ކާބުލް، އަފްގާނިސްތާން (ޑިސެމްބަރު 17) - ބޭރުގެ އެހީގެ ގޮތުގައި އާމްދަނީ ލިބޭނެ ކަމަށް ނުހިމަނައި އަފްގާނިސްތާން ދައުލަތުގެ ބަޖެޓު ތައްޔާރުކޮށްފި އެވެ. މިއީ ވިހި އަހަރުގެ ތެރޭގައި މިގޮތަށް ތައްޔާރުކުރި ފުރަތަމަ ބަޖެޓެވެ.
މިދިޔަ އޯގަސްޓް މަހު، ގާނޫނީ ސަރުކާރު ވައްޓާލުމަށް ފަހު ތާލިބާނުން ވެރިކަމާ ހަވާލުވުމުން ބޭރުގެ އެހީތައް ވަނީ ހިފަހައްޓާފަ އެވެ. އެހެންވެ، އަފްގާނިސްތާނަށް ވަނީ އިގްތިސާދީ އަދި އިންސާނީ ކާރިސާއެއް ދިމާވެފަ އެވެ.
ފިނޭންސް މިނިސްޓްރީގެ ތަރުޖަމާނު އަހްމަދު ވަލީ ހަގްމަލް ބުނީ 2022 ވަނަ އަހަރުގެ ޑިސެމްބަރު މަހާ ހަމައަށް އެކުލަވާލި ޑްރާފްޓް ބަޖެޓު ފާސްކުރާނީ ކެބިނެޓުން ކަމަށެވެ. ބަޖެޓާ ބެހޭ ތަފްސީލް އޭގެ ފަހުން ހާމަކުރާނެ ކަމަށް އޭނާ ބުންޏެވެ.
ޓީވީއަކަށް ދިން އިންޓަވިއުއެއްގައި ހަގްމަލް ބުނީ ސަރުކާރުން މަސައްކަތް ކުރާނީ އެތެރޭގެ އާމްދަނީ އިން ބަޖެޓަށް ފައިސާ ހަމަޖައްސަން ކަމަށާއި އެކަން ހާސިލްވުމުގެ އުއްމީދު ބޮޑު ކަމަށެވެ.
ބޭރުގެ އެހީގެ މެދުކަނޑާލުމުގެ އިތުރުން އަފްގާނިސްތާނުގެ މަރުކަޒީ ބޭންކުގެ ބިލިއަނަކަށް ވުރެ ގިނަ ޑޮލަރު އެމެރިކާ އިން ވަނީ ހިފަހައްޓާފަ އެވެ.
އަފްގާނިސްތާނުގެ ކުރީގެ ސަރުކާރުން 2021 ވަނަ އަހަރަށް ބަޖެޓު ކަނޑައެޅީ އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ އެހީއާ އެކު އެވެ. ބޭރުގެ އެހީގެ ގޮތުގައި 2.7 ބިލިއަން ޑޮލަރު އަދި އެތެރޭގެ އާމްދަނީ އިން 2.1 ބިލިއަން ޑޮލަރު ހޯދޭނެ ކަމަށް ލަފާކުރި ނަމަވެސް، އެއީ ޑެފިސިޓް ބަޖެޓެކެވެ.
އޭރު ޑޮލަރަކަށް ޖެހޭ އަގަކީ 80 އަފްގާނީ އެވެ. ނަމަވެސް ތާލިބާނުން ވެރިކަމަށް އައުމަށް ފަހު ފައިސާގެ އަގު ވެސް ވަނީ ވަރަށް ބޮޑަށް ވެއްޓިފަ އެވެ. އެގޮތުން މިދިޔަ ހޯމަ ދުވަހު ޑޮލަރަކަށް ޖެހުނީ 130 އަފްގާނީ އެވެ.
ހަގްމަލް ބުނީ ސަރުކާރުން މުވައްޒަފުންނަށް އަދިވެސް މުސާރަ ނުދެވޭ ކަމަށާއި، އެކަން ހައްލު ކުރަން މަސައްކަތް ކުރާ ކަމަށެވެ. އޭގެ އިތުރުން މުވައްޒަފުންގެ މުސާރައިގެ އާ އޮނިގަނޑެއް ހަދާފައިވާ ކަމަށް ބުންޏެވެ.
ތާލިބާން ސަރުކާރުން މިދިޔަ މަހު ބުނީ ދެ މަސް ތެރޭގައި 26 ބިލިއަން އަފްގާނީގެ އާމްދަނީއެއް ލިބުނު ކަމަށާއި 13 ބިލިއަން އަފްގާނީ ލިބުނީ ކަސްޓަމްސް ޑިއުޓީ އިން ކަމަށެވެ. އޭގެ އިތުރުން ފަގީރުންނާއި ޔަތީމު އަދި މިސްކީނު ކުދިންނަށް ހާއްސަ މަޝްރޫއުތައް ހިންގަން ހާއްސަ ޓެކްސެއް މިދިޔަ މަހު ތައާރަފް ކުރި އެވެ.
