އދ., އެމެރިކާ (ޑިސެމްބަރު 14) - މޫސުމީ ބަދަލާއި ދުނިޔޭގެ ސަލާމަތާ ގުޅުމެއްވާ ކަމަށް ރަސްމީކޮށް ލިންކު ކުރުމަށް ހުށަހެޅި ގަރާރެއް އދ. ގެ ސަލާމަތީ މަޖިލީހުގައި ރަޝިއާ އިން ވީޓޯކޮށްފި އެވެ.
އދ. ގެ މެމްބަރު ގައުމުތަކުގެ މެޖޯރިޓީ ތާއީދު އޮތް އެ ގަރާރާ ދެކޮޅަށް ދެން ވޯޓު ދިނީ އިންޑިއާ އެވެ. ޗައިނާ އިން ވަކިކޮޅަކަށް ޖެހިފައެއް ނުވެ އެވެ.
ނައިޖާ އާއި އަޔަލޭންޑުގެ ތާއީދާ އެކު ހުށަހެޅި ގަރާރުގައި އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް އަށް ގޮވާލަނީ ދުނިޔޭގެ ސަލާމަތާ ގުޅޭ ކަންކަމުގެ ތެރޭގައި މޫސުމީ ބަދަލާ ގުޅޭ ކަންކަން ހިމަނައިގެން ގޮތް ނިންމުމަށެވެ.
ސަލާމަތީ މަޖިލީހުގެ 15 މެމްބަރުންގެ ތެރެއިން 12 މެމްބަރުންގެ ތާއީދު އެޔަށް ލިބުނެވެ. ނަމަވެސް ވީޓޯ ކުރުމުގެ ބާރު އޮތް ރަޝިއާ އިން، އެ ބާރު ބޭނުންކުރުމާ އެކު ގަރާރު ބާތިލްވާނެ އެވެ.
ގަރާރާ ދެކޮޅަށް ވޯޓު ދިން އިންޑިއާ އިން ބުނީ މޫސުމީ ބަދަލަކީ ސަލާމަތާ ގުޅޭ މައްސަލައެއް ނޫން ކަމަށާއި އެއީ އިގްތިސާދީ ތަރައްގީއާ ގުޅޭ މައްސަލައެއް ކަމަށެވެ.
އެމެރިކާ އިން އދ. އަށް ކަނޑައަޅާފައި ހުންނަ މަންދޫބު ލިންޑާ ތޯމަސް ގްރީންފީލްޑް ވިދާޅުވީ ރަޝިއާ އިން ވީޓޯ ކުރުމުގެ ބާރު ބޭނުންކުރީ އެއްވެސް ސަބަބެއް ނެތި ކަމަށެވެ.
އެކަމާ ގުޅިގެން ނައިޖާ އާއި އަޔަލޭންޑުން ވަނީ ސަލާމަތީ މަޖިލީހުގެ ދާއިމީ މެމްބަރުންނަށް ލިބިދޭ ވީޓޯ ކުރުމުގެ ބާރަށް ފާޑުކިޔައިފަ އެވެ.
ދެ ވަނަ ބޮޑު ހަނގުރާމަ އަށް ފަހު އދ. އުފެދުނީއްސުރެ މިއަދާ ހަމައަށް ވެސް ދާއިމީ މެމްބަރުންނަށް ވީޓޯ ކުރުމުގެ ބާރު އޮވެ އެވެ. ދާއިމީ މެމްބަރުންނަކީ އެމެރިކާ، އިނގިރޭސިވިލާތް، ފްރާންސް، ރަޝިއާ އަދި ޗައިނާ އެވެ.
