ނިއު ޒީލެންޑްގެ ސަރުކާރުގެ ބެލުމުގެ ދަށުގައި އަދި ފައްޅިތަކުގެ ބެލުމުގެ ދަށުގައި ތިބި މީހުންނަށް ލިބުނު އަނިޔާތަކަށް ސަރުކާރުން މައާފަށް އެދިއްޖެ އެވެ.
ނިއު ޒީލެންޑްގެ ބޮޑުވަޒީރު ކްރިސްޓޮފާ ލުކްސޯން އެ ގައުމުގެ ގާނޫނު ހަދާ މަޖިލީހުގައި ވިދާޅުވީ ދައުލަތުގެ ބެލުމުގެ ދަށުގައި ތިބި މީހުންނަށް އަނިޔާ ލިބުމަކީ އެއްގޮތަކަށް ވެސް ކުރެވިގެންވާނެ ކަމެއް ނޫން ކަމަށާއި އެއީ ގޯސްކޮށް ހިނގައިދިޔަ ކަމެއް ކަމަށް ގަބޫލު ކުރައްވާ ކަމަށެވެ.
"އެކަމާ ގުޅިގެން ގިނަ ބައެއްގެ ދިރިއުޅުން ބަދަލުވި. އެކަމުގެ ފުރިހަމަ ޒިންމާ ސަރުކާރުން ނަގަން ޖެހޭނެ،" ލުކްސޮން ވިދާޅުވި އެވެ.
ނިއު ޒީލެންޑް ސަރުކާރުގެ ބެލުމުގެ ދަަށަށް ގެންދިޔަ މީހުންނަށް އަނިޔާކުރި މައްސަލަ ފެންމަތިވުމާ ގުޅިގެން ހެދި މިނިވަން އިންކުއަރީގެ ރިޕޯޓެއް މިދިޔަ ޖުލައި މަހު ވަަނީ އާންމު ކޮށްފަ އެވެ.
އެ ރިޕޯޓުގައި ބުނެފައި ވަނީ ފާއިތުވި 70 އަހަރު ތެރޭގައި ނިއު ޒީލޭންޑްގެ ސަރުކާރުގެ ބެލުމުގެ ދަށަށް ގެންދިޔަ ދެ ލައްކައަށް ވުރެ ގިނަ މީހުންނަށް އަނިޔާކޮށްފައިވާ ކަމަށެވެ. އޭގެ ތެރޭގައި ކުޑަކުދިންނާއި ޒުވާނުން އަދި އުމުރުން ދުވަސްވި މީހުން ވެސް ހިމެނެ އެވެ.
އެ މީހުންނަށް ދިން އަނިޔާތަކުގެ ތެރޭގައި ޖިންސީ ގޯނާކުރުމާއި، ޖިސްމާނީ ގޮތުންނާއި ނަފްސާނީ އަނިޔާ ވެސް ހިމެނެ އެވެ. އިލެކްޓްރިކް ޝޮކް ވެސް ބައެއް މީހުންނަށް ދީފައިވެ އެވެ.
އެ އިންކުއަރީއާ އެކު 138 ރިކޮމެންޑޭޝަން ވަނީ ސަރުކާރަށް ހުށަހަޅާފަ އެވެ. އެ ރިކޮމެންޑޭޝަންތަކުގެ ތެރޭގައި ސަރުކާރުން ކުރިން ހިނގައިދިޔަ އަނިޔާވެރި ކަން ކަމަށް މައާފަށް އެދުން ވެސް ހިމެނެ އެވެ.
