ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު ހުސެއިން ވަހީދު އަވަހާރަވުމަކީ ރާއްޖެއަށާއި ރައްޔިތުންގެ މަޖިލީހަށް ލިބުނު ވަރަށް ބޮޑު ނިކަމެތިކަމެއް ކަމަށްކަން ފާހަގަކޮށް އޭނާ އަވަހާރަވުމުގެ ހިތާމަ މަޖިލީހުގެ އިދާރާއިން ފާޅުކޮށްފި އެވެ.
ކެންސަރުގެ އާލާސްކަންފުޅެއްގައި ފަރުވާ ހޯއްދަވަމުން ގެންދަވާތާ ގިނަ ދުވަސްތަކެއް ވެފައިވަނިކޮށް ހުސެއިން އަވަހާރަވީ އުމުރުން 53 އަހަރުގެ ރޭ މާލޭ އޭޑީކޭ ހޮސްޕިޓަލުގަ އެވެ.
މަޖިލީހުން މިއަދު ނެރުނު ބަޔާނުގައި ބުނި ގޮތުގައި އެ މަޖިލީހުގެ ރައީސް މުހައްމަދު ނަޝީދު، އޭނާ ސިފަކުރެއްވީ އިހުލާސްތެރި ބައިވެރިއެއްގެ ގޮތުގައި ކަމަށެވެ.
"މެމްބަރު ހުސެއިން ވަހީދުއަކީ ދިވެހިރާއްޖޭގައި ގިނަ ޕާޓީ އެކުލެވޭ ޑިމޮކްރަސީއަށް އަނބުރާލުމުގައި ބޮޑު ދައުރެއް އަދާކުރެއްވި އިހްލާސްތެރި ބައިވެރިއެއް. (އެއީ) އެމްޑީޕީގެ ވަރުގަދަ ތަނބެއް،" ނަޝީދުއާ ހަވާލާދެއްވައި ބަޔާނުގައިވެ އެވެ.
"ރައްޔިތުންގެ މަޖިލީހާއި ދައުލަތަށް އިހުލާސްތެރި ހިދުމަތްތަކެއްކޮށްދެއްވި ހުސެއިން ވަހީދު އަވަހާރަވުމަކީ ރާއްޖެއަށާއި ރައްޔިތުންގެ މަޖިލީހަށް ލިބުނު ވަރަށް ބޮޑު ނިކަމެތިކަމެކެވެ."
މިއަދުގެ މެންދުރުނަމާދަށް ފަހު އިސްލާމީ މަރުކަޒުގައި އޮތް ހުސެއިންގެ ކަށުނަމާދުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި މަޖިލީހުގެ ރައީސް ނަޝީދު ބައިވެރިވެވަޑައިގެންނެވި އެވެ.
މެމްބަރު ހުސެއިން ވަހީދު.
ހުސެއިން ވަނީ 17 ވަނަ އަހަރު މަޖިލީހުގައި ވެސް ކޮމަންޑޫ ދާއިރާގެ މެމްބަރުކަންކުރައްވައިފަ އެވެ. މި ދައުރުގައި އޭނާ ވަނީ މާލިއްޔަތު ކޮމިޓީ އާއި އިމްތިޔާޒް ކޮމިޓީ އާއި ސުލޫކް ކޮމިޓީ އާއި ބަޖެޓު ދިރާސާކުރާ ކޮމިޓީ އާއި މާލިއްޔަތު ކޮމިޓީ އާއި ލާމަރުކަޒީ ކޮމިޓީގެ ޖޮއިން ކޮމިޓީގައި މަސައްކަތްކުރައްވައިފަ އެވެ.
މިދިޔަ އަހަރުން ފެށިގެން ދުބާއީގައި ގިނަ ދުވަސްތަކެއް ވަންދެން ފަރުވާ ހޯއްދެވުމަށް ފަހު ހުސައިން މާލެ ވަޑައިގެން ރައްޔިތުންގެ މަޖިލީހުގެ ޖަލްސާތަކުގައި އަލުން ބައިވެރިވެވަޑައިގަންނަވަން ފެއްޓެވީ މި އަހަރުގެ މާޗު 29 ގަ އެވެ.
އެއަށް ފަހު، މާޗް 30 ވަނަ ދުވަހު ބޭއްވި މަޖިލީހުގެ ޖަލްސާގަ މަސްވެރިކަމުގެ ބިލަށް އޭނާ ވާހަކަ ދައްކަވަން ފެއްޓެވުމުގެ ކުރިން ވިދާޅުވީ ބޭސްފަރުވާ އަށް ރާއްޖޭން ބޭރުގައި ހޭދަ ކުރެއްވި ދުވަސްތަކުގައި ވަރަށް ގާތް ރައްޓެހިންނާއި ދާއިރާގެ އެކިއެކި ރައްޔިތުންނާއި ހެޔޮ އެދޭ އެތައް އިއްޒަތްތެރި މެމްބަރުންނެއް ގުޅުއްވައި ހާލު ބައްލަވަމުން ދިޔަ ކަމަށްޓަކައި އުފާ ކުރައްވާ ކަމަށެވެ. އެ ފަރާތްތަކަށް ޝުކުރު އަދާކުރެއްވެވި އެވެ.
މިދިޔަ ސެޕްޓެމްބަރު މަހު ރައީސް އިބްރާހިމް މުހައްމަދު ސޯލިހު ށ. އަތޮޅަށާއި ރ. އަތޮޅަށް ކުރެއްވި ދަތުރުފުޅުގައި ށ. ފޯކައިދޫން މަރުހަބާ ވިދާޅުވެ، އަދި ރަށުގައި ބޭއްވި ބައްދަލުވުންތަކުގައި އެ މަނިކުފާނުގެ އަރިހުގައި ވެސް ހުސައިން ބައިވެރިވެ ވަޑައިގެންނެވި އެވެ.
ހުސެއިން އަކީ މަޝްހޫރު ވިޔަފާރިވެރިއެއް ވެސް މެ އެވެ. އެގޮތުން ޓިމްބާ ހައުސް ޕްރައިވެޓް ލިމިޓެޑާއި ޔުނައިޓެޑް ފުޑް ސަޕްލައި ޕްރައިވެޓް ލިމިޑެޓުގައި އޭނާގެ ހިއްސާ އޮވެ އެވެ.
އަވަހާރަވިއިރު އޭނާގެ ފިރިހެން ބޭފުޅަކާއި ދެ އަންހެން ބޭފުޅުން އަދި އަނބިކަނބަލަކު ދުނިޔޭގައި އެބަ ތިއްބެވި އެވެ.
