މިދިޔަ އޯގަސްޓު މަހު ތާލިބާނުން އަފްގާނިސްތާނުގެ ވެރިކަމަށް އައި ފަހުން ގާނޫނާ ހިލާފަށް 100 އަށް ވުރެ ގިނަ މީހުން މަރާފައިވާ ކަމަށާއި އެންމެ ގިނަ މީހުން މެރުމުގެ ފަހަތުގައި ވަނީ ތާލިބާނުން ކަމަށް އދ. އިން ބުނެފި އެވެ.
އދ. ގެ އިންސާނީ ހައްގުތަކާ ބެހޭ ޑެޕިއުޓީ ޗީފް ނަދާ އަލް ނާޝިފް ވިދާޅުވީ ގިނަ ބަޔަކު މަރަމުންދާކަމުގެ ރިޕޯޓުތައް ލިބޭތީ ކަންބޮޑުވާ ކަމަށެވެ. ތާލިބާނުން ވެރިކަމަށް އައުމަށް ފަހު ވައުދުވީ އެއްވެސް މީހެއްގެ ފަރާތުން ބަދަލު ނުހިފާނެ ކަމަށެވެ.
"އޯގަސްޓާއި ނޮވެމްބަރާ ދެމެދު އަފްގާން ކުރީގެ ސިފައިންނާއި ކުރީ ސަރުކާރުގެ 100 އަށް ވުރެ ގިނަ އޮފިޝަލުން މެރިކަމުގެ ސާބިތު ހެކި ލިބިފައިވޭ،" އދ. ގެ އިންސާނީ ހައްގުތަކާ ބެހޭ ކައުންސިލްގައި އެކަމަނާ ވިދާޅުވި އެވެ.
"އޭގެ ތެރެއިން މަދުވެގެން 72 މީހުންގެ މަރުގެ ފަހަތުގައި ވަނީ ތާލިބާނުން."
"ބައެއް މީހުން މެރުމަށް ފަހު، އާއްމުންނަށް ދައްކަން ތަންތަނުގައި ޑިސްޕްލޭ ކުރި. އެކަމުގެ ސަބަބުން އާބާދީގެ ގިނަ ބަޔަކު ދިރިއުޅެނީ ބިރުވެރިކަމުގައި."
މި މަހުގެ ކުރީކޮޅު ހިޔުމަން ރައިޓްސް ވޮޗް އިން ނެރުނު ރިޕޯޓެއްގައި ވެސް ބުނީ އަފްގާން ކުރީގެ ސިފައިންނާއި ކުރީގެ ސަރުކާރުގެ 47 އޮފިޝަލުން މަރާލާފައިވާ ކަމަށެވެ. އެކަމާ މެދު ގައުމުތަކުން ކުރިން ކަންބޮޑުވުން ފާޅުކުރި އެވެ.
ތާލިބާނުންގެ ތަރުޖަމާނު ގާރީ ސަޔިދު ހޮސްތީ ބުނީ އެއީ ދޮގު ރިޕޯޓެއް ކަމަށާއި މަރުތަކުގެ ވާހަކަ ހިމަނާފައު ވަނީ ހެއްކެއް ނެތި ކަމަށެވެ. އަދި ބައެއް މީހުން މަރުވެފައި ވަނީ ޒާތީ މައްސަލަތަކުގައި ކަމަށާއި އެއީ ތާލިބާނާ ގުޅޭ ކަމެއް ނޫން ކަމަށް ބުންޏެވެ.
