ނިއުޒީލޭންޑުގައި ދުންފަތުގެ އިސްތިއުމާލް ކުރުން އެއްކޮށް ހުއްޓުމުގެ ގޮތުން، އަންނަން އޮތް ޖީލުގެ އެއްވެސް މީހަކަށް ދުންފަތުގެ އުފެއްދުންތައް ވިއްކުން މަނާކުރަން ތައްޔާރުވެއްޖެ އެވެ.
އެގޮތުން އަންނަ އަހަރު ތައާރަފް ކުރަން ނިންމާފައިވާ ގާނޫނެއްގެ ދަށުން، 2008 ވަނަ އަހަރަށް ފަހު އުފަންވި އެއްވެސް މީހަކަށް، އެ މީހެއްގެ ހަޔާތުގައި ސިނގިރޭޓު އަދި ދުންފަތުގެ އުފެއްދުންތައް ނުގަނެވޭނެ އެވެ.
"އަޅުގަނޑުމެން ޔަގީން ކުރަން ބޭނުން ވަނީ ޒުވާން މީހުން ދުވަހަކު ވެސް ދުންފަތުގެ އިސްތިއުމާލް ކުރަން ނުފަށާނެކަން،" ހެލްތު މިނިސްޓަރު ޑރ. އަޔިޝާ ވެރާލް ވިދާޅުވި އެވެ.
އެ ގާނޫނަކީ ދުންފަތުގެ އިސްތިއުމާލް ކުރުމާ ދެކޮޅަށް އަޅާނެ ކަމަށް ނިއުޒީލޭންޑުގެ ސަރުކާރުން ބުރާސްފަތި ދުވަހު އިއުލާނު ކުރި ކަންކަމުގެ ތެރޭގައި ހިމެނޭ ގާނޫނެކެވެ.
"ދުނިޔެ އަށް ނަމޫނާއަކަށް" ވާ ފަދަ އިސްލާހީ ބަދަލުތަކަށް ޑޮކްޓަރުންނާއި ސިއްހީ ތަޖުރިބާކާރުން ވަނީ މަރުހަބާ ކިޔައިފަ އެވެ. ބަދަލުތަކުގެ ސަބަބުން ދުންފަތުގެ އުފެއްދުންތައް ހޯދުމަށް އުނދަގޫވެ، ސިނގިރޭޓުގައި ހުންނަ ނިކޮޓީންގެ މިންވަރު ވެސް މަދުކުރާނެ އެވެ.
"އޭގެ ސަބަބުން މީހުންނަށް ދުންފަތުގެ އިސްތިއުމާލް ކުރުން ހުއްޓާލަން ފަސޭހަވާނެ ނުވަތަ ގެއްލުން ކުޑަ އުފެއްދުންތަކަށް ބަދަލުކުރެވޭނެ،" ޔުނިވާސިޓީ އޮފް އޮޓާގޯގެ ޕްރޮފެސަރު ޖެނެޓް ހުކް ވިދާޅުވި އެވެ.
ނިއުޒީލޭންޑުން އަމާޒު ހިފާފައި ވަނީ 2025 ވަނަ އަހަރާ ހަމައަށް ދާއިރު އެ ގައުމުގައި ދުންފަތުގެ އިސްތިއުމާލް ކުރާ ރޭޓު ފަސް ޕަސެންޓަށް ތިރިކުރުމަށެވެ. އޭގެ ފަހުން އެއްކޮށް ދުންފަތުގެ އިސްތިއުމާލް ކުރުން އެ ގައުމުން ނައްތާލަން މަސައްކަތް ކުރާނެ އެވެ.
މިހާރު ނިއުޒީލޭންޑުގައި ދުންފަތުގެ އިސްތިއުމާލް ކުރަނީ އާބާދީގެ 13 ޕަސެންޓު މީހުންނެވެ. ނަމަވެސް މީގެ 10 އަހަރު ކުރިން އެ ނިސްބަތް ހުރީ 18 ޕަސެންޓުގަ އެވެ.
ނިއުޒީލޭންޑުގެ ހެލްތު މިނިސްޓްރީން ބުނީ އެ ގައުމުގައި ކެންސަރު ބަލި ދިމާވާ ކޮންމެ ހަތަރު މީހަކުން އެކަކަށް ދިމާވަނީ ދުންފަތުގެ އިސްތިއުމާލް ކުރުމާ ގުޅިފައިވާ ކެންސަރު ކަމަށޭވެ.
