މީގެ އަށް އަހަރު ކުރިން ރާއްޖެ ޓީވީ ހިންގަމުންދިޔަ ސްޓޭޝަނަށް ހަމަލާދީ، އެތަނުގައި ހުޅުޖެހި މައްސަލައިގައި ދައުވާކުރި ހ. ގަސްވާ، މުހައްމަދު މީއާދުގެ މައްޗަށް ކުށް ސާބިތުވާ ކަމަށް ކަނޑައަޅައި އޭނާ ދެ އަހަރަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފި އެވެ.
އެ މައްސަލައިގައި މިއަދު ހުކުމް ކުރައްވަމުން ގާޒީ އަލީ އާދަމް ވިދާޅުވީ މީއާދާ ދެކޮޅަށް ދައުލަތުން ހުށަހަޅާފައިވާ ހެކިތަކަށް ބަލާއިރު ރާއްޖޭ ޓީވީގައި ރޯކޮށްލުމުގައި އޭނާ ބައިވެރިވިކަން ޝައްކެއް ނެތް މިންވަރަށް ސާބިތުވާ ކަމަށެވެ.
"މައްސަލަ ސާބިތު ކުރުމަށް ދައުލަތުން ހުށަހަޅާފައިވާ އެންމެހާ ހެކި ގަރީނާތައް ޝަރީއަތުން ވަޒަންކޮށް ބެލި ބެލުމުން، މުހައްމަދު މީއާދުގެ މައްޗަށް ދައުލަތުން ކުޅަ މި ދައުވާ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 51 ވަނަ މާއްދާގެ އ. ގައި ބަޔާންކޮށްފައިވާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާ ކަމަށް ކަނޑައަޅައިފިން،" ހުކުމް ކުރައްވަމުން ގާޒީ ވިދާޅުވި އެވެ.
އެ މައްސަލައިގައި މީއާދުގެ މައްޗަށް ދައުވާ ކުރީ ޓެރަރިޒަމް މަނާ ކުރުމުގެ ގާނޫނުގެ ދަށުންކަމުގައިވި ނަމަވެސް އޭނާއަށް އަދަބު ކަނޑައަޅާފައިވަނީ ގާނޫނުލް އުގޫބާތުގެ ދަށުންނެވެ. ސަބަބެއް ކަމަށް ގާޒީ ވިދާޅުވީ، މީއާދުގެ މައްޗަށް ފުރަތަމަ ދައުވާ ކުރީ ޓެރަރިޒަމް މަނާ ކުރުމުގެ ކުރީގެ ގާނޫނުގެ ދަށުން ކަމަށްވެފައި، އާ ޓެރަރިޒަމްގެ ގާނޫނުގައި އޭނާ ކުރި އަމަލު ތަޖްރީމުކޮށްފައި ނުވަތަ ކުށަކަށް ހަދާފައިނެތުމެވެ.
"ޓެރަރިޒަމް މަނާ ކުރުމުގެ ގާނޫނުގައި މި ކުށް ތަޖްރީމް ކުރާ މާއްދާއެއް ހިމެނިފައިނުވާތީ މި ކުށުގެ ހާދިސާ ހިނގާފައިވާ ގޮތަށާއި މި ހާދިސާގެ ސަބަބުން ލިބުނު ގެއްލުންތަކަށް ބަލާއިރު މިހާރު މި ކުށް ފެތެނީ ގާނޫނުލް އުގޫބާތުގެ 220 ވަނަ މާއްދާގެ އެއް ވަނަ ނަންބަރާ ހަވާލާދީ އެ މާއްދާގެ ރ. ގެ އެއް ވަނަ ނަންބަރުގެ ދަށުން މުދަލަށް ގެއްލުންދިނުމުގެ ކުށަށް،" ހުކުމް އިއްވަމުން ގާޒީ ވިދާޅުވެފައިވެ އެވެ.
ރާއްޖެ ޓީވީ ރޯކޮށްލުމުގައި މީއާދު އަމަލު ކުރީ "ފަރުވާލެއް ނެތް އަނިޔާވެރިކަމެއް ދެއްކުމާއެކުގައި" ކަމަށް ވެސް ގާޒީ ކަނޑައެޅި އެވެ. އެހެންކަމުން އޭނާގެ މައްޗަށް ކަނޑައަޅާފައި ވަނީ އަދަބު ކަނޑައެޅި މާއްދާއިން ދެވޭ އެންމެ ބޮޑު އަދަބެވެ.
މައްސަލާގައި މީއާދާ ދެކޮޅަށް ބޭނުންކުރި އެންމެ ބޮޑު ހެއްކަކީ އަންގި އެވެ. އެ އަންގި، ރާއްޖޭޓީވީގައި ރޯކޮށްލާ މަންޒަރު ފެންނަ ސީސީޓީވީ ފްޓޭޖުން ފެނެ އެވެ. ފަހުން، އެ ސަރަހައްދު މަގުމަތިން ފުލުހުން ވަނީ އަންގީގެ އެއް ކިބަ ހޯދައިފަ އެވެ.
ދައުލަތުން ހުށަހެޅި ހެކިން އެނގޭ ގޮތުގައި އެ އަންގި ކިބައިން މީއާދުގެ ޑީއެންއޭ ވަނީ ފެނިފަ އެވެ. އަދި، ސީސީޓީވީ ފްޓޭޖުން ފެންނަ އަންގި އާއި ފުލުހުން ހޯދި އަންގިއާ އެއްގޮތް ސިފަތަކެއް ފާހަގަ ކުރެވުނެވެ. އެހެންވެ، އެ އަންގިއާ މީއާދާ ވަނީ ދައުލަތުން ގުޅުވާފަ އެވެ.
ރާއްޖެ ޓީވީ ރޯކޮށްލި މައްސަލައިގައި މީއާދުގެ އިތުރުން އިތުރު ފަސް މީހެއްގެ މައްޗަށް ދައުވާ ކުރުމަށް ފުލުހުން ފޮނުވި އެވެ. ނަމަވެސް އެ މައްސަލައިގައި މީއާދު ފިޔަވައި އިތުރު މީހެއްގެ މައްޗަށް ދައުވާ އުފުލާފައެއް ނުވެ އެވެ.
