ބެއިރޫތް، ލުބްނާން (ޑިސެމްބަރު 20) - އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް އާދީއްތަ ދުވަހު ލުބްނާނަށް ވަޑައިގެން ގައުމުގެ ވެރިންނަށް ވަރަށް ބޮޑަށް ފާޑުވިދާޅުވެއްޖެ އެވެ.
"އަޅުގަނޑު މި އައީ ކުޑަ މެސެޖެއް ހިފައިގެން: އދ. އިން ދެމިއޮންނާނީ ލުބްނާން ރައްޔިތުންނާ އެކު،" ރައީސް މިޝޭލް އައޫންއާ އެކު ބޭއްވި ޕްރެސް ކޮންފެރެންސްގައި ގުޓެރޭޒް ވިދާޅުވި އެވެ.
"ލުބްނާންގެ ރައްޔިތުން އުޅެން ޖެހިފައިވާ ހާލު ފެންނަމުން ދާއިރު، ލުބްނާންގެ ވެރިންނަށް ބައިބައިވެ، ގައުމުގެ ޕެރެލައިޒް ކުރުމުގެ ހައްގު ލިބިގެންނެއް ނުވާނެ،" އޭނާ ވިދާޅުވި އެވެ.
ގުޓެރޭޒް ވިދާޅުވީ ލުބްނާންގައި ބާއްވާ މަޝްވަރާތަކުގެ އަމާޒަކީ އިގްތިސާދީ އަދި މާލީ ކާރިސާ އިން އަރައިގަނެ، ސުލްހަ އާއި ހަމަޖެހުން އަދި ދެމެހެއްޓެނިވި ތަރައްގީ ގެނެވޭނެ ގޮތްތައް ހޯދުން ކަމަށެވެ.
ލުބްނާނަށް މިހާރު ކުރިމަތިވެފައިވާ އިގްތިސާދީ ހާލަތަކީ 1850 ވަނަ އަހަރުގެ ފަހުން ދުނިޔޭގެ ގައުމަކަށް ކުރިމަތިވެފައިވާ އެންމެ ގޯސް ހާލަތުގެ ގޮތުގައި ވޯލްޑް ބޭންކުން ސިފަކުރެ އެވެ.
އެ ހާލަތު ދިމާވީ ވެރިންގެ މެދުގައި އޮތް ކޮރަޕްޝަނާއި ބާރުތަކަށް ތަޅާފޮޅުމުގެ އާދައާ ހެދި ކަމަށް ރައްޔިތުން ތުހުމަތު ކުރެ އެވެ. އެ ގައުމުގެ 80 ޕަސެންޓު މީހުން މިހާރު އުޅެނީ ފަގީރު ހާލަތުގަ އެވެ.
"ލުބްނާން ރައްޔިތުން ވެރިންގެ ކިބައިން ބޭނުން ވަނީ އިގްތިސާދު އަލުން ހަމައަކަށް އަޅުވައި، ހަރުދަނާ ސަރުކާރަކާއި މުއައްސަސާތައް ގާއިމްކޮށްދިނުން،" ގުޓެރޭޒް ވިދާޅުވި އެވެ.
ސަރުކާރުގެ ތެރޭގައި އޮތް ހަމަނުޖެހުމާ ހެދި އޮކްޓޯބަރު މަހުން ފެށިގެން ކެބިނެޓް ބައްދަލުވުމެއް ބޭއްވިފައި ނުވާއިރު، އެންމެ ބޮޑު ދެބަސްވުމަކީ ބެއިރޫތު ބަނދަރުގައި 2020 ވަނަ އަހަރު ހިނގި ގޮވުން ތަހުގީގު ކުރާ ޓީމުގެ ވެރިޔަކަށް ހަމަޖެއްސި ފަނޑިޔާރާ މެދު އޮތް ދެބަސްވުމެވެ.
ބެއިރޫތު ބަނދަރުގައި ގަވާއިދާ ހިލާފަށް ކެމިކަލް ބަހައްޓާފައި ހުރުމުން ދިމާވި ގޮވުމުގައި 215 މީހުން މަރުވެ، ވެރަރަށުގެ ބޮޑު ބައެއް އެއްކޮށް ސުންނާފަތިވި އެވެ.
ގުޓެރޭޒް ވެރިންނަށް ގޮވާލެއްވީ ސިޔާސީ ހިޔާލު ތަފާތުވުންތައް ބޭއްވުމަށް ފަހު، ރައްޔިތުންގެ ހައްގުގައި މަސައްކަތް ކުރުމަށެވެ. އަދި ބައިނަލްއަގްވާމީ މުޖުތަމައިން ލުބްނާނަށް އެހީވުމަށް ވެސް ގޮވާލެއްވި އެވެ.
ހޯމަ ދުވަހު ގުޓަރޭޒް ބެއިރޫތު ބަނދަރަށް ވަޑައިގެން، ގޮވުމުގެ މަރުވި މީހުންގެ ހަނދާނުގައި ހަމަހިމޭންކަމުގެ ސުކޫތެއް ފާހަގަކުރައްވާނެ އެވެ. ބުދަ ދުވަހު ފުރާވަޑައިގެންނެވުމުގެ ކުރިން ލުބްނާންގެ ގިނަ ވެރިންނާ ބައްދަލުކުރައްވާނެ އެވެ.
