ކްލަބް މޯލްޑިވްސް ކަޕްގެ ކުއާޓާ ފައިނަލް މެޗުތައް މިރޭ ފަށަނީ

ރާއްޖޭގައި ބޭއްވޭ އެންމެ ފޯރިގަދަ ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ ކުއާޓާ ފައިނަލްގެ ފުރަތަމަ ދެ މެޗު މިރޭ ކުޅޭނެ އެވެ.

ކުއާޓާ ފައިނަލުން ފެށިގެން މުބާރާތުގެ މެޗުތައް ކުޅޭނީ އެއް ދަނޑެއްގަ އެވެ. ހުޅުމާލެ ރެހެންދި ފުޓްސަލް ދަނޑުގައި ކުރިއަށްދާ މި މުބާރާތުގައި މިރޭ ކުޅޭނީ ކުއާޓާ ފައިނަލްގެ ފުރަތަމަ ދެ މެޗެވެ. އެއީ އެމްއޭސީއެލް އާއި ޕްރިޒަން ކްލަބް ކުޅޭ މެޗާއި އެޗްޑީސީ އަދި އެފްއެސްއެމް ބައްދަލުކުރާ މެޗެެވެ. މާދަމާރޭ ކުޅޭނީ އާރްއާރްސީ އާއި އެމްޕީއެލް ބައްދަލުކުރާ މެޗާއި ޓީމު ފެނަކަ އާއި އެސްޓީއޯ ކުޅޭ މެޗެވެ.

ކުއާޓާ ފައިނަލް މެޗުތައް:

ޕްރިޒަން ކްލަބް - އެމްއޭސީއެލް (މިރޭ، 20:15)

ކްލަބް އެޗްޑީސީ - އެފްއެސްއެމް (މިރޭ، 22:15)

އެމްޕީއެލް - އާރްއާރްސީ (މާދަމާރޭ، 20:15)

އެސްޓީއޯ - ފެނަކަ (މާދަމާރޭ، 22:15)

މުބާރާތުގެ އެންމެ ފަހުގެ ޗެމްޕިއަން ޔުނައިޓެޑް ބީއެމްއެލް ކެޓީ ދެ ވަަނަ ބުރުގެ ފުރުސަތު ނުލިބި ގްރޫޕް ސްޓޭޖުންނެވެ. އެންމެ ފަހުގެ ރަނަރަޕް ކްލަބް ވެމްކޯ މި ފަހަރު ފުޓްސަލްގެ ތަރިން ގިނަ ޓީމެއް އެކުލަވާލައިގެން އައި ނަމަވެސް ދެ ވަނަ ބުރު ފަހަނައަޅައި ނުދެވުނެވެ. ހިތްވަރުގަދަ ކުޅުމެއް ދައްކައި، ގިނަ ބަޔަކު ހައިރާންކޮށްލުމަށް ފަހު ވެމްކޯ ކަޓުވާލީ އެފްއެސްއެމް އިންނެވެ. އެފްއެސްއެމް އިން ކުއާޓާގައި މިރޭ ކުޅެން ޖެހޭނީ މުބާރާތުގެ ފޭވަރިޓެއްގެ ގޮތުގައި ބެލެވޭ އެޗްޑީސީއާ އެވެ. އެޗްޑީސީ މިހާތަނަށް ކުޅުނު ކޮންމެ މެޗަކުން ވެސް ވަނީ ފަސޭހައިން މޮޅުވެފަ އެވެ. ދެ ވަނަ ބުރުގައި ސިފައިންގެ މައްޗަށް ކުރިހޯދީ ފަސޭހައިންނެވެ.

އެމްޓީސީސީ އަތުން ޕެނަލްޓީ ޖަހައިގެން މޮޅުވި އެމްއޭސީއެލް ކުއާޓާގައި މިރޭ ކުޅޭ ޕްރިޒަން އިން ވަނީ ދެ ވަނަ ބުރުގައި ޕޮލިސް ކްލަބް ކަޓުވާލައިފަ އެވެ. ކޯޗު މުހައްމަދު ޝާހީން (ޕޮޓޭ)ގެ އިރުޝާދުގެ ދަށުން ރަނގަޅު ކުޅުމެއް ދައްކަމުން އަންނަ ޕްރިޒަން މުބާރާތުގައި ކުޅުނު ހަތަރު މެޗުގެ ތެރެއިން ބަލިވީ ގްރޫޕް ސްޓޭޖުގައި ވަރުގަދަ ފެނަކަ އަތުންނެވެ. އަނެއް ކޮޅުން އެމްއޭސީއެލް ވަނީ މުބާރާތުގައި ކުޅުނު ފުރަތަމަ މެޗުން މީޑިއާނެޓް އަތުން ބަލިވެފަ އެވެ. އެކަމަކު، އޭގެ ފަހުން ޖެހިޖެހިގެން ތިން މެޗުން މޮޅުވި އެވެ.

މުބާރާތުގައި މިހާތަނަށް މެޗަކަށް ފަހު މެޗެއް ރަނގަޅު ފޯމެއް ދަމަހައްޓަމުން އަންނަ އެމްޕީއެލް އާއި އާރްއާރްސީގެ މެޗު ފޯރިގަދަވާނެ އެވެ. ދެ ޓީމުން ވެސް ދެ ވަނަ ބުރުގައި ކުޅުނު މެޗުގައި ވަނީ ގިނަ ގޯލުތަކެއް ޖަހައިފަ އެވެ. އާރްއާރްސީގެ ކޯޗަކީ ފުޓްސަލްގައި ތަޖުރިބާކާރު ކޯޗު އަބްދުﷲ ނަސީރު (އަބޯ) އެވެ. އެމްޕީއެލާ ހަވާލުވެ ހުރީ އަހުމަދު މުހައްމަދު (އައްމަޑޭ) އެވެ.

އެސްޓީއޯ އާއި ފެނަކަ އަކީ ކުއާޓާ ފައިނަލްގެ ބޮޑު ކުރިމަތިލުމެވެ. ދެ ޓީމު ވެސް މިހާތަނަށް ކުޅުނު ހަތަރު މެޗުން މޮޅުވެފައިވާއިރު، ސެމީގެ ފުރުސަތު ލިބޭނީ މިތަނުން އެއް ޓީމަށެވެ. ދެ ޓީމުގެ ބެންޗަށް ބަލާއިރު، ތިބީ ފުޓްސަލް އަށް މަޝްހޫރު ދެ ކޯޗުންނެވެ. އެސްޓީއޯގެ ކޯޗަކީ ކްލަބް މޯލްޑިވްސް ކަޕްގައި އެމްޕީއެލް އިން ފެނުނު އަހުމަދު ވިޝާލް (އަންދު) އެވެ. ފެނަކަ ޓީމުގެ ކޯޗަކީ އަހުމަދު ނިސާމް (ފޮޓޯ) އެވެ.