މިދިޔަ ހަފުތާގައި ހެލިކޮޕްޓަރު ވެއްޓި އަވަހާރަވި އިންޑިއާގެ އަސްކަރީ ވެރިޔާއާ ގުޅޭ ގޮތުން ބަދުބަސް ބުނެ ސޯޝަލް މީޑިއާގައި ޕޯސްޓު ކުރި އަށް މީހުން ހައްޔަރުކޮށްފި އެވެ.
ޖެނެރަލް ބިޕިން ރާވަތު އާއި އަނބިކަނބަލުން އަދި އިތުރު 11 މީހުން ދަތުރު ކުރަމުން ދިޔަ ހެލިކޮޕްޓަރު ވެއްޓި، އެ އެންމެން ވެސް ވަނީ މަރުވެފަ އެވެ.
ޖެނެރަލް ބިޕިން އަކީ ބޮޑު ވަޒީރު ނަރެންދްރަ މޯދީއާ ގާތް އަދި އިންޑިއާގައި މަގްބޫލު ބޭފުޅެކެވެ. ނަމަވެސް ކުރައްވާފައިވާ ބައެއް ކަންކަމަށް އާއްމުންގެ ފާޑުކިޔުން ވެސް އަމާޒުވެ އެވެ.
އެގޮތުން ކަޝްމީރުގައި ޖެނެރަލް ބިޕިންގެ އުޅަނދު ކުރީކޮޅުގައި އާއްމު ރައްޔިތަކު ބަނދެފައި ބޭއްވި މައްސަލައިގައި ވަރަށް ގިނަ ބަޔެއްގެ ފާޑުކިޔުން އަމާޒުވި އެވެ.
އޭނާ އަވަހާރަވުމާ އެކު ހައްޔަރު ކުރި ފުރަތަމަ މީހާ އިންސްޓަގްރާމްގައި ބުނީ "ޖަހަންނަމަށް އެތެރެވުމުގެ ކުރިން" ދިރިހުއްޓާ އަނދާފައިވާ ކަމަށެވެ. އެ ޕޯސްޓު ލިޔުނު މީހާ އާއި އިތުރު ދެ މީހުން ރާޖަސްތާން ސްޓޭޓުން ހައްޔަރު ކުރި އެވެ.
އިންޑިއާގެ ނޫސްތަކުން ބުނީ ފާއިތުވި ހަފުތާ ބަންދުގެ ތެރޭގައި އެކި ސްޓޭޓުތަކުން އިތުރު ފަސް މީހުން ހައްޔަރު ކުރީ "އާއްމުންގެ އިހުސާސްތަކަށް ގެއްލުން ދިނުމުގެ" ތުހުމަތުގައި ކަމަށެވެ.
އޭގެ އިތުރުން ޖައްމު ޑިސްޓްރިކްޓުގައި ޖެނެރަލް ބިޕިން އަވަހާރަވިކަމުގެ ހަބަރަށް ފޭސްބުކްގައި "ލާފް ރިއެކްޓް ކުރި" ކުރި ބޭންކެއްގެ މުވައްޒަފަކު ވަނީ ވަޒީފާ އިން ސަސްޕެންޑުކޮށްފަ އެވެ.
ސޯޝަލް މީޑިއާގައި އާއްމުން އަމަލު ކުރާ ގޮތަށް ބަލާފައި ފިޔަވަޅު އެޅުން ފަހަކަށް އައިސް އިންޑިއާގައި ވަނީ އިތުރުވެފަ އެވެ. އެހެންވެ، އިންޑިއާގައި ހިޔާލު ފާޅުކުރުމުގެ މިނިވަންކަން ނެތެމުންދާ ކަމަށް އެނެލިސްޓުން ދެކެ އެވެ.
މިދިޔަ އޮކްޓޯބަރު މަހު ކްރިކެޓް މެޗަކުން އިންޑިއާގެ ޓީމު ޕާކިސްތާނުގެ އަތުން ބަލިވުމުން، އުފާ ފާޅުކުރި ގިނަ ބަޔަކު ހައްޔަރު ކުރި އެވެ. އޭގެ ތެރެއިން ބައެއް މީހުންނަށް ޓެރަރިޒަމްގެ ތުހުމަތުކޮށް، އަދިވެސް ތިބީ ބަންދުގަ އެވެ.
