ދިވެހިރާއްޖޭގެ ޖަލުތަކުގެ ޖާގައިގެ ދަތިކަން ހައްދުން ނައްޓާފައިވާ ކަމަށާއި ބޭސް ފަރުވާ ހޯދުމާއި ކަސްރަތު ކުރުން ފަދަ އިންސާނީ ހައްގުތަކުން ގިނަ ގައިދީން މަހްރޫމްކޮށްފައިވާ ކަމަށް އދ. ވޯކިން ގްރޫޕް އޮން އާބިޓްރަރީ ޑިޓެންޝަނުން މިއަދު ބުނެފި އެވެ.
ސަރުކާރުގެ ދައުވަތަށް ރާއްޖެ އައިސް 10 ދުވަހުގެ ތަހުގީގަކަށްފަހު މިއަދު ބޭއްވި ނޫސްވެރިންގެ ބައްދަލުވުމެއްގައި، ގާނޫނާ ހިލާފް ބަންދުގެ މައްސަލަތައް ބެލުމަށް ހާއްސަ އދ. ގެ އެ ކޮމެޓީގެ ޗެއާ ޑރ. އެލީނާ ސްޓެއިނާޓް ވިދާޅުވީ، ވެންޓިލޭޝަންގެ މައްސަލަތަކާއި އާދަޔާ ހިލާފަށް ޖާގައިގެ ދަތިކަމާއި ބޭސްފަރުވާގެ މައްސަލަތައް ރާއްޖޭގެ ހުރިހާ ޖަލަކުން ވެސް ފެނުނު ކަމަށެވެ.
"ބަންދުކޮށްފައި ތިބޭ ބައެއް މީހުންނަކީ ގޮޅިން ނުނެރޭ މީހުން. ބައެއް މީހުން ގޮޅިން ނެރެނީ މަހަކު އެއް ފަހަރު. މި މޫސުމުގައި، ގޮޅިއެއްގައި އެތައް މީހުންނަކާއެކު ތިބެންޖެހެނީ. މިއީ އިންސާފުތޯ؟،" މި ނޫހުން ކުރި ސުވާލަކަށް ޖަވާބު ދެއްވަމުން އެލީނާ ވިދާޅުވި އެވެ.
ހާއްސަކޮށް، މާލޭ ޖަލުގެ ޖާގައިގެ ދަތިކަމުގެ މައްސަލަ ބޮޑުކަން އދ. އިން ފާހަގަ ކުރި އެވެ.
"އޭގެ އެއް މިސާލަކީ މާލޭ ޕްރިޒަންގައި ގައިދީން ޔާޑަށް ނެރެނީ ބޮޑު ކޮއްޓަކަށް ލައިގެން. މިތަނުގެ ވަރަށް ގިނަ ގައިދީންގެ ނިދާނެ އެނދެއް އަދި ގޮދަނޑިއެއް ނެތް. މިތަނުގެ ގައިދީންގެ އަދަދު ގިނަކަމުން ނިދަންޖެހެނީ ވަރަށް ކައިރިކައިރީގައި، ފައި ދަމާލާނެހާ ޖާގަ ވެސް ނެތި،" ވޯކިން ގްރޫޕުގެ މެމްބަރު ޕްރިޔާ ގޮޕަލާން ވިދާޅުވި އެވެ.
އޭގެ އިތުރުން، ކުށުގެ ތުހުމަތުގައި ބަންދު ކުރާ މީހުން، ހުކުމްކޮށްފައިވާ ތިބޭ މީހުންނާ އެއް ދަރަޖައެއްގައި ގެންގުޅޭ މައްސަލަ އާއި ޓެރަރިޒަމްގެ މައްސަލަތަކުގައި ހައްޔަރު ކުރާ މީހުންގެ ހައްގުތައް ގާނޫނުން ހަނި ކުރާތީ އެކަން ވެސް އދ. ގެ ވޯކިން ގްރޫޕުން ފާހަގަ ކުރި އެވެ. އަދި ގާނޫނީ ފްރޭމްވޯކް އޮންނަ ގޮތުން ބަންދުގައި ތިބެގެން ގާނޫނީ އެހީތެރިކަން ހޯދުމަށް ގައިދީންނަށް ދަތިވާ ކަމަށް ވެސް އދ. އިން ބުންޏެވެ.
ދަރަނި ނުދެއްކިގެން، މަދަނީ މައްސަލަތަކުގައި، ގާނޫނީ ނިޒާމުގެ ތެރެއިން މީހުން ރާއްޖޭގައި ޖަލަށްލަމުންދާ ކަމަށާއި އެއީ ދިވެހި ގާނޫނު އަސާސީ އަދި ބައިނަލްއަގްވާމީ މުއާހަދާތަކާ ވެސް ހިލާފަށް އަމަލު ކުރަމުންދާ އުސޫލެއް ކަމަށް އދ. ގެ ވޯކިން ގްރޫޕުން ބުންޏެވެ.
ޖަލުގައި ޑްރަގް ރިހެބިލިޓޭޝަންގެ ޕްރޮގްރާމްތައް ޖަލުގައި އެކަށީގެންވާ ގޮތަށް ކުރިއަށްނުދާކަން ފާހަގަ ކުރަމުން އދ. އިން ބުނީ މަސްތުވާތަކެތި ބޭނުން ކުރާ މީހުންނާމެދު ދެކޭ ގޮތް ބަދަލުކޮށް، މަސްތުވާތަކެތީގެ މައްސަލައަކީ ސިއްހީ ކަމެއްގެ ގޮތުގައި ބަލައިގަންނަންޖެހޭ ކަމަށެވެ.
ރާއްޖެއަށް ކުރި ދަތުރުގެ ރަސްމީ ރިޕޯޓެއް އަދި އދ. ގެ ވޯކިން ގްރޫޕުން އެކުލަވާލާނެ އެވެ. އަދި އެ ރިޕޯޓް އަންނަ އަހަރު އދ. ގެ ހިއުމަން ރައިޓްސް ކައުންސިލަށް ހުށަހަޅާނެ އެވެ.
