ހިފަހައްޓާފައިވާ އަފްގާނިސްތާނުގެ ފަންޑަކުން 280 މިލިއަން ޑޮލަރު ދޫކުރަން ބައިނަލްއަގްވާމީ ޑޯނަރުން ނިންމާފައިވާ ކަމަށް ވޯލްޑް ބޭންކުން ބުނެފި އެވެ.
މިދިޔަ އޯގަސްޓު މަހު ތާލިބާނުން ވެރިކަމަށް އައުމާ އެކު ޑޯނަރު ވަނީ ފަންޑުތައް ހިފަހައްޓާފަ އެވެ. އެއާއެކު އެހީ އަށް ބަރޯސާވެފައި އޮތް ގައުމަށް ވަނީ އިންސާނީ އަދި އިގްތިސާދީ ކާރިސާއެއް ކުރިމަތިވެފަ އެވެ.
ވޯލްޑް ފުޑް ޕްރޮގްރާމް (ޑަބްލިއުއެފްޕީ) އިން އިންޒާރު ދޭ ގޮތުގައި އަފްގާން އާބާދީގެ ދެބައިކުޅަ އެއްބައި މީހުންނަށް ބަނޑުހައި ހޫނުކަމާ ވަނީ ކުރިމަތިވެފަ އެވެ.
އޭގެ އިތުރުން ތިން މިލިއަން ކުދިންނަށް ވަނީ މެލްނިއުޓްރިޝަން ނުވަތަ ހަށިގަނޑަށް ބޭނުންވާ މާއްދާތައް ނުލިބި މާ ބޮޑަށް ހިކިވެ އަނަރޫފަވުމުގެ މައްސަލަ ދިމާވެފަ އެވެ.
ސިވިއާ މެލްނިއުޓްރިޝަން ދިމާވެފައިވާ ކުއްޖަކަށް ފަރުވާ ދެނީ. -- ފޮޓޯ: އޭއެފްޕީ
ކާބޯތަކެތީގެ ދަތިކަން އެހާ ބޮޑަށް ކުރިމަތިވެފައި ވަނީ އާދަޔާ ހިލާފަށް ހޫނުގަދަވެ ދަނޑުތައް ހަލާކުވުމުގެ ސަބަބުންނެވެ. އެއާއެކު ތަކެތީގެ އަގުތައް ނުހިފިހެއްޓޭ މިންވަރަށް މައްޗަށް ގޮސް، ތަކެތި އިމްޕޯޓް ކުރާނެ ފައިސާ ނެތުމުން ގިނަ ބަޔަކު ބަނޑަށް ޖެހުނީ އެވެ.
ތާލިބާން ސަރުކާރު ރަސްމީކޮށް ބަލައިގަންނަން ހުޅަނގުގެ ގައުމުތަކުން ބޭނުމެއް ނުވެ އެވެ. އެހެންވެ އެމެރިކާ އާއި އެހެން ގައުމުތަކުން ވަނީ އަފްގާނިސްތާނުގެ 10 ބިލިއަން ޑޮލަރު ހިފަހައްޓާފަ އެވެ.
އޭގެ އިތުރުން ވޯލްޑް ބޭންކާއި އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ވެސް ވަނީ އެހީތައް މެދުކަނޑާލާފަ އެވެ.
ނަމަވެސް ޑޯނަރުން 280 މިލިއަން ޑޮލަރު ދޫކުރަން ނިންމުމާ އެކު އެ ފައިސާ ފޯރުކޮށްދޭނީ އދ. ގެ އެޖެންސީގެ ގޮތުގައި ހިމެނޭ ޔުނިސެފާއި ޑަބްލިއުއެފްޕީ އަށެވެ.
ވޯލްޑް ބޭންކުން ބުނީ ތާލިބާނުން ވެރިކަމަށް އައި ނަމަވެސް އެ ދެ އެޖެންސީން އަފްގާނިސްތާނުގެ އޮޕަރޭޝަންތައް ހުއްޓާ ނުލާ ކަމަށާއި އެ މީހުން މެދުވެރިކޮށް ސީދާ އަފްގާން ރައްޔިތުންނަށް އެހީވެވޭނެ ކަމަށެވެ.
ދޫކުރި ފައިސާ އިން 100 މިލިއަން ޑޮލަރު ދޭނީ ޔުނިސެފަށް ކަމަށާއި 180 މިލިއަން ޑޮލަރު ދޭނީ ޑަބްލިއުއެފްޕީ އަށް ކަމަށް ވޯލްޑް ބޭންކުން ބުންޏެވެ.
