ނިއު ދިއްލީ، އިންޑިއާ (ޑިސެމްބަރު 21) - އިންޑިއާ އިން ކޮވިޑާ ދެކޮޅަށް ވެކްސިން ދިނުމަށް ހިންގާ ކެމްޕެއިންގެ "މޫނު މައްޗަކީ" ބޮޑު ވަޒީރު ނަރެންދްރަ މޯދީ ކަމަށް ހަދައިގެން އުޅޭތީ ކޯޓަށް މައްސަލަ ހުށަހެޅި މީހަކު ޖޫރިމަނާ ކޮށްފި އެވެ.
ކޮވިޑާ ދެކޮޅަށް ވެކްސިން ދިނުމުގައި ސަރުކާރުން ބޮޑެތި ކާމިޔާބު ހޯދާ ކަމަށް އަންގައި، އެ ކެމްޕެއިން އިޝްތިހާރު ކުރަން ހިންގާ ހަރަކާތްތަކުގެ ފޯކަސް އަކީ މޯދީ އެވެ.
ކެމްޕެއިން ޕްރޮމޯޓް ކުރަން ހަރުކޮށްފައިވާ ބޮޑެތި ބިލްބޯޑުތަކާއި، އެއްގަމާއި ވައިގެ އުޅަނދުތަކުގެ ބޭރުގައި އިޝްތިހާރު ކުރަމުން ދަނީ މޯދީގެ ފޮޓޯ ޖަހައިގެންނެވެ. މިހާރު ފަތުރަމުންދާ އިޝްތިހާރުތަކަކީ އެއް ބިލިއަން ޑޯޒް ޖެހުން ފާހަގަކުރުމަށް ފަތުރާ ތަކެއްޗެވެ.
ނަމަވެސް ބަލިމަޑުކަން ފެށުނު ފަހުން އިންޑިއާ ސަރުކާރަށް ވަނީ ބޮޑެތި ފާޑުކިޔުން އަމާޒުވެފަ އެވެ. ބައެއް ސިޔާސީ ފަރާތްތައް ވަނީ ކޮވިޑް ޖެހި މަރުވާ މީހުންގެ ސެޓްފިކެޓުގައި ވެސް މޯދީގެ ފޮޓޯ ޖަހަން ފެންނަ ކަމަށް ބުނެ ޖޯކު ޖަހާފަ އެވެ.
ވެކްސިން ކެމްޕެއިން އިޝްތިހާރު ކުރަން މޯދީގެ ފޮޓޯ ބޭނުންކުރާ މައްސަލައިގައި ހިތްހަމަނުޖެހި، ކޯޓަށް ދިޔައީ ކެރަލާ ސްޓޭޓުގެ ޕީޓާ މިޔަލިޕަރަމްޕިލް ނަމަކަށް ކިޔާ މީހެކެވެ. އޭނާ ބުނީ ވެކްސިން ކެމްޕެއިނަކީ މޯދީގެ ފައިދާ އަށް ހިންގާ އެއްޗަކަށް ވުމުގެ ނުރައްކާ ބޮޑުވެއްޖެ ކަމަށެވެ.
މިޔަލިޕަރަމްޕިލްގެ ޕެޓިޝަނުގައި ބުނީ އޭނާ ވެކްސިން ޖެހީ ފައިސާ ދައްކައިގެން ކަމަށާއި އެހެންކަމުން އޭނާ ވެކްސިން ޖެހިކަން އަންގައިދޭ ސެޓްފިކެޓުގައި މޯދީގެ ފޮޓޯ އިންނަން ޖެހޭ ސަބަބެއް ނުވިސްނޭ ކަމަށެވެ.
ނަމަވެސް ކެރަލާ ހައި ކޯޓުން މައްސަލަ ބޭރު ކުރަމުން ބުނީ އެ ޕެޓިޝަނަކީ ސިޔާސީ މަގުސަދެއްގައި ހުށަހެޅި އެއްޗެއް ކަމަށާއި، ކޯޓުގެ ވަގުތު ބޭކާރު ކުރުމުން 1،322 ޑޮލަރުގެ ޖޫރިމަނާއެއް ދައްކަން ޖެހޭނެ ކަމަށެވެ.
"ޕެޓިޝަން ހުށަހެޅި ފަރާތުން ބޮޑު ވަޒީރުގެ ފޮޓޯ އަށް ބަލަން ލަދުގަންނަ ނަމަ، ސެޓްފިކެޓްގެ އަނެއް ފުށަށް ބެލިދާނެ،" ކޯޓުން މައްސަލަ ބޭރުކޮށްލަމުން ބުންޏެވެ.
މިޔަލިޕަރަމްޕިލްގެ ވަކީލުން ބުނީ ކޯޓުގެ ނިންމުން އިސްތިއުނާފު ކުރާނެ ކަމަށެވެ.
އިންޑިއާގައި ކޮވިޑް ޖެހިގެން 477،000 އަށް ވުރެ ގިނަ މީހުން މަރުވެފައި ވެ އެވެ. އެމެރިކާ އާއި ބްރެޒިލް އަށް ފަހު ތިން ވަނަ އަށް އެންމެ ގިނަ މީހުން މަރުވީ އިންޑިއާ އިންނެވެ.
ކެމްޕެއިން އިޝްތިހާރު ކުރަން މޯދީގެ ފޮޓޯ ބޭނުން ކުރުން ދިފާއު ކުރަމުން ސަރުކާރުން މިދިޔަ އޯގަސްޓް މަހު ބުނީ އެކަމުގެ ސަބަބުން ކޮވިޑާ މެދު ހޭލުންތެރިކަން އިތުރުވަމުންދާ ކަމަށެވެ.
