ހައްގުތަކާއި މިނިވަންކަމުގެ ދާއިރާގައި ދިވެހި ޒުވާން ޖީލުގެ އުންމީދު ފުރިހަމަ ކޮށްދޭނެ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ބައިނަލްއަގުވާމީ އިންސާނީ ހައްގުތަކުގެ ދުވަހާއި، ހިއުމަން ރައިޓްސް ކޮމިޝަންގެ 18 ވަނަ އަހަރީ ދުވަސް ފާހަގަކުރުމަށް ބޭއްވި ޖަލްސާގައި ރައީސް ސޯލިހު ވިދާޅުވީ ޒުވާން ޖީލުގެ އެ އުއްމީދުތައް ފުރިހަމަކޮށް ދިނުމަށްޓަކައި ސަރުކާރުން ފުރިހަމައަށް ޒިންމާ އަދާކުރާނެ ކަމަށެވެ.
"އެކަމުގެ ޔަގީންކަން ރާއްޖޭގެ ލޮބުވެތި ރައްޔިތުންނަށް އަޅުގަނޑު އަރުވަން،" އެ މަނިކުފާނު ވިދާޅުވި އެވެ.
ދިރިހުރުމުގެ ހައްގާއި، ރަނގަޅު ކާނާއާއި، ސާފު ބޯފެން ލިބުމާއި، ރައްކާތެރި ނަރުދަމާ ނިޒާމެއް އޮތުމާއި، ރަނގަޅު ސިއްހީ ހިދުމަތް ލިބިދިނުން ފަދަ، ފަރުދުންގެ ޒާތީ ކިތަންމެ ހައްގުތަކެއް، ޤާނޫނުއަސާސީން ކަށަވަރުކޮށްދޭ ކަމަށާއި އެ ހައްގުތަކާއި މިނިވަންކަން، އެއްވެސް ތަފާތުކުރުމެއް ނެތި ހަމަހަމަ ގޮތެއްގައި ލިބިދިނުމަކީ ދައުލަތުގެ ވާޖިބެއް ރައީސް ވިދާޅުވި އެވެ.
ހައްގުތައް ކުރިން އޮތް ގޮތާއި މިހާރު އައިސްފައިވާ ކުރިއެރުން ރައީސް ސޯލިހު ގެނެސް ދެއްވީ މާޒީގެ ހަނދާތަކާއެކު އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ރައްޔިތުންގެ މަޖިލީހުގައި ތަޅު އަޅުވައި، ސިފައިން ވައްދާ މަޖިލިސް "ހިސޯރު" ކޮށް، މެމްބަރުން ބޭރުކުރި ހަނދާން އާކުރައްވަމުން، އޭރު ހިންނަވަރު ދާއިރާގެ މެމްބަރުގެ ގޮތުގައި ހުންނެވި މިހާރުގެ ރައީސް ވިދާޅުވީ "މިއަދު މުޅި މަންޒަރު ބަދަލުވެއްޖެ،" ކަމަށެވެ.
"ރައްޔިތުންގެ މަންދޫބުން މަޖިލީހުގައި މަސައްކަތް ކުރައްވަނީ، އެއްވެސް ނުފޫޒެއް، ބިރު ދެއްކުމެއް ނެތި. ސިފައިންނާއި ފުލުހުން މިއަދު އެތިބީ، މަޖިލީހުގެ މެންބަރުންނަށް ފުރިހަމަ ހިމާޔަތާއި ރައްކާތެރިކަން ކަށަވަރުކޮށްދީގެން،" އެ މަނިކުފާނު ވިދާޅުވި އެވެ.
މިރޭގެ ޖަލްސާގެ ތެރެއިން -- ފޮޓޯ: ރައީސް އޮފީސް
ނޫސްވެރިކަމުގެ މިނިވަންކަން ދިނުމުން ވީ ފައިދާ
މިހާރު މިނިވަން ނޫސްވެރިކަމެއް ނެތް ކަމަށް ޔާމީން ވިދާޅުވެފައި އޮއްވައި، ރޭގެ ޖަލްސާގައި ރައީސް ސޯލިހު ވިދާޅުވީ "[ޔާމީންގެ ވެރިކަމުގައި] ހިޔާލު ފާޅުކުރުމުގެ މިނިވަންކަމުގެ މުޅި އުދަރެސް އޮތީ، އަބުރުގެ ގާނޫނުގެ ނަމުގައި އޮތް ބަނަ ވިލާގަނޑުތަކަކުން ބައްދާލާފައި،" ކަމަށެވެ.
އޭރު މީޑިއާގެ ކުރިއެރުމާ ގުޅޭ ދެ މުއައްސަސާއެއްގެ ކަމަކީ، ނޫސްވެރިންނާއި، ނޫސް އިދާރާތައް ޖޫރިމަނާކޮށް އަދަބު ދިނުން ކަމަށް އެ މަނިކުފާނު ވިދާޅުވި އެވެ،
"ސަރުކާރުގެ ފިއްތުންތަކާ ހެދި، އޭރު ހުއްޓާލަން ޖެހުނު މީޑިއާތައް މަދެއް ނޫން. މިއަދު އަޅުގަނޑުމެން މިތިބީ ނޫސްވެރިކަމަށް ފުރިހަމަ މިނިވަންކަމެއް ދީގެން. އެކަމުން ސަރުކާރަށް ވީ އުނދަގުލެއް، ލިބުނު ގެއްލުމެއް ނެތް. އެ މިނިވަންކަން ދިނުމުން، ހަމަގައިމުވެސް އަޅުގަނޑަށް ވީ ފައިދާ،" ރައީސް ސޯލިހު ވިދާޅުވި އެވެ.
ދިރިހުރުމުގެ ހައްގު ފުރިހަމަ ވަނީ އަސާސީ އެތައް ހައްގުތައް ގެތި ލާމެހިގެން ކަމަށާއި އެކަށީގެންވާ ބޯހިޔާވަހިކަމެއް ލިބުމަކީ، އެންމެ މުހިންމު އެއް ހައްގު ކަމަށް އެ މަނިކުފާނު ވިދާޅުވި އެވެ.
"މި ހައްގު ލިބިދިނުމަށްޓަކައި ގިނަ މަޝްރޫއުތަކެއް މިހާރުވެސް އިރާދަކުރެއްވިއްޔާ ހިނގަމުން އެބަދޭ. އަދި އިތުރު މަޝްރޫއުތައް ފެށުމަށް މި އަންނަނީ ތައްޔާރުވަމުން،" ރައީސް ވިދާޅުވި އެވެ.
އެ މަނިކުފާނު ވިދާޅުވީ މި ސަރުކާރުން ކުރިއަށް ގެންދާ ތަރައްގީގެ ކޮންމެ މަޝްރޫއުއަކީ، އަސާސީ ހައްގުތަކާ ގުޅިފައިވާ ހިދުމަތްތައް، ރައްޔިތުންގެ މެދުގައި ތަފާތު ނުކޮށް، ހަމަހަމަ ގޮތެއްގައި ލިބިދިނުމަށް ހިންގާ މަޝްރޫއު ކަމަށެވެ.
"އެތައް އަހަރެއް ވަންދެން، ރައްޔިތުން އާދޭސް ކުރަމުން ދިޔައިރުވެސް، އަސާސީ ހިދުމަތްތައް ލިބިދޭންޖެހޭ ކަމަށް ސަރުކާރަށް ގަބޫލުނުކުރެވުނު ކިތަންމެ ރަށެއްގައި، އަޅުގަނޑުމެން މި އަންނަނީ އެ ހިދުމަތްތައް ގާއިމުކުރަމުން،" މި ސަރުކާރުން ހިންގާ ފެނާއި ނަރުދަމާގެ މަޝްރޫއުތަކަށް އިޝާރަތް ކުރައްވައި އެ މަނިކުފާނު ވިދާޅުވި އެވެ.
"މުސްތަގުބަލުގައި ވެސް ސަރުކާރުގެ އެންމެ އިސް ސިޔާސަތަކަށް ވާނީ، އިންސާނީ ހައްގުތައް އެންމެ ފުރިހަމަ ގޮތުގައި ލިބިދިނުން ކަމަށާއި އިންސާނީ ހައްގުތަކާއި އަސާސީ ހިދުމަތް ފޯރުކޮށްދިނުމުގައި، ރައްޔިތުންގެ މެދުގައި ހަމަހަމަކަން ގާއިމުކުރުން. އަދި އިންސާނީ ހައްގުތަކަށް ހުރަސް އެޅޭ ގޮތަށް، ދައުލަތް ހިންގުމުގެ ނިޒާމުގެ ތެރޭގައި އެއްވެސް ކަމެއް ހުރިނަމަ، އެކަމެއް ނައްތައިލުން."
ރައީސް ސޯލިހު ވިދާޅުވީ އިންސާނީ ހައްގުތައް ފުރިހަމައަށް ރައްކާތެރި ކުރެވޭނީ، އަންހެނުންނާއި، ކުޑަކުދިންނާއި، އުމުރުން ދުވަސްވީ މީހުންގެ ހައްގުތައްވެސް ރައްކާތެރިކޮށްގެން ކަމަށެވެ.
"މި ދެންނެވި ހުރިހާ ހައްގުތަކެއް ރައްޔިތުންނަށް ލިބިދިނުމަކީ، ސަރުކާރުގެ ޒިންމާއަކަށްވާއިރު، އެ ޒިންމާ ސަރުކާރުން އަދާކުރާ މިންވަރު ބެލުމަށް އުފެއްދި ތަނަކީ ހިއުމަން ރައިޓްސް ކޮމިޝަން،" އެ މަނިކުފާނު ވިދާޅުވި އެވެ.
