ލަކްޝަދީބްގައި ހުކުރު ދުވަހު ސްކޫލުތަކަށް ލިބޭ ޗުއްޓީ އުވާލުމަށް ފަހު، އާދީއްތަ ދުވަސް ޗުއްޓީ ދުވަހުގެ ގޮތުގައި ކަނޑައެޅުމުން މުޒާހަރާ ކޮށްފި އެވެ.
އިންޑިއާގެ ލަކްޝަދީބްގެ އާބާދީގެ 96 ޕަސެންޓަކީ މުސްލިމުންނެވެ. ނަމަވެސް ލަކްޝަދީބް ސަރަހައްދުގެ ސަރުކާރުގެ އެޑިއުކޭޝަން ޑިޕާޓްމަންޓުން ނެރުނު އަމުރެއްގައި ބުނީ 22-2021 އަށް އޮންނަ ދިރާސީ އަހަރުގެ ތެރޭގައި ހުކުރު ދުވަސް ވާނީ މަސައްކަތް ކުރަން ޖެހޭ ދުވަހަކަށް ކަމަށެވެ.
ލަކްޝަދީބްގެ ޕާލިމެންޓް މެމްބަރު މުހައްމަދު ފައިޒަލް ވިދާޅުވީ ހުކުރު ދުވަހަކީ އެ ތަނުގައި އަބަދުވެސް ސްކޫލުތަކަށް ޗުއްޓީ ދުވަހެއް ކަމަށާއި މީގެ 60 އަހަރު ކުރިން ފެށިގެން އަމަލު ކުރަނީ އެގޮތަށް ކަމަށެވެ.
"މި ނިންމުން ނިންމާފައި ވަނީ އިންތިހާބީ މަންދޫބުންނާއި އެއްވެސް ޕީޓީއޭއަކާ ވެސް މަޝްވަރާ ނުކޮށް. އެއީ ލަކްޝަދީބްގެ ރައްޔިތުން ބަލައިގަންނާނެ ނިންމުމެއް ނޫން،" އޭނާ ވިދާޅުވި ކަމަށް ޓައިމްސް އޮފް އިންޑިއާ ނޫހުގައި ވެ އެވެ.
ލަކްޝަދީބަކީ އަރަބި ކަނޑުގައިވާ ކުދި ޖަޒީރާ ރަށްތަކެކެވެ. މަލިކު ހިމެނޭ އެ 36 ރަށުގެ ތެރެއިން މީހުން ދިރިއުޅެނީ 10 ރަށުގަ އެވެ. އިންޑިއާގެ މައި ސަރުކާރުން ލަކްޝަދީބުގެ ކަންކަން ބަލަހައްޓަން އިދާރީ ވެރިއެއްގެ ގޮތުގައި ކަނޑައެޅީ ޕްރަޕުލް ހޯދާ ޕަޓޭލް އެވެ.
ލަކްޝަދީބްގެ ސްކޫލްތަކުގެ ޗުއްޓީ ދުވަސް ހުކުރުގެ ބަދަލުގައި އާދީއްތަ އަށް ބަދަލު ކުރަން ނިންމާފައި ވާއިރު، މީގެ ކުރިން ވެސް އެކުލަވާލި ބައެއް ގަވާއިދުތަކާ މެދު އާއްމުން ނުރުހުން ފާޅުކޮށް، "ސޭވް ލަކްޝަދީބް"ގެ ނަމުގައި މުޒާހަރާ ކުރި އެވެ.
