ކާބުލް، އަފްގާނިސްތާން (ޑިސެމްބަރު 17) - އަފްގާނިސްތާނުގެ ކުރީ ސަރުކާރުގެ ފަރާތުން އދ. އަށް ކަނޑައެޅި މަންދޫބު މަގާމު ދޫކޮށްލުމާ އެކު ތާލިބާން ސަރުކާރުން މަންދޫބަކު ކަނޑައެޅުމުގެ ފުރުސަތު ހޯދަން އަނެއްކާވެސް އެދެފި އެވެ.
އދ. ގައި އަފްގާނިސްތާނަށް ހާއްސަ ގޮނޑި އާއި ބައެއް ގައުމުތަކުގައި ހުރި އަފްގާން އެމްބަސީތަކުގެ މައްސަލައިގައި ތާލިބާނުން ތިބީ ހިތްހަމަނުޖެހިފަ އެވެ. ކުރީ ސަރުކާރުގެ އޮފިޝަލުން މަގާމުތަކުގައި ދެމިތިބުމުން، ތާލިބާނުންނަށް މަންދޫބުން ކަނޑައެޅޭކަށް ނެތެވެ.
މިދިޔަ އޯގަސްޓު މަހު އަފްގާނިސްތާނުގެ ގާނޫނީ ސަރުކާރު ވައްޓާލުމަށް ފަހު ވެރިކަމަށް އައި ތާލިބާނުންގެ ސަރުކާރުން އެއްވެސް ގައުމަކުން އަދި ބަލައެއްނުގަނެ އެވެ. ނަމަވެސް އެއީ ތާލިބާނުން ވަރަށް ބޮޑަށް ބޭނުންވާ ކަމެކެވެ.
އދ. ގެ އެސިސްޓެންޓް ތަރުޖަމާނު ފަރްހާން ހައްގު އޭއެފްޕީ އަށް ވިދާޅުވީ އަފްގާނިސްތާނުގެ މަންދޫބު ގުލާމް އިސަކްޒާއީ ޑިސެމްބަރު 15 ވަނަ ދުވަހުން ފެށިގެން މަގާމުން ވަކިވެފައިވާ ކަމަށެވެ. ތާލިބާނުން ބޭނުން ވަނީ އދ. އަށް ކަނޑައަޅާ މަންދޫބަކަށް ސުހެއިލް ޝަހީން ހަމަޖެއްސުމަށެވެ.
މަގާމު ހުސްވިކަން އެނގުމާ އެކު ތާލިބާނުން ބުނީ އެ ގޮނޑި ދޭން ޖެހޭނީ އަފްގާނިސްތާނުގައި މިހާރު އޮތް ސަރުކާރަށް ކަމަށެވެ. ޝަހީން ޓްވިޓާގައި ބުނީ މިހާރު އޮތް ތާލިބާން ސަރުކާރަކީ މުޅި އަފްގާނިސްތާނުގެ އިސްގްލާލް ދެމެހެއްޓުމަށް އޮތް ސަރުކާރެއް ކަމަށެވެ.
ތާލިބާނުންނަށް އދ. ގައި އަފްގާނިސްތާން ތަމްސީލް ކުރުމުގެ ފުރުސަތު ދިނުމާ ގުޅޭ މައްސަލައިގެ ގަރާރު މުއްދަތެއް ނެތް ގޮތަށް ފަސްކުރަން އދ. ގެ އާއްމު މަޖިލީހުން ޑިސެމްބަރު މަހުގެ ކުރީކޮޅު ފާސްކުރި އެވެ.
ތާލިބާނުން ވެރިކަމަށް އައިތާ މަހެއް ފަހުން ވެސް އަފްގާނިސްތާނު ތަމްސީލް ކުރީ އިސަކްޒާއީ އެވެ. އޭނާ ވަނީ ނޮވެމްބަރު މަހު ސަލާމަތީ މަޖިލީހުގައި ވެސް ތާލިބާން ސަރުކާރަށް ފާޑުވިދާޅުވެފަ އެވެ.
މީގެ ކުރިން 1996 އިން 2001 އަށް ތާލިބާނުން ވެރިކަން ކުރިއިރު ވެސް، އދ. ގެ ގޮނޑިއެއް ނުލިބުނެވެ. އޭރު ތާލިބާނުންގެ ވެރިކަން ބަލައިގަތީ ހަމައެކަނި ޕާކިސްތާނާއި ސައުދީ އަރަބިއްޔާ އަދި ޔޫއޭއީ އިންނެވެ.
މިހާރު އދ. އަށް ކަނޑައަޅަން ތާލިބާނުން ބޭނުންވާ ޝަހީން އަކީ ކުރިން އޮތް ތާލިބާން ސަރުކާރުން ޕާކިސްތާނަށް ކަނޑައެޅި ޑެޕިއުޓީ ސަފީރެވެ. ތާލިބާން ވެރިކަން ވެއްޓުމުން އޭނާ ހުރީ ތަރުޖަމާނަކަށެވެ.
