ކްލަބް މޯލްޑިވްސް ކަޕް ފުޓްސަލް މުބާރާތުގައި މިރޭ ކުޅެން އޮތް ކުއާޓާ ފައިނަލްގެ ފުރަތަމަ ދެ މެޗު މާދަމާރެ އަށް ފަސްކޮށްފި އެވެ.
މިރޭ ކުޅެން ޝެޑިއުލްކޮށްފައި އޮތީ ކުއާޓާ ފައިނަލްގެ ފުރަތަމަ މެޗުގައި ޕްރިޒަން ކްލަބާއި އެމްއޭސީއެލް ބައްދަލުކުރާ މެޗާއި ކްލަބް އެޗްޑީސީ އާއި ފިއުލް ސަޕްލައި މޯލްޑިވްސް (އެފްއެސްއެމް) ކުޅޭ މެޗެވެ. ކްލަބް މޯލްޑިވްސްގެ އޮފިޝަލަކު "އަދަދު" އަށް ބުނީ މޫސުން ގޯސްވުމުގެ ސަބަބުން މިރޭ ކުޅެން އޮތް ދެ މެޗު މާދަމާ ކުޅޭ ގޮތަށް ނިންމާފައިވާ ކަމަށެވެ. އަދި މާދަމާރޭ ކުޅެން އޮތް ދެ މެޗު އޮންނާނީ ހޯމަ ދުވަހުގެރޭގަ އެވެ.
ހޯމަ ދުވަހުގެރޭ ކުޅޭނީ އެމްޕީއެލް އާއި އާރްއާރްސީ ކުޅޭ މެޗާއި އެސްޓީއޯ އާއި ޓީމު ފަނަކަ ބައްދަލުކުރާ މެޗެވެ.
މުބާރާތުގެ އެންމެ ފަހުގެ ޗެމްޕިއަން ޔުނައިޓެޑް ބީއެމްއެލް ކެޓީ ދެ ވަަނަ ބުރުގެ ފުރުސަތު ނުލިބި ގްރޫޕް ސްޓޭޖުންނެވެ. އެންމެ ފަހުގެ ރަނަރަޕް ކްލަބް ވެމްކޯ މި ފަހަރު ފުޓްސަލްގެ ތަރިން ގިނަ ޓީމެއް އެކުލަވާލައިގެން އައި ނަމަވެސް ދެ ވަނަ ބުރު ފަހަނައަޅައި ނުދެވުނެވެ. ހިތްވަރުގަދަ ކުޅުމެއް ދައްކައި، ގިނަ ބަޔަކު ހައިރާންކޮށްލުމަށް ފަހު ވެމްކޯ ކަޓުވާލީ އެފްއެސްއެމް އިންނެވެ. އެފްއެސްއެމް އިން ކުއާޓާގައި މިރޭ ކުޅެން ޖެހޭނީ މުބާރާތުގެ ފޭވަރިޓެއްގެ ގޮތުގައި ބެލެވޭ އެޗްޑީސީއާ އެވެ. އެޗްޑީސީ މިހާތަނަށް ކުޅުނު ކޮންމެ މެޗަކުން ވެސް ވަނީ ފަސޭހައިން މޮޅުވެފަ އެވެ. ދެ ވަނަ ބުރުގައި ސިފައިންގެ މައްޗަށް ކުރިހޯދީ ފަސޭހައިންނެވެ.
އެމްޓީސީސީ އަތުން ޕެނަލްޓީ ޖަހައިގެން މޮޅުވި އެމްއޭސީއެލް ކުއާޓާގައި މިރޭ ކުޅޭ ޕްރިޒަން އިން ވަނީ ދެ ވަނަ ބުރުގައި ޕޮލިސް ކްލަބް ކަޓުވާލައިފަ އެވެ. ކޯޗު މުހައްމަދު ޝާހީން (ޕޮޓޭ)ގެ އިރުޝާދުގެ ދަށުން ރަނގަޅު ކުޅުމެއް ދައްކަމުން އަންނަ ޕްރިޒަން މުބާރާތުގައި ކުޅުނު ހަތަރު މެޗުގެ ތެރެއިން ބަލިވީ ގްރޫޕް ސްޓޭޖުގައި ވަރުގަދަ ފެނަކަ އަތުންނެވެ. އަނެއް ކޮޅުން އެމްއޭސީއެލް ވަނީ މުބާރާތުގައި ކުޅުނު ފުރަތަމަ މެޗުން މީޑިއާނެޓް އަތުން ބަލިވެފަ އެވެ. އެކަމަކު، އޭގެ ފަހުން ޖެހިޖެހިގެން ތިން މެޗުން މޮޅުވި އެވެ.
މުބާރާތުގައި މިހާތަނަށް މެޗަކަށް ފަހު މެޗެއް ރަނގަޅު ފޯމެއް ދަމަހައްޓަމުން އަންނަ އެމްޕީއެލް އާއި އާރްއާރްސީގެ މެޗު ފޯރިގަދަވާނެ އެވެ. ދެ ޓީމުން ވެސް ދެ ވަނަ ބުރުގައި ކުޅުނު މެޗުގައި ވަނީ ގިނަ ގޯލުތަކެއް ޖަހައިފަ އެވެ. އާރްއާރްސީގެ ކޯޗަކީ ފުޓްސަލްގައި ތަޖުރިބާކާރު ކޯޗު އަބްދުﷲ ނަސީރު (އަބޯ) އެވެ. އެމްޕީއެލާ ހަވާލުވެ ހުރީ އަހުމަދު މުހައްމަދު (އައްމަޑޭ) އެވެ.
އެސްޓީއޯ އާއި ފެނަކަ އަކީ ކުއާޓާ ފައިނަލްގެ ބޮޑު ކުރިމަތިލުމެވެ. ދެ ޓީމު ވެސް މިހާތަނަށް ކުޅުނު ހަތަރު މެޗުން މޮޅުވެފައިވާއިރު، ސެމީގެ ފުރުސަތު ލިބޭނީ މިތަނުން އެއް ޓީމަށެވެ. ދެ ޓީމުގެ ބެންޗަށް ބަލާއިރު، ތިބީ ފުޓްސަލް އަށް މަޝްހޫރު ދެ ކޯޗުންނެވެ. އެސްޓީއޯގެ ކޯޗަކީ ކްލަބް މޯލްޑިވްސް ކަޕްގައި އެމްޕީއެލް އިން ފެނުނު އަހުމަދު ވިޝާލް (އަންދު) އެވެ. ފެނަކަ ޓީމުގެ ކޯޗަކީ އަހުމަދު ނިސާމް (ފޮޓޯ) އެވެ.
ކްލަބް މޯލްޑިވްސްގެ އަންހެން މުބާރާތް 18/30 ވިމެން ފުޓްސަލް ފިއެސްޓާގެ ސެމީ ފައިނަލްގައި އަންގާރަ ދުވަހުގެރޭ ދިވެހި ސިފައިންގެ ކްލަބް ކުޅޭނީ ވެމްކޯއާ އެވެ. އެންމެ ފަހުގެ ޗެމްޕިއަން އެމްޕީއެލް ބައްދަލުކުރާނީ ޕޮލިހާ އެެވެ.
