މި ދުވަސްވަރު ސްރީ ލަންކާގައި ފޭކު ނޫޓުތަކެއް ދައުރުވަމުން ދާތީ ސަމާލުވުމަށް ލަންކާ ފުލުހުން އެދެފި އެވެ.
ފުލުހުންގެ ހާއްސަ އޮޕަރޭޝަންތަކުގައި ވަނީ ފޭކު ނޫޓު ބަހަމުންދާ ހަތަރު ތަނެއް ފާހަގަވެފަ އެވެ. އެ ތަންތަން ހުރީ ކިރުލަޕޮނެ، ޕަޑުއްކަ، ކަލުތަރަ އަދި ރަންގަލަ ހިސާބުތަކުގަ އެވެ.
ފުލުހުން ބުނީ އޮޕަރޭޝަންތަކުގައި ގިނަ އަދަދެއްގެ ބަޔަކު ހައްޔަރުކޮށްފައި ވާއިރު، 5000 ރުޕީޒް އާއި 1000 ރުޕީޒްގެ ފޭކު ނޫޓުތަކެއް ވެސް ބެލުމުގެ ދަށަށް ގެންގޮސްފައިވާ ކަމަށެވެ. އޭގެ އިތުރުން ނޫޓު ޕްރިންޓު ކުރާ މެޝިނާއި އެހެން ބައެއް ސާމާނު ވެސް ފުލުހުން ހޯދި އެވެ.
ތަހުގީގުން މިހާތަނަށް އެނގިފައިވާ ގޮތުގައި ތުހުމަތު ކުރެވޭ ފަރާތްތަކުން މަސައްކަތް ކުރަނީ ޑިސެމްބަރާ ދިމާކޮށް އަންނަ ކްރިސްމަސް އާއި އާ އަހަރުގެ އުފާ ފާޅުކުމުގެ ހަފްލާތަކަށް އަމާޒުކޮށް ފޭކު ނޫޓު ދައުރު ކުރާށެވެ.
އާއްމުންނާޢި ފިހާރަތަކުން އެކަމަށް ސަމާލުވެ ތިބުމަށް ފުލުހުން އެދުނެވެ. އޭގެ އިތުރުން ފޭކު ނޫޓު ގެންގުޅޭ ކަމަށް ޝައްކު ކުރެވޭ ނަމަ ފުލުހުންގެ އެމެޖެންސީ ހޮޓްލައިން ނަންބަރަށް ގުޅަން ވެސް އެދުނެވެ.
