އެންޖެލާ މާކަލްގެ 16 އަހަރުވީ ލީޑާޝިޕް ނިމުމަކަށް ގެނެސް، އާ ޗާންސެލަރު ކަމަށް އޯލާފް ޝޯލްޒް ހުވާކުރައްވައިފި އެވެ.
ޝޯލްޒް މަގާމަށް އިންތިހާބު ކުރީ ޕާލިމެންޓުންނެވެ. ޕާލިމެންޓުގައި ޝޯލްޒްގެ ތިން ޕާޓީ ހިމެނޭ ކޯލިޝަނުގެ މެޖޯރިޓީއެއް އެބަ އޮތެވެ.
ޝޯލްޒް ނިސްބަތްވެވަޑައިގަންނަވާ ސޯޝަލް ޑިމޮކްރެޓުން ވެރިކަން ކުރާނީ ގްރީންސް އާއި ފްރީ ޑިމޮކްރެޓްސް ޕާޓީއާ އެކު އެވެ.
ޗާންސެލަރު ކަމަށް ޝޯލްޒް ވަޑައިގެންނެވުމާ އެކު މާކަލްގެ 31 އަހަރުވީ ދިގު ސިޔާސީ ކެރިއަރު ނިމުމަކަށް އައީ އެވެ.
މާކަލްގެ ސަރުކާރުގައި ވައިސް ޗާންސެލަރުކަން އަދާކުރެއްވި 63 އަހަރުގެ ޝޯލްޒް އިންތިހާބު ކާމިޔާބު ކުރީ މިދިޔަ ސެޕްޓެމްބަރު މަހު އެވެ.
އޭނާ މަގާނަށް އައްޔަނު ކުރަން ފެންނަ ކަމަށް ނިންމީ ޕާލިމެންޓުގެ 395 މެމްބަރުންގެ ވޯޓުންނެވެ. ނުފެންނަ ކަމަށް 303 މެމްބަރުން ވޯޓު ދެއްވި އެވެ.
ޖަރުމަނުގެ ނުވަ ވަނަ ޗާންސެލަރު ކަމަށް ވަޑައިގެންނެވި ޝޯލްޒް މަގާމަށް އައްޔަނު ކުރެއްވީ ރައީސް ފްރޭންކް ވޯލްޓާ ސްޓެއިންމެޔޭ އެވެ. އެއަށްފަހު މަގާމުގެ ހުވާ ކުރެއްވީ ޕާލިމެންޓުގެ ރައީސް ބާބެލް ބާސްގެ ކުރިފުޅުމަތީގަ އެވެ.
ޝޯލްޒްގެ ސަރުކާރުގެ ކެބިނެޓުގައި 16 މެމްބަރުން ތިއްބަވާ އިރު، މިއީ އަންހެނުންނާއި ފިރިހެނުން ހަމަހަކޮށް ކެބިނެޓުގައި ހިމެނި ފުރަތަމަ ފަހަރެވެ.
އާ ސަރުކާރުގެ އެންމެ ފާހަގަކުރެވޭ ކަމަކީ މޫސުމީ ބަދަލާ ދެކޮޅަށް ކޯލް ބޭނުން ކުރުން މަދުކޮށް، އިއާދަކުރަނިވި ހަކަތަ އަށް ސަމާލުކަން ދޭން ރާވާފައި ވުމެވެ.
