އިންޑިއާގެ ދަނޑުވެރިން އަހަރެއް ވަންދެން ކުރި މުޒާހަރާ ނިމުމަކަށް ގެނެސް، އެނބުރި ގެތަކަށް ދާން ނިންމައިފި އެވެ.
މިދިޔަ އަހަރުގެ ނޮވެމްބަރު މަހު އެތައް ހާސް ދަނޑުވެރިން ވަނީ ވެރިރަށް ނިއު ދިއްލީ ވަށައިގެންވާ ސަރަހައްދުގައި ޓެންޓު ޖަހައިފަ އެވެ.
އެ މީހުން މިއަދާ ހަމައަށް ވެސް ތިބީ އެ ތަނުގައި އަޑު އުފުލުމަށެވެ. ނަމަވެސް އޭގެ ތެރެއިން ގިނަ ބަޔަކަށް މާ ބޮޑަށް ހޫނުވެ ނުވަތަ ފިނިވެ އަދި ކޮވިޑް ޖެހިގެން ވެސް މަރުވި އެވެ.
ދަނޑުވެރިން ބުނީ އެނބުރި ގެތަކަށް ދާން ފަށާނީ ހޮނިހިރު ދުވަހު ކަމަށެވެ. ދަނޑުވެރިންގެ މުޒާހަރާ އަކީ ބޮޑު ވަޒީރު ނަރެންދްރަ މޯދީގެ ސަރުކާރަށް ކުރިމަތިވި އެންމެ ބޮޑު އެއް ގޮންޖެހުމެވެ.
ދަނޑުވެރިން ގެތަކަށް ދާން ނިންމީ އެ މީހުންގެ ޑިމާންޑުތަކާ ގުޅޭ މަޝްވަރާ ކުރަން މިނިސްޓަރުން އެއްބަސްވުމުންނެވެ. އެގޮތުން އުފެއްދުންތަކަށް ޔަގީން އަގެއް ކަނޑައެޅުމާއި މުޒާހަރާ ކުރި ދަނޑުވެރިންނާ ދެކޮޅަށް އުފުލާފައިވާ ޖިނާއީ ދައުވާ އަނބުރާ ގެންދިޔުން ހިމެނެ އެވެ.
"ހާލަތު މުރާޖައާ ކުރަން ޖެނުއަރީ 15 ވަނަ ދުވަހު އަޅުގަނޑުމެންގެ ބައްދަލުވުމެއް އޮންނާނެ. ސަރުކާރުގެ ވައުދުތައް ފުއްދައި ނުދޭ ނަމަ، އަލުން މުޒާހަރާ އަށް ނުކުތުން ވެސް އެކަށީގެންވޭ،" ދަނޑުވެރިންގެ ލީޑަރެއްގެ ގޮތުގައި އުޅޭ ގުރްނަމް ސިންގް ޗަރުނި އިންޑިއާގެ ނޫސްތަކަށް ބުންޏެވެ.
ދަނޑުވެރިން މުޒާހަރާ ކުރަން ފެށީ ތަފާތު ތިން ގާނޫނެއް ތައާރަފު ކުރުމުންނެވެ. އެއީ ދަނޑުވެރި އުފެއްދުންތަކުގެ އަގާއި، ވިޔަފާރި އާއި ރައްކާކުރުމާ ގުޅޭ ގާނޫނުތަކެކެވެ. ދަނޑުވެރިން ބުނީ އެ ގާނޫނުތަކާ ހެދި ހުޅުވާލެވިފައިވާ މާކެޓު ނިޒާމުގެ ތެރެއިން އެ މީހުންނަށް ލިބުނު ރައްކާތެރިކަން ކުޑަވި ކަމަށެވެ.
ދަނޑުވެރިންގެ ޔޫނިއަންތަކުން ބުނީ އެ ގާނޫނުތަކުގެ ފައިދާ ކުރަނީ ބޮޑެތި ކުންފުނިތަކަށް ކަމަށާއި ދަނޑުވެރިންގެ ދިރިއުޅުން ފަނާވާނެ ކަމަށެވެ.
ނަމަވެސް އެ ގާނޫނުން ދަނޑުވެރިންނަށް ފައިދާ ކުރާނެ ކަމަށް އެތައް މަސްތަކެއް ވަންދެން ވިދާޅުވުމަށް ފަހު ނޮވެމްބަރު 19 ވަނަ ދުވަހު މޯދީ ނިންމެވީ ގާނޫނުތައް އުވާލުމަށެވެ.
އެކަން ޕާލިމެންޓު މެދުވެރިކޮށް ކުރީ ނޮވެމްބަރު 30 ވަނަ ދުވަހު އެވެ. ނަމަވެސް ދަނޑުވެރިން މުޒާހަރާ ހުއްޓާ ނުލައި ކުރިއަށް ގެންދިޔައީ އެ މީހުންގެ އެހެން ޑިމާންޑުތަކަށް ވެސް ސަރުކާރުގެ ސަމާލުކަން ހޯދުމަށެވެ.
ބުރާސްފަތި ދުވަހު ސަރުކާރުން ވަނީ، އޭގެ ތެރެއިން ގިނަ ޑިމާންޑުތައް ގަބޫލުކުރާ ކަމަށް ބުނެ ދަނޑުވެރިންނަށް ރަސްމީ ސިޓީއެއް ފޮނުވާފަ އެވެ. އޭގެ އިތުރުން މުޒާހަރާގެ ތެރެއިން މަރުވި ދަނޑުވެރިންގެ އާއިލާތަކަށް ފައިސާގެ ބަދަލު ދޭނެ ކަމަށް ވެސް ސަރުކާރުން ބުންޏެވެ.
ދަނޑުވެރިންގެ ޔޫނިއަންތަކުން ބުނީ މިއީ ބޮޑު ކާމިޔާބެއް ކަމަށެވެ. ނަމަވެސް އެނެލިސްޓުން ބުނާ ގޮތުގައި މޯދީގެ ނިންމެވުން ގުޅިފައި ވަނީ ކުރިއަށް އޮތް އިންތިހާބުތަކާ އެވެ.
އެގޮތުން ޕަންޖާބް ސްޓޭޓާއި އުއްތަރް ޕްރަދޭޝް ސްޓޭޓުގެ އިންތިހާބު އޮތް އިރު، އެ ދެ ތަނުގައި ވެސް ދަނޑުވެރިން ގިނަ އެވެ.
