ލާމަރުކަޒީ ގާނޫނަށް ގެނެވުނު އިސްލާހާ އެކު ކައުންސިލްތަކަށް ލިބިފައިވާ ބާރުގެ ދަށުން އުފައްދަން އެދިފައިވާ ކުންފުނިތަކަށް ހުއްދަ ދިނުމުގެ ކުރިން، އެކަމަށް އެކަށައެޅިފައިވާ ގަވާއިދަށް އިސްލާހުތަކެއް ގެނައުމުގެ މަސައްކަތް ކުރަމުންދާ ކަމަށް އިކޮނޮމިކް މިނިސްޓްރީއިން ބުނެފި އެވެ.
ރަށު ތަރައްގީއަށް އެކި މަސައްކަތްތައް ކުރުމުގެ ނަމުގައި ރަށްރަށުގެ ކައުންސިލްތަކުންނާއި، އަތޮޅު ކައުންސިލްތަކުގެ އިތުރުން ސިޓީތަކުން ވަނީ ކުންފުނިތައް ރަޖިސްޓްރީ ކުރުމަށް އިކޮނޮމޮކް މިނިސްޓްރީއަށް ހުށަހަޅާފަ އެވެ.
ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި، އަމިއްލަ ފަރާތްތަކާއިއެކު ވިޔަފާރިކުރުމާއި ބެހޭ ގަވާއިދެއް އިކޮނޮމިކް މިނިސްޓްރީއިން މިދިޔަ އޭޕްރީލްމަހު އާންމުކޮށްފައި ވާއިރު، ގެޒެޓް ކުރާ ތާރީހުން ފެށިގެން ނުވަ މަސް ދުވަސްތެރޭ އެ ގަވާއިދަށް އަމަލުކުރަން ޖެހޭނެ ކަމަށް ބުނެފައިވެ އެވެ. އެ މުއްދަތު ހަމަވާނީ އަންނަ އަހަރުގެ ޖެނުއަރީގެ ނިޔަލަށެވެ.
މި ގަވާއިދު ގެޒެޓް ކުރުމާއި އެކު ގިނަ ކައުންސިލްތަކުން ކުންފުނި ރަޖިސްޓްރީ ކުރުމަށް އިކޮނޮމިކް މިނިސްޓްރީގައި އެދިފައި ވާއިރު، ހުއްދަ ނުލިބި، އެކަމަށް ޖަވާބެއް ނުލިބި އަހަރު ނިމިގެން ދާތީ ޝަކުވާ ކުރެ އެވެ.
އެ ކަންބޮޑުވުމަށް ރައްދު ދެމުން އިކޮނޮމިކް މިނިސްޓްރީގެ ތަރުޖަމާން، ނައުފަލް އަމްޖަދު "އަދަދު" އަށް ވިދާޅުވީ މާ ލަސްތަކެއް ނުވެ، ކުންފުނިތައް ރަޖިސްޓްރީ ކޮށްދޭނެ ކަމަށެވެ. އެހެން ނަމަވެސް، ކައުންސިލްތަކަށް ކުންފުނިތައް ހިންގަން ހުއްދަ ދޫކުރުމުގެ ކުރިން، މިހާރު ގެޒެޓްކޮށްފައިވާ "ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި، އަމިއްލަ ފަރާތްތަކާއެކު ވިޔަފާރިކުރުމާބެހޭ ގަވާއިދު" އަށް ކުދި ކުދި އިސްލާހުތައް ގެނައުމުގެ މަސައްކަތް ކުރަމުންދާ ކަމަށް ވެސް ވިދާޅުވި އެވެ.
"ގަވާއިދުގައި ކުދި ކުދި ކަންކަން ފާހަގަވުމުން، ކުދި ކުދި އިސްލާހުތައް ގެނައުމުގެ މަަސައްކަތް މިނިސްޓްރީއިން މިހާރު ކުރަމުން ދަނީ. އެ މަސައްކަތް މި ބަލަނީ މިމަހުގެ ނިޔަލަށް ނިންމާލެވޭނެ ކަމަށް،" ނައުފަލް ވިދާޅުވި އެވެ.
އޭނާ ވިދާޅުވި ގޮތުގައި އެ އިސްލާހުތަކާއި އެކު ގަވާއިދު ގެޒެޓު ކުރުމާއި އެކު، ކުންފުނިތައް ރަޖިސްޓްރީ ކުރުމުގެ ހުއްދައަށް އެދުނު ކައުންސިލްތަކުގެ އަަދަދު އާންމު ކުރާނެ އެވެ. އެ މައުލޫމާތުތައް މިވަގުތު ހާމަކުރުމަށް މިނިސްޓްރީ ވަނީ އުޒުރުވެރިވެފަ އެވެ.
މި ގަވާއިދު ހަރުދަނާ ކުރުމަށް އިސްލާހުތަކެއް ގެންނަނީ ކައުންސިލްތަކުން އުފައްދާ ކޮންމެ ކުންފުންޏެއް ދައުލަތުގެ އެސެޓަކަށް ވެގެން ދާތީ އެވެ. އަދި އެ ކުންފުނިތަކުގެ ޒިންމާ ދައުލަތުން ނަނގަން ޖެހޭނެތީ އެވެ.
