ސްރީލަންކާގެ ބޭރު ފައިސާގެ ރިޒާވް ވަރަށް ބޮޑަށް ދަށްވެފައި ވާތީ ތިން ގައުމަކުން ލޯން ނެގުމާ މެދު ސަރުކާރުން ވިސްނަމުންދާ ކަމަށް ނޫސްތަކުން ރިޕޯޓުކޮށްފި އެވެ.
ސަންޑޭ ލަންކަދީޕާ ނޫހުން ބުނީ ސަރުކާރުން ވިސްނަނީ ޖަޕާން، ރަޝިއާ އަދި ޗައިނާގެ އެހީއަށް އެދި، އެ ގައުމުތަކުން ލޯނު ލިބޭނެ ގޮތެއް ވޭތޯ ބެލުމަށް ކަމަށެވެ.
މިދިޔަ ހަފުތާގައި އޮތް ކެބިނެޓް ބައްދަލުވުމެއްގައި ފިނޭންސް މިނިސްޓަރު ބެސިލް ރާޖަޕަކްސަ ވެސް ވިދާޅުވެފައި ވަނީ އެކުވެރި ގައުމުތަކާ އެކު މަޝްވަރާ ކުރަމުންދާ ކަމަށެވެ.
އެގޮތުން ދާދި ފަހުން އިންޑިއާ އަށް ކުރެއްވި ދަތުރު ވަރަށް ކާމިޔާބު ކަމަށާއި ލޯންގެ ގޮތުގައި 1.4 ބިލިއަން ޑޮލަރު ދޭން އިންޑިއާ އިން އެއްބަސްވެފައިވާ ކަމަށް ބެސިލް ވިދާޅުވި އެވެ.
އޭގެ އިތުރުން އިންޓަނޭޝަނަލް މަނިޓަރީ ފަންޑު (އައިއެމްއެފް) އާ އެކު ވެސް މަޝްވަރާ ކުރިއަށްދާ ކަމަށް ކެބިނެޓް ބައްދަލުވުމުގައި ބެސިލް ވިދާޅުވި އެވެ.
ލަންކާ މަރުކަޒީ ބޭންކުގެ ގަވަރުނަރު އަޖިތު ނިވަރްދް ކަބްރާލް އާދީއްތަ ދުވަހު ވިދާޅުވީ އަންނަ ހަފުތާ ފެށޭއިރު ބޭރު ފައިސާގެ ރިޒާވަށް ފައިސާ އިތުރުވާނެކަމުގެ އުއްމީދު ބޮޑު ކަމަށެވެ.
