭމްޕެއް ހެދުމާއި ވާ އައްސާ މޫރިން ބޮލަޑް ހަރު ކުރުމުގެ މަސައްކަތް ކުރިއަށްދާނެ ކަމަށެވެ.
އެ ޕްރޮޖެކްޓު ކުރިއަށްގެންދާނީ ތިމާވެއްޓަށް ލިބިދާނެ ގެއްލުމެއް އޮތްތޯ ބެލުމަށް އެންވަރަމަންޓަލް އިމްޕެކްޓް އެސެސްމަންޓް ހެދުމަށްފަހު ކަމަށް ވެސް އެމްޓީސީސީން ބުނެ އެވެ.
މި މަސައްކަތް ހަވާލު ކުރުމަށް ބޭއްވި ރަސްމިއްޔާތުގައި އެމްޓީސީގެ ފަރާތުން ސޮއިކުރެއްވީ ކުންފުނީގެ ސީއީއޯ އާދަމް އާޒިމެވެ. ގައުމީ ޔުނިވަސިޓީގެ ފަރާތުން ސޮއިކުރެއްވީ ވައިސް ޗާންސެލަރު ޑރ. މުހައްމަދު ޝަރީފެވެ.
1980 ގައި އުފެދުނު އެމްޓީސީސީ ކުންފުންޏަކީ ރާއްޖޭގެ އުމްރާނީ ތަރައްގީ އާއި އިޖުތިމާއީ ވަސީލަތްތައް ބޭނުން ކުރުމުގައި މުހިއްމު ދައުރެއް އަދާކުރަމުން އަންނަ ސަރުކާރު ހިއްސާވާ ކުންފުންޏެކެވެ.
