އިންޑިއާގެ ވެރިރަށް ނިއު ދިއްލީގެ ގެތަކުގެ ވައި ނުރައްކާތެރި މިންވަރަށް ތަގައްޔަރުވެފައިވާ ކަމަށް ދިރާސާއަކުން ދައްކައިފި އެވެ.
އެގޮތުން ފުއްޕާމެއަށް ގެއްލުންދޭ ޕީއެމް2.5 ޕާޓިކަލްސް އައުޓްޑޯ މާހައުލަށް ވުރެ ގެތަކުގެ ތެރޭގައި ގިނަ ކަމަށް އެ ދިރާސާއިން ދެއްކި އެވެ.
ނަމަވެސް, ވައި ސާފުކުރަން ފިޔަވަޅު އަޅަން ގިނަ ގޭބިސީތަކުން ބޭނުން ނުވާ ކަމަށް ރިޕޯޓުގައި ފާހަގަކުރި އެވެ. ދުނިޔޭގެ އެންމެ ތަގައްޔަރުވެފައިވާ ވެރިރަށްތަކުގެ ލިސްޓުގެ އެންމެ ކުރީގައި އެންމެ ގިނައިން ހިމެނެނީ ދިއްލީ ސިޓީ އެވެ.
ޔުނިވާސިޓީ އޮފް ޗިކާގޯގެ އެނާޖީ ޕޮލިސީ އިންސްޓިޓިއުޓުން 2018 އިން 2020 އަށް ހެދި ދިރާސާގައި ދިއްލީގެ އެތައް ހާސް ގޭބިސީއެއް ސާވޭކުރި އެވެ. އެގޮތުން އެކި ފަންތީގެ ގެތައް މޮނީޓާ ކުރުމުން އެނގުނީ ފަގީރު ގެތަކާއި މުއްސަނދި ގެތަކަށް ވެސް މެދުވެރިވެފައި ވަނީ އެއް ހާލަތެއް ކަމެވެ.
"ދިއްލީގައި މި އޮތް ހާލަތަކީ މުއްސަނދި ވިޔަސް ފަގީރު ވިޔަސް، އެކަކަށް ވެސް ސާފު ވައިކޮޅެއް ނުލިބޭ ފަދަ ހާލަތެއް،" ރިޕޯޓު ލިޔުނު ޑރ. ކެނެތު ލީ ފާހަގަކުރެއްވި އެވެ.
ދުނިޔޭގެ އެންމެ ބޮޑަށް ތަގައްޔަރުވެފައިވާ ސިޓީތަކުގެ ތެރެއިން ދިއްލީގެ ވައިގެ ކޮލިޓީ ގަވާއިދުން "އެންމެ ނުރައްކާތެރި" ކެޓަގަރީއަށް ވެއްޓެ އެވެ. އެ ހާލަތަށް ދިޔުމުން އިންސާނުންގެ ސިއްހަތަށް ނުރައްކާވާ މާއްދާތައް ވައިގެ ތެރޭގައި ގިނައިން އުޅެ އެވެ.
ފިނި މޫސުމާ ދިމާކޮށް ދިއްލީގެ ވައި ތަގައްޔަރުވާ އެއް ސަބަބަކީ ވަށައިގެންވާ ސްޓޭޓުތަކުގައި ހުންނަ ދަނޑުބިންތަކުން އުފެދޭ ކުނި އެންދުމެވެ. ދިއްލީ ވަށައިގެންވާ ސަރަހައްދުގައި އެތައް މިލިއަން މީހުން ދިރިއުޅޭ ނޮއިޑާ އަދި ގާޒީއާބާދު ފަދަ ސިޓީތައް ވެސް ހުރެ އެވެ.
ނަމަވެސް އެ ސިޓީގެ ވައި ތަގައްޔަރުވުމަށް އެންމެ ބޮޑަށް މަގުފަހިކުރަނީ އެކި ސިނާއަތްތަކާއި، ދަތުރުފަތުރާއި، މަގުތަކާއި އިމާރާތް ކުރުމުގެ މަސައްކަތުން އުފެދޭ ހިރަފުހުންނެވެ. އަދި ވައި ތަގައްޔަރުވުމަށް ދަނޑުތަކުން ހިއްސާ ކުރަނީ އެންމެ ހަތަރު ޕަސެންޓު ކަމަށް ސަރުކާރުން ބުނެފައި ވެ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފައިވާ ގޮތުގައި ދުނިޔޭގައި އެންމެ ބޮޑަށް ވައި ތަގައްޔަރުވެފައިވާ 15 ސިޓީގެ ތެރެއިން 14 ސިޓީ އޮތީ އިންޑިއާގަ އެވެ.
މިދިޔަ އަހަރު ހެދި ދިރާސާއަކުން ދެއްކި ގޮތުގައި ވައި ތަގައްޔަރުވުމުން ދިމާވާ މައްސަލަތަކުގައި އިންޑިއާގައި 2019 ވަނަ އަހަރު 1.67 މިލިއަން މީހުން މަރުވި އެވެ. އޭގެ ތެރެއިން 17،500 މީހުން މަރުވީ ދިއްލީންނެވެ.
