އަމިއްލަ މަރު އޮޅުވާލުމުގެ ނިޔަތުގައި ކޮންސްޓްރަކްޝަން މަސައްކަތް ކުރާ މީހަކު މަރާލައި ހަށިގަނޑު އަންދާލި މައްސަލައެއްގައި އިންޑިއާ ފިރިހެނަކު ހައްޔަރުކޮށްފި އެވެ.
ފުލުހުން ބުނީ ސުދޭޝް ކުމާރް ނަމަކަށް ކިޔާ މީހަކު އެ އަމަލު ހިންގީ އޭނާގެ މައްޗަށް ތުހުމަތު ކުރެވޭ އެހެން މަރެއްގެ ޝަރީއަތުން ސަލާމަތްވުމަށް ކަމަށެވެ.
ސުދޭޝް ކުމާރްގެ މައްޗަށް އެންމެ ފުރަތަމަ ތުހުމަތު ކުރެވުނީ ލޯބިވެރިޔާއާ އެކު 2018 ވަނަ އަހަރު ގެއިން ފިލި އޭނާގެ އަންހެން ދަރިފުޅު މަރާލި ކަމަށެވެ.
އެ މައްސަލައިގައި ޖަލުގައި ބަންދުކޮށްފައި ހުއްޓާ އޭނާ ދޫކޮށްލީ ފުރިފައިވާ ޖަލުތަކުގައި ކޮވިޑް ފެތުރިދާނެތީ މިދިޔަ އަހަރު އެޅި ފިޔަވަޅުތަކެއްގެ ތެރެއިންނެވެ.
މިދިޔަ މަހު ވެރިރަށް ނިއު ދިއްލީ ކައިރީގައިވާ ގާޒީއާބާދުގައި މަރުވެފައި އޮތް މީހެއްގެ ހަށިގަނޑު ފުލުހުންނަށް ފެނުނެވެ. ސުދޭޝް ކުމާރްގެ ހެދުމުގައި އޮތް އެ މީހާގެ ވޮލެޓުގައި ސުދޭޝް ކުމާރުގެ އައިޑީކާޑު ވެސް އޮތެވެ.
"ހަށިގަނޑުގައި އޮތީ ރޯކޮށްލާފައި. އެއް ބައި އެއްކޮށް އެނދުމުގެ ސަބަބުން ކާކުކަން ދެނެނުގަނެވޭ ވަރުވެފައި ހަށިގަނޑު އޮތީ،" ފުލުހުންގެ ސުޕްރިންޓެންޑެންޓް އިރާޖް ރާޖާ އޭއެފްޕީ އަށް ވިދާޅުވި އެވެ.
"އަޅުގަނޑުމެން ކުމާރްގެ ގެޔަށް ގޮސް ހަށިގަނޑު އައިޑެންޓިފައިކޮށްދޭން އެދުނިން. އޭނާގެ އަންހެނުން ޔަގީންކުރި ގޮތުގައި އެއީ ކުމާރްގެ ހަށިގަނޑު. އެކަމަކު އަޅުގަނޑުމެންނަށް އެ ވާހަކަ ގަބޫލެއް ނުކުރެވުނު."
ސުދޭޝް ކުމާރް އަދިވެސް ދިރިހުރި ކަމަށް ބުނެ ފުލުހުންނަށް ސިއްރު މައުލޫމާތު ލިބުމުން، މިދިޔަ ހުކުރު ދުވަހު ފުލުހުން އޭނާ ހައްޔަރު ކުރީ ގޭގެ ބޭރުންނެވެ.
"ސުވާލުކުރުމާ އެކު އޭނާ ހުރިހާ ވާހަކައެއް ކިޔައިދީފި،" ރާޖާ ވިދާޅުވި އެވެ.
އެގޮތުން ކޮންސްޓްރަކްޝަން މަސައްކަތެއް ކުރަން ކަމަށް ބުނެ، މީހަކު ގެޔަށް ގެނެސް، އޭނާގެ ހެދުމެއް ދީ، ރާ ބޯން ދިނުމަށް ފަހު، އަނިޔާކޮށް މަރާލީ ކަމަށް ސުދޭޝް ކުމާރު ބުންޏެވެ.
ރާޖާ ވިދާޅުވީ އެ މައްސަލައާ ގުޅިގެން ސުދޭޝް ކުމާރާއި އޭނާގެ އަންހެނުންނަށް ވެސް ދައުވާކޮށްފައިވާ ކަމަށެވެ.
