ބޭންކް އޮފް މޯލްޑިވްސް (ބީއެމްއެލް) އިން ހިންގާ "އަހަރެންގެ ބޭންކް ކޮމިނިއުޓީ ފަންޑު'"ގެ މި އަހަރުގެ ހަތަރު ވަނަ ކުއާޓަރުގެ ފަސް ޕްރޮޖެކްޓް އިއުލާނުކޮށްފި އެވެ.
މިދިޔަ މަހު ހުޅުވާލި ފުރުސަތުގައި ހުށަހެޅި ޕްރޮޕޯސަލްތަކުގެ ތެރެއިން ޕްރޮޖެކްޓް ކާމިޔާބުކޮށްފައިވާ ފަސް ފަރާތުގެ ތެރޭގައި ދެ ޖަމިއްޔާ އަކާއި ތިން ފަރުދުން ހިމެނެ އެވެ. އެއިން ކޮންމެ ފަރާތަކަށް ވެސް ބީއެމްއެލްގެ "އަހަރެންގެ ބޭންކު ކޮމިނިޓީ ފަންޑު" ން 50،000 ދޫކުރާނެ އެވެ.
titledesc
"މި ފަހަރު ވެސް ރަނގަޅު ޕްރޮޕޯސަލް ތަކެއް ކޮމިއުނިޓީ ފަންޑަށް ލިބުނުކަން އުފަލާއެކު ފާހަގަކޮށްލަން. މިއިން ދައްކުވައި ދެނީ އަމިއްލަ ފަރުދުންނާއި ޖަމިއްޔާ ތަކުން ރަށުގެ ތަރައްގީ އާއި މުޖުތަމައުގެ ލާބަ އަށް މަސައްކަތް ކުރުމަށް ބޭނުންވާ މިންވަރު،" ޕްރޮޕޯސަލް ކާމިޔާބުކުރި ފަރާތްތައް އިރުލާނުކޮށް ބީއެމްއެލް އިން ނެރުނު ނޫސް ބަޔާނުގައި ބުނެފައިވެ އެވެ.
ކޮމިއުނިޓީ ފަންޑަކީ އަމިއްލަ ފަރުދުންނާއި ހިލޭ ސާބަހަށް މަސައްކަތްކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓް ތަކަށް މާލީ އެހީތެރިކަން ފޯރުކޮށްދިނުމަށް ހުޅުވާލާފައިވާ ފަންޑެކެވެ. ތައުލީމާއި، ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުމާއި މުޖުތަމައަށް ފައިދާހުރި ކަންކަމަށް އަމާޒުކޮށްގެން ޕްރޮޖެކްޓުތައް ހިންގުމަށް މީގެ ކުރިން 55 ފަރާތަކަށް ފައިސާގެ އެހީ ފޯރުކޮށްދީފައިވެ އެވެ.
